你係咪好似挪亞、但以理同約伯噉認識耶和華？
“經常作惡嘅人，唔能够領悟公正；尋求耶和華嘅，凡事都能領悟。”——箴言28:5
1-3．（甲）喺最後嘅日子，我哋可以點樣對上帝保持忠貞？（乙）呢篇課文會討論乜嘢？
隨住最後嘅日子臨近終結，世上嘅惡人惡事不斷“如雜草叢生”。（詩篇92:7）呢個一啲都唔出奇，因為今日好多人完全無視道德標準。喺噉樣嘅社會風氣之下，我哋點樣先可以“喺惡事上……做嬰孩”，“喺理解力上……長大成人”？（哥林多前書14:20）
2 我哋可以從呢篇課文嘅主題經文揾到答案。經文話：“尋求耶和華嘅，凡事都能領悟。”（箴言28:5）經文所講嘅“凡事”係指，我哋為咗取悦耶和華而需要符合嘅所有條件。箴言2:7,9都表達咗類似嘅思想。經文提到，耶和華“為正直人珍藏實用嘅智慧”。所以，正直嘅人能够“領悟正義、公正、公平，明白善道嘅全貌”。
3 挪亞、但以理同約伯都從上帝嗰度得到呢種智慧。（以西結書14:14）今日上帝嘅子民都一樣。你自己又點呢？你有冇“領悟”到，點樣做先可以取悦耶和華？關鍵在於要有確切嘅知識，即係正確認識耶和華上帝。所以，呢篇課文會討論以下三方面：（1）挪亞、但以理同約伯點樣深入認識耶和華；（2）對上帝有正確嘅認識點樣使佢哋得益；（3）我哋可以點樣培養佢哋噉樣嘅信心。
挪亞喺邪惡嘅世界與上帝同行
4．挪亞點樣深入認識耶和華？對耶和華有正確嘅認識點樣使佢得益？
4 挪亞點樣深入認識耶和華。從人類歷史初期開始，上帝嘅忠心子民一直以來主要通過三種方式認識上帝，就係觀察受造物，效法其他忠僕嘅榜樣，同埋體驗按照上帝嘅正義標準及原則生活而得到嘅福分。（以賽亞書48:18）通過觀察受造物，挪亞唔單止睇出耶和華上帝的確存在，仲睇出佢有好多我哋睇唔見嘅特質，例如“佢嘅永恆力量同神性”。（羅馬書1:20）結果，挪亞除咗相信上帝存在之外，佢仲對耶和華培養出堅强嘅信心。
5．挪亞點樣深入了解上帝對人類嘅旨意？
5 “要聽見信息先能够强化信心”。（羅馬書10:17）挪亞點樣認識耶和華呢？佢肯定從親人嗰度聽過好多關於耶和華嘅事。呢啲親人包括父親拉麥，同埋爺爺瑪土撒拉。拉麥係一個忠於上帝嘅人，而且佢出世嘅時候亞當仲在生。（請睇吓課文開頭嘅圖片）甚至挪亞爺爺嘅爺爺雅列，都有成366年嘅時間同挪亞一齊生活過。 *（路加福音3:36,37）通過呢啲親人同佢哋嘅妻子，挪亞了解到同上帝創造人類有關嘅事，知道上帝定意要正義嘅人類遍滿地球，亦都聽講過伊甸園嘅反叛事件。而反叛所帶嚟嘅後果，挪亞都可以親眼睇到。（創世記1:28;3:16-19,24）挪亞學到嘅每一件事都觸動佢嘅内心，推動佢事奉耶和華。（創世記6:9）
6,7．挪亞嘅信心點樣因希望而受到强化？
6 信心可以因希望而受到强化。挪亞呢個名嘅意思可能係“休息”或“安慰”。想像吓，當挪亞知道自己嘅名同全人類嘅希望有關嗰時，佢嘅信心一定大受强化！（創世記5:29）喺聖靈啟示下，拉麥話：“耶和華咀咒土地，加重我哋……手中嘅勞苦，但係我哋一定會因為呢個仔［挪亞］而得到安慰。”同過去嘅忠僕亞伯、以諾一樣，挪亞對上帝所賜嘅希望懷具信心，相信應許嘅“後代”會打碎蛇頭。（創世記3:15）
