1,2．（甲）有個牧師想知道聖經研究者嘅活動經費係點樣嚟嘅。羅素弟兄點樣回答佢呢？（乙）呢一章我哋會討論乜嘢？

 有一次，一個歸正會嘅牧師行過嚟問查爾斯·羅素弟兄，聖經研究者嘅活動經費係點樣嚟嘅。

 羅素弟兄解釋話：“我哋從來都唔向人募捐。”

 牧師又問：“噉你哋嘅經費點嚟㗎？”

 羅素回答話：“其實答案好簡單，可能我講你都唔會信。參加聚會嘅人唔會見到有人傳個籃過嚟要佢哋捐款。但係，佢哋睇出呢一切都係需要經費嘅。佢哋心諗：‘聚會所係需要開支嘅……我可以點樣捐啲錢嚟支持吓呢？’”

 牧師難以置信噉望住羅素弟兄。

 羅素繼續話：“我同你講嘅都係事實。佢哋真係問過我，‘我可以點樣捐啲錢嚟支持呢啲活動呢？’當一個人得到上帝嘅賜福而有啲錢嗰時，佢好自然就會想捐助主嘅工作。”如果佢冇錢，點解我哋仲要逼佢捐錢呢？ a

² 羅素弟兄講嘅的確係“事實”。上帝嘅子民從古到今都通過自願捐款嚟支持正確嘅崇拜。呢一章，我哋會睇吓聖經嘅一啲例子，同埋耶和華現代子民嘅歷史。當我哋知道今日王國工作嘅經費係點樣嚟嘅時候，每個人都可以問吓自己：“我可以點樣表明自己支持上帝嘅王國呢？”

3,4．（甲）喺捐獻方面，耶和華對崇拜佢嘅人有點樣嘅信心？（乙）以色列人點樣表明自己支持聖幕嘅建造工程？

³ 耶和華對真正崇拜佢嘅人有信心，知道佢哋只要有機會，就會好樂意通過自願捐獻嚟表明自己愛戴佢。我哋嚟睇吓古代以色列嘅兩個例子。

 ⁴ 以色列人離開埃及之後，耶和華指示佢哋要建造一個可以移動嘅聖幕，用嚟崇拜佢。要建造同布置呢個帳幕需要大量資財。耶和華吩咐摩西要俾以色列人機會支持呢個工程，佢通過摩西話：“凡甘心樂意嘅，都可以將奉獻俾耶和華嘅禮物送上嚟”。（出埃及記35:5）冇幾耐之前，以色列人仲喺埃及嘅時候，俾人用苛刻嘅手段逼佢哋服“各種各樣嘅勞役”。噉而家佢哋對摩西嘅呼籲有乜嘢反應呢？（出埃及記1:14）佢哋全力支持呢項工程，自願獻上金銀同其他貴重物品。呢啲財物好可能大部分都係從奴役過佢哋嘅埃及人手中得嚟嘅。（出埃及記12:35,36）以色列人捐獻嘅比工程所需嘅多出好多，摩西甚至要阻止民衆，使“民衆唔再送上禮物”。（出埃及記36:4-7）

5．當大衛使以色列人有機會為聖殿嘅建造工程作出捐獻嘅時候，佢哋點樣回應？

⁵ 475年之後，大衛捐出自己“私人積蓄嘅金銀財寶”作為建造聖殿嘅經費。呢座聖殿係地上第一個固定嘅正確崇拜中心。後來，大衛使佢嘅同胞都有機會作出捐獻，佢問以色列人：“今日有邊個甘心樂意奉獻禮物俾耶和華呢？”民衆紛紛響應，“全心自願奉獻俾耶和華”。（歷代志上29:3-9）大衛知道所有財物其實都係嚟自耶和華嘅，佢向耶和華禱告話：“萬物都從你而嚟，我哋只係將從你手上得到嘅獻俾你啫。”（歷代志上29:14）

6．今日，點解上帝王國嘅工作需要經費？呢個引起乜嘢值得思考嘅問題？

⁶ 摩西同大衛都唔使强迫以色列人捐獻。以色列人係懷住樂意嘅心作出捐獻嘅。今日又點呢？我哋清楚知道上帝王國嘅工作係需要經費嘅。出版同運送聖經以及聖經書刊，興建同保養聚會嘅地方以及分部設施，同埋向受災嘅信徒同工提供緊急救援，呢一切都需要龐大嘅費用。所以，呢個引起一啲值得我哋思考嘅問題：呢啲必需嘅經費係點樣嚟嘅？跟從君王耶穌嘅人係咪需要受到再三敦促，先至會捐獻呢？

