年輕人，創造主希望你快樂
“佢用美物使你一生滿足”——詩篇103:5
1,2． 選擇人生目標嗰時，點解聽從創造主嘅指引係明智嘅？（請睇吓課文開頭嘅圖片）
如果你係一個年輕人，關於你嘅將來，可能其他人俾咗你好多建議。學校嘅老師、輔導員或者其他人，可能鼓勵你追求高等教育同高收入嘅職業。不過，耶和華建議你選擇另一個方向。當然，耶和華希望你喺學校努力學習，等你畢業之後有能力維持生活。（歌羅西書3:23）佢亦都知道，作為年輕人，你需要作一啲重要嘅決定，而呢啲決定會影響你嘅將來。所以，耶和華為你提供一啲原則作為指引，幫助你喺呢段最後嘅日子能够以佢悦納嘅方式生活。（馬太福音24:14）
2 請謹記，耶和華了解一切。佢知道呢個世界將來會點樣，亦都知道呢個事物制度仲有幾耐就會結束。（以賽亞書46:10；馬太福音24:3,36）耶和華了解我哋，知道乜嘢會為我哋帶嚟真正嘅快樂同滿足，亦都知道乜嘢會使我哋傷心同失望。所以，就算其他人嘅建議聽起嚟好合理，但係冇上帝嘅話語作為基礎嘅話，就唔會有真正嘅智慧。（箴言19:21）
“同耶和華對立，就毫無智慧”
3,4． 亞當夏娃聽從錯誤嘅建議，對佢哋以及後代造成乜嘢影響？
3 喺人類歷史初期，撒但就向人類提出咗錯誤嘅建議。佢話俾夏娃知，如果夏娃同亞當自行決定自己嘅人生，佢哋就會更加快樂。（創世記3:1-6）其實，撒但噉樣講係出於自私嘅動機。佢想亞當夏娃同佢哋嘅子孫後代，都服從並崇拜佢而唔係耶和華。不過，撒但為佢哋做過啲乜嘢呢？佢哋擁有嘅一切，包括美麗嘅家園、完美嘅身體同埋可以永遠享有嘅美好生活，都係耶和華賜俾佢哋嘅。
4 可悲嘅係，亞當同夏娃背叛上帝，同賜佢哋生命嘅上帝斷絶關係。正如花朵被剪落嚟之後會慢慢凋謝，佢哋亦都逐漸衰老，最後死去。佢哋嘅後代亦因為遺傳嘅罪而受苦。（羅馬書5:12）即使係噉，大部分人仲係選擇唔服從上帝，按照自己嘅方式生活。（以弗所書2:1-3）結果清楚表明，“只要同耶和華對立，就毫無智慧……可言”。（箴言21:30）
5． 上帝對佢所創造嘅人類懷有點樣嘅信心？呢種信心係咪合理嘅呢？
5 不過耶和華知道有啲人會尋求同埋事奉佢，當中包括好多優秀嘅年輕人。（詩篇103:17,18；110:3）呢啲年輕人對耶和華嚟講非常寶貴！你係咪其中一個呢？如果係嘅話，你而家肯定得到好多嚟自上帝嘅“美物”，而呢啲福分使你生活得更加快樂。（請讀詩篇103:5；箴言10:22）呢篇課文會討論其中一啲“美物”，分别係豐富而又優質嘅靈糧、最好嘅朋友、有價值嘅目標同埋真正嘅自由。
耶和華滿足你嘅屬靈需要
6． 點解你應該照顧自己嘅屬靈需要？耶和華提供乜嘢嚟幫助你滿足呢種需要？
6 同動物唔一樣，你有屬靈嘅需要。只有你嘅創造主先至可以滿足你呢種需要。（馬太福音4:4）如果你懷住感激之心聽從佢，佢就會賜你洞察力、智慧，使你幸福快樂。耶穌話：“自覺有屬靈需要嘅人有福嘞，因為天上嘅王國係佢哋嘅。”（馬太福音5:3）上帝賜聖經俾你，亦都通過“忠信睿智嘅奴隸”提供靈糧嚟滿足你嘅屬靈需要。（馬太福音24:45）呢啲屬靈食物的確種類多樣，豐富多彩！（以賽亞書65:13,14）
7． 吸收上帝提供嘅靈糧可以使你點樣得益？
7 上帝提供嘅靈糧會使你獲得智慧，幫助你培養思考力，噉你喺好多方面就可以作出明智嘅決定，從而得到保護。（請讀箴言2:10-14）智慧同思考力幫助你睇出邊啲係錯誤嘅道理，例如無神論、只有金錢財富先至能够令人幸福快樂嘅觀點。智慧同思考力亦都幫助你抵抗錯誤嘅慾望，避免一啲傷害自己嘅行為習慣。所以，要盡己所能尋求上帝嘅智慧，培養思考嘅能力。通過呢啲寶貴嘅恩賜，你就可以親身體驗到耶和華有幾愛你，好想將最好嘅送俾你。（詩篇34:8；以賽亞書48:17,18）