7 挪亞唔清楚創世記3:15預言嘅所有細節，不過佢肯定從呢個預言睇到得救嘅希望。另外，以諾亦都預告上帝會對一切惡人惡事施行審判，呢個信息同伊甸園嘅應許一致。（猶大書14,15）以諾宣布嘅信息肯定使挪亞充滿希望，强化咗佢嘅信心，而呢啲預言最終會喺哈米吉多頓嘅時候完全應驗！
8．正確認識上帝點樣使挪亞得到保護？
8 正確認識上帝點樣使挪亞得益。挪亞對上帝有正確嘅認識，所以佢對上帝有信心，亦都充滿上帝嘅智慧。信心同智慧保護咗挪亞，特别喺屬靈上可以使佢免受傷害。例如，挪亞“與上帝同行”，所以佢冇同嗰啲唔敬畏上帝嘅人做朋友。挪亞冇俾化身為人嘅邪靈呃到，而好多對上帝缺乏信心嘅人見到邪靈擁有超自然嘅能力就輕易上當，甚至仲崇拜佢哋。（創世記6:1-4,9）挪亞亦都知道上帝吩咐人類要生兒育女，遍滿地面。（創世記1:27,28）所以佢清楚知道，人間嘅女子同呢啲邪靈結合，係一種違反自然嘅錯誤行為。結果，佢哋結合之後生出異於常人嘅後代，證明挪亞嘅判斷一啲都冇錯。結果，上帝發出警告，話俾挪亞知佢會喺地上降下大洪水。挪亞對上帝發出嘅警告有信心，佢採取行動建造方舟，最終使全家人可以得救。（希伯來書11:7）
9,10．我哋可以點樣效法挪亞嘅信心？
9 我哋點樣培養挪亞噉嘅信心。關鍵係要研讀上帝嘅話語，認真沉思學到嘅知識，而且用呢啲知識嚟塑造同指引自己。（彼得前書1:13-15）噉樣，信心同上帝嘅智慧就會保護我哋，使我哋避開撒但嘅詭計，免受世界邪惡精神嘅影響。（哥林多後書2:11）世界嘅精神會助長暴力同不道德嘅行為，使人專注於肉體嘅慾望。（約翰一書2:15,16）呢種精神甚至會使靈性軟弱嘅基督徒無視上帝大日子嘅臨近。請留意，耶穌將我哋而家呢個時代同挪亞嘅時代做對比嗰時，佢特别想我哋留意嘅係，對屬靈嘅事漠不關心嘅態度所帶嚟嘅危險，而唔係暴力同不道德嘅行為。（請讀馬太福音24:36-39）
10 請問吓自己：“我嘅生活方式有冇表明自己真正認識耶和華？我嘅信心有冇推動自己除咗按照上帝嘅標準生活之外，仲積極傳講上帝嘅正義？”你嘅答案可以幫助你知道自己係咪都好似挪亞噉“與上帝同行”。
但以理喺信奉異教嘅巴比倫表現上帝嘅智慧
11．（甲）但以理受到父母點樣嘅教導？（乙）你想效法但以理嘅邊啲特質？
11 但以理點樣深入認識耶和華。顯然，但以理喺父母良好嘅教導下，自細就培養對耶和華同對上帝話語嘅愛。佢一生都持守住呢種愛，直到年老都仍然細心查考經文。（但以理書9:1,2）但以理書9:3-19記載咗一個充滿痛悔之情嘅禱告。我哋從呢個禱告可以睇出，但以理清楚知道耶和華點樣一直恩待以色列人。但以理的確同耶和華有親密嘅關係，深入認識上帝。你可以用啲時間閲讀同沉思呢個禱告，特别留意呢個禱告反映出但以理嘅為人係點嘅。