7,8．點解耶和華嘅子民唔會乞求經費或者勸捐？

⁷ 羅素弟兄同佢嘅同工拒絶用一般基督教會慣用嘅方法嚟籌款。《守望台》第二期（英語）有一篇題目叫做《你想唔想要〈錫安嘅守望台〉？》嘅文章。喺呢篇文章裏面，羅素話：“我哋相信《錫安嘅守望台》有耶和華做後盾，所以， 我哋絶對唔會向人乞求經費或者勸捐。耶和華話所有金銀都屬於佢。如果佢唔再提供必要嘅經費，噉我哋就知道係時候要停刊嘞。”（哈該書2:7-9）而家已經超過130年嘞，《守望台》同出版呢本雜誌嘅組織依然蓬勃發展！

⁸ 耶和華嘅子民唔會向人乞求經費。佢哋唔會傳遞捐款盤或者向人寄信籌款，亦都唔會通過義賣、抽獎遊戲或者類似嘅活動嚟籌款。佢哋一直按照《守望台》好多年前所講嘅去做，就係“我哋從來都唔認為仿效一般教會以主嘅名義向人勸捐係適當嘅……我哋覺得以主嘅名義用各種方式乞求經費會羞辱主，唔會蒙佢悦納，而且捐款人同捐款所成就嘅工作都唔會得到祝福。” b

9,10．我哋自願捐獻嘅其中一個理由係乜嘢？

⁹ 身為上帝王國嘅子民，我哋唔需要有人逼先至捐款。相反，我哋好樂意用自己嘅金錢同其他資財嚟支持王國嘅工作。點解我哋會甘心樂意捐款呢？請睇吓以下三個理由。

¹⁰ 首先，我哋自願捐獻係因為愛耶和華，想做“佢眼中喜悦嘅事”。（約翰一書3:22）耶和華確實悦納嗰啲甘心樂意捐獻嘅人。關於捐獻，我哋一齊睇吓使徒保羅點樣講。（請讀哥林多後書9:7）真基督徒唔應該勉强自己或者出於被迫而捐獻。相反，佢作出捐獻應該係照“心裏所決定嘅去做”。 c即係話，佢知道有捐獻嘅需要以及自己可以點樣幫忙之後，就採取行動作出捐獻。耶和華悦納噉樣做嘅人，聖經話：“上帝喜愛捐得快樂嘅人。”另一個譯本話：“上帝愛嗰啲樂意捐獻嘅人。”

11．乜嘢推動我哋盡己所能，將自己最好嘅獻俾耶和華？

¹¹ 第二，耶和華賜咗好多福分俾我哋，所以我哋好想通過物質捐獻嚟感謝佢。一齊睇吓摩西律法嘅一條誡命，諗吓背後有乜嘢發人深省嘅原則。（請讀申命記16:16,17）喺一年三次嘅節期，每個以色列男子都要“照耶和華……所賜嘅福”送上禮物。所以，佢哋喺慶祝節期之前，會細心諗諗，數算一下自己嘅福分，然後按自己嘅能力獻上最好嘅禮物。同樣，我哋細想耶和華所賜嘅種 種福分，就會受到打動，好想將自己最好嘅獻俾佢。我哋衷心獻出自己嘅財物，可以反映出我哋有幾咁感激耶和華賜俾我哋嘅福分。（哥林多後書8:12-15）

12,13．自願捐獻點樣表明我哋愛君王耶穌基督呢？我哋應該捐幾多呢？

¹² 第三，自願捐獻可以表明我哋愛君王耶穌基督。點解噉講？請留意耶穌犧牲前嗰晚同門徒講嘅話。（請讀約翰福音14:23）佢話：“邊個愛我，就會遵守我嘅話語”。耶穌嘅“話語”其中一個吩咐就係要將王國嘅好消息傳遍普天下。（馬太福音24:14；28:19,20）我哋遵守耶穌嘅“話語”，就會付出時間、精力同財物，盡己所能推廣王國嘅傳道工作。噉樣做就表明我哋愛彌賽亞君王。