8． 點解你而家就應該親近上帝？同上帝親近點樣為你嘅未來帶嚟益處？
8 好快，撒但世界嘅每個部分都會徹底被毁滅。到時，只有耶和華先至能够保護我哋，為我哋提供生活所需。可能有一日我哋要倚靠佢先至有下一餐飯食。（哈巴谷書3:2,12-19）所以，你而家就要親近你嘅天父耶和華，强化對佢嘅信心。（彼得後書2:9）噉樣，無論發生乜嘢事，你都會有詩篇執筆者大衛一樣嘅感覺，佢話：“我時刻睇耶和華如在面前。因為佢喺我右邊，我就必不動搖。”（詩篇16:8）
耶和華俾你最好嘅朋友
9． （甲）約翰福音6:44話，耶和華會點樣做？（乙）認識其他見證人同認識一般人有乜嘢唔同？
9 假如有個唔認識真理嘅人，你同佢只係見過一次面，你對佢嘅了解會有幾深呢？你可能知道佢個名，個樣係點嘅，而其他方面就唔係咁清楚嘞。不過，你新認識一個信徒同工嘅情況就會好唔一樣。你知道佢愛耶和華，亦都知道耶和華睇出佢係一個誠心正意嘅人，所以邀請佢成為屬靈大家庭嘅一分子。（請讀約翰福音6:44）無論呢個同工嚟自邊度或者成長背景係點嘅，你喺好多方面已經了解佢，而佢亦都一樣了解你！
耶和華希望我哋擁有最好嘅朋友，定立屬靈嘅目標（請睇第9-12段）
10,11． 耶和華嘅子民有乜嘢共通點？呢啲共通點為我哋帶嚟乜嘢益處？
10 就算你同另一個見證人講嘅語言唔一樣，但係你哋肯定都識得“純潔嘅語言”。（西番雅書3:9）你哋都相信上帝，按照同樣嘅道德標準生活，對未來有同樣嘅希望。由於喺好多重要嘅事上都有共通點，所以你哋好容易就能够互相信任，有穩固嘅基礎可以成為永遠嘅朋友。
11 你事奉耶和華，噉你喺世界各地都會有最好嘅朋友，噉樣講一啲都唔誇張。只係你未有機會識晒佢哋！除咗耶和華嘅子民之外，仲有邊啲人可以享有呢份咁寶貴嘅恩賜呢？
耶和華俾你有價值嘅目標
12． 你可以為自己定立乜嘢屬靈目標？
12 請讀傳道書11:9－12:1。你有冇一啲屬靈目標呢？你係咪正努力達成呢啲目標？你可能每日努力讀聖經，或者努力提升自己講話同教導嘅能力。如果你自己留意到又或者有人話俾你知你有進步，嗰陣時你有乜嘢感覺呢？你肯定覺得好開心，好有成就感。因為你效法耶穌，將上帝嘅旨意放喺首位。（詩篇40:8；箴言27:11）
13． 點解事奉上帝比追求世俗嘅目標更加好？
13 如果你專心事奉耶和華，你所做嘅工作就會使你心滿意足，亦都令你嘅人生充滿意義。使徒保羅話：“你哋要堅定不移，時刻多做主嘅工作，因為知道你哋嘅勞苦對佢嚟講唔係枉然嘅。”（哥林多前書15:58）如果人一心追求世俗嘅目標，就算佢名成利就，都唔會有真正嘅快樂。（路加福音9:25）所羅門王通過自身嘅經歷向我哋證實咗呢一點。（羅馬書15:4）
14． 你從所羅門嘅經歷學到乜嘢？
14 所羅門係世上其中一個最富有同最有權勢嘅人，佢曾經做過一個試驗。佢同自己講：“嚟喇，等我用歡樂試試你，你都嚟享享福。”（傳道書2:1-10）於是，所羅門建造豪華嘅房屋，精心設計園林，又隨心所欲做自己想做嘅事。佢有冇感到滿足同快樂呢？我哋唔需要估，因為所羅門已經話咗俾我哋知。佢話：“後來我諗翻我手所做嘅一切事，……諗唔到，一切盡都空虛，……毫無益處。”（傳道書2:11）你有冇從所羅門嘅經歷學到教訓，並且謹記在心？
15． 點解信心好重要？根據詩篇32:8，信心帶嚟乜嘢益處？