¹³ 的確，作為上帝王國嘅忠貞子民，我哋好想通過捐獻財物嚟表明自己全心支持上帝嘅王國。我哋應該捐 幾多呢？呢個係個人嘅決定。每個人都可以盡全力作出捐獻。其實我哋好多同工喺物質上都唔係好富有。（馬太福音19:23,24；雅各書2:5）不過值得安慰嘅係，哪怕少少嘅捐獻，只要係出於樂意嘅心，耶和華同耶穌都會好珍視。（馬可福音12:41-44）

14．有好多年嘅時間，耶和華見證人分發雜誌嗰時會點樣做？

¹⁴ 有好多年嘅時間，耶和華見證人分發聖經書刊嗰時都會向人收取捐款。見證人盡量將建議嘅額度保持到最低，等嗰啲家境唔係咁富裕嘅人都可以得到書刊。當然，如果住户睇嚟對書刊感興趣但又冇錢捐款，傳道員都會好樂意將資料留低俾佢哋。傳道員好希望將書刊交到俾嗰啲感興趣嘅人，使佢哋可以通過閲讀而得益。

15,16．（甲）1990年，中央長老團作出乜嘢調整？（乙）我哋可以點樣作出自願捐獻呢？（另見附欄“ 捐款會用喺邊啲方面？”）

¹⁵ 1990年，中央長老團開始調整分發書刊時建議捐款嘅方式。從嗰年開始，喺美國分發嘅所有書刊都唔再按照指定嘅捐款額嚟收取捐款。一封俾美國所有會衆嘅信話：“傳道員同感興趣嘅住户都可以得到雜誌同書刊。我哋唔需要提出或者建議佢哋作出指定額度嘅捐獻先可以得到刊物。……如果任何人想通過捐款嚟支持我哋嘅教育工作都可以噉樣做。但係，無論佢哋有冇捐款，都可以得到書刊。”呢個安排幫助人睇出，我哋嘅工作係出於自願嘅，係屬於宗教性質嘅，而且清楚表明“我哋唔會……販賣上帝嘅話語”。（哥林多後書2:17）後來，全球各分部都按照呢個捐獻安排去做。

¹⁶ 我哋可以點樣作出自願捐獻呢？喺耶和華見證人嘅王國聚會所入面，會有捐款箱放喺唔太顯眼嘅地方。想捐獻嘅人可以將款項放入捐款箱，或者直接捐俾耶和華見證人運用嘅其中一個法人。《守望台》每年都會刊登一篇文章解釋可以點樣作出捐獻。

17-19．請説明捐款點樣用喺（甲）全球工作；（乙）全球王國聚會所建築工程；（丙）本地會衆開支。

¹⁷ 全球工作 呢啲款項會用嚟推廣全球傳道工作，包括製作喺世界各地分發嘅書刊，建造同保養分部辦事處 以及伯特利宿舍，開辦各種唔同嘅訓練班。另外，呢啲款項仲會用嚟照顧特派傳道員、探訪會衆嘅監督同埋特别先驅嘅基本生活需要。我哋嘅捐款亦都用嚟為受災嘅信徒同工提供緊急救援。 d

¹⁸ 全球王國聚會所建築工程 呢啲款項會用嚟幫助會衆建造或改建王國聚會所。當收到嘅捐款越來越多，就會有更多資金可以資助其他有需要嘅會衆。 e

¹⁹ 本地會衆開支 呢啲款項會用嚟支付王國聚會所嘅日常開支同保養費用。長老可以提議將部分款項捐俾分部辦事處，用嚟資助全球工作。佢哋會請會衆表決，如果決議通過，就會將款項捐出。每個月，管理會衆賬目嘅弟兄都會準備好一份會計報告。呢份報告會向會衆成員讀出嚟。

20．你可以點樣運用自己“寶貴嘅資産”尊崇耶和華？

²⁰ 當我哋諗到喺全球傳講王國好消息同幫助人成為基督徒呢件工作所涉及嘅一切，就會受到推動，用自己“寶貴嘅資産……尊崇耶和華”。（箴言3:9,10）寶貴嘅資産包括我哋嘅精力、才幹同屬靈嘅恩賜。我哋的確好想獻出呢啲寶貴嘅資産，全力支持王國嘅工作。除此之外，寶貴嘅資産亦都包括我哋嘅財物。願我哋喺捐獻方面盡己所能，善用我哋嘅資財嚟榮耀耶和華上帝，表明我哋支持彌賽亞王國。