15 有啲人犯錯而遭受惡果之後先至學到教訓，不過耶和華唔想你受苦。如果你有信心，就會樂意服從耶和華，將佢嘅旨意放喺生活首位。呢種信心係無價嘅，絶對唔會令你失望。冇錯，耶和華絶對唔會忘記“你哋為佢嘅名所顯嘅愛心”。（希伯來書6:10）所以，請努力培養堅强嘅信心，噉你就可以睇出，天父的確係為你最大嘅益處着想。（請讀詩篇32:8）
耶和華使你有真正嘅自由
16． 點解我哋應該珍視並明智噉運用自由？
16 保羅話：“耶和華嘅靈喺邊度，邊度就有自由。”（哥林多後書3:17）冇錯，耶和華喜愛自由，佢創造人類嘅時候亦都將呢種對自由嘅愛放喺每個人嘅心入面。同時，佢希望你明智噉運用自己嘅自由嚟保護自己。可能你知道有啲年輕人睇色情資訊、有性不道德嘅行為、參與危險嘅運動，或者濫用藥物同酒精。可以肯定嘅係，佢哋享受到嘅興奮或者快感只係一時嘅，而通常就要付出沉重嘅代價，可能係染上疾病、對藥物或者酒精上癮，甚至失去生命。（加拉太書6:7,8）佢哋以為自己有“自由”，其實只不過係殘忍噉傷害自己。（提多書3:3）
17,18． （甲）服從上帝點樣使我哋有真正嘅自由？（乙）亞當同夏娃犯罪之前喺邊方面比今日嘅人有更多自由？
17 相比之下，你知道有幾多人因為遵守聖經嘅標準而患病？顯然，服從上帝有益身心健康，又可以得到真正嘅自由。（詩篇19:7-11）如果你喺上帝嘅完美律法同原則之下明智噉運用你嘅自由，就可以向上帝同父母表明自己係一個有責任感嘅人。你嘅父母可能會更加信任你，俾你更多自由。其實上帝嘅旨意就係，喺不久嘅將來賜完美嘅自由俾佢嘅忠僕。聖經將呢個描述為“上帝兒女榮耀嘅自由”。（羅馬書8:21）
18 亞當同夏娃體驗過呢種自由。上帝喺伊甸園俾咗幾多條誡命嚟限制佢哋呢？只係得一條，就係佢哋唔可以食一棵樹嘅果。（創世記2:9,17）你會唔會認為呢條唯一嘅誡命好唔合理或者係一種壓迫呢？當然唔會！請諗吓人類制訂咗幾多法律條文並强迫其他人服從，而耶和華只係俾咗亞當同夏娃一條誡命。
19． 為咗幫助我哋得到自由，耶和華同耶穌教導我哋乜嘢？
19 耶和華對待我哋嘅方式確實好有智慧。佢冇俾我哋好多律法，而係耐心教導我哋遵從愛嘅律法。佢希望我哋憎恨惡事，喺生活上運用聖經原則。（羅馬書12:9）耶穌通過登山寶訓，幫助我哋了解人做壞事嘅根本原因。（馬太福音5:27,28）喺新世界，君王耶穌會繼續教導我哋，幫助我哋好似佢一樣喜愛正義，憎恨不法。（希伯來書1:9）佢亦都會使我哋有完美嘅身心。到時，你唔會再受到引誘而犯錯，亦唔會因為唔完美而受苦。最終，你會享有耶和華應許嘅“榮耀嘅自由”。
20． （甲）耶和華點樣運用佢嘅自由？（乙）我哋可以點樣效法耶和華？
20 當然，我哋享有嘅自由唔係毫無限制嘅。我哋做事嘅動機都應該係愛上帝同愛其他人。其實，耶和華只係要求我哋效法佢。即使佢擁有絶對嘅自由，佢都仲係以愛心對待佢創造嘅衆生。（約翰一書4:7,8）所以，我哋效法上帝先至可以有真正嘅自由。
21． （甲）大衛對耶和華有點樣嘅感覺？（乙）下一篇課文會討論乜嘢？
21 耶和華賜俾你豐富嘅靈糧、最好嘅朋友、有價值嘅目標同埋完美而又自由嘅未來。你有冇感激耶和華賜俾你咁多“美物”？（詩篇103:5）如果你對耶和華心懷感激，可能就會有大衛一樣嘅感覺。佢喺詩篇16:11話：“你必定使我認識生命之路。喺你面前，有使人滿足嘅歡欣；喺你右手裏面，永遠有可喜嘅福樂。”下一篇課文會分析詩篇第16篇入面一啲特别嘅屬靈寶石，可以幫助你睇出點樣先可以過真正心滿意足嘅生活。