12-14．（甲）但以理喺邊方面表現出上帝嘅智慧？（乙）但以理表現勇氣忠於耶和華，點樣得到上帝嘅賜福？
12 正確認識上帝點樣使但以理得益。對一個忠心嘅猶太人嚟講，喺信奉異教嘅巴比倫生活係個巨大嘅挑戰。例如，耶和華同猶太人講：“你哋要為我放逐你哋所到嘅城求平安”。（耶利米書29:7）不過，耶和華亦都表明佢係要求專一愛戴嘅上帝，所以猶太人只可以效忠佢。（出埃及記34:14）對於以上兩個要求，但以理點樣保持平衡呢？上帝嘅智慧幫助佢明白，首先要服從嘅係耶和華，然後至係人間嘅統治者。幾百年之後，耶穌都教導同樣嘅原則。（路加福音20:25）
13 大流士王頒布咗一條禁令，規定所有人喺30日内唔可以向王以外嘅任何神或任何人禱告。但以理點樣做呢？（請讀但以理書6:7-10）佢其實可以幫自己揾藉口話：“三十日，好快就過啦！”不過，佢將崇拜耶和華睇得比王嘅命令更加重要。當然，佢都可以揾一個冇人留意到嘅地方私下禱告。不過但以理清楚知道，好多人都見過佢每日向上帝禱告，所以就算有生命危險，佢都唔想令人覺得喺崇拜嘅事上佢會妥協。
14 但以理表現勇氣，忠於耶和華。所以上帝賜福俾佢，施行奇迹將佢從獅子坑拯救出嚟。呢件事後來傳遍成個米底亞-波斯帝國，結果為耶和華作咗一次有力嘅見證。（但以理書6:25-27）
15．我哋可以點樣培養但以理噉嘅信心？
15 點樣培養但以理噉嘅信心。强化信心嘅關鍵唔係只係閲讀聖經，而係要真正“明白”上帝嘅話語。（馬太福音13:23）我哋想用耶和華嘅觀點嚟睇問題，就要透徹理解聖經嘅原則。所以，我哋要沉思讀過嘅内容。經常衷心禱告亦都非常重要，特别係我哋面對患難同挑戰嘅時候。如果我哋滿懷信心向耶和華禱告求取智慧同力量，佢就會慷慨噉將我哋所求嘅賜俾我哋。（雅各書1:5）
約伯無論情況好壞都實踐上帝嘅原則
16,17．約伯點樣深入認識耶和華？
16 約伯點樣深入認識耶和華。約伯唔係以色列人，不過佢係亞伯拉罕、以撒同雅各嘅遠親。耶和華向佢哋透露有關佢自己嘅事同佢對人類嘅旨意。約伯肯定通過某啲途徑認識好多關於耶和華嘅寶貴真理。（約伯記23:12）佢話：“我以前風聞你嘅事，而家就親眼睇見你。”（約伯記42:5）另外，耶和華指出，約伯正確談論有關上帝嘅事。（約伯記42:7,8）
我哋通過觀察受造物嚟了解上帝各種睇唔見嘅特質，就可以使信心得到强化。（請睇第17段）
17 約伯亦都通過觀察受造物認識上帝好多睇唔見嘅特質。（約伯記12:7-9,13）後來，以利户同耶和華都通過一啲受造物嚟提醒約伯，同上帝嘅偉大相比，人類係幾咁渺小。（約伯記37:14;38:1-4）耶和華所講嘅話打動咗約伯嘅心。佢謙卑噉同上帝講：“而家我知道你無所不能，冇乜嘢意念係你唔能够成就嘅。……［我］喺塵土同灰燼中懊悔。”（約伯記42:2,6）
18,19．約伯喺邊方面表明自己真正認識耶和華？
18 正確認識上帝點樣使約伯得益。約伯對上帝嘅原則有好好嘅洞悉力。佢確切認識上帝而且將有關嘅知識運用出嚟。請諗吓：約伯知道佢唔能够一邊聲稱愛上帝，但一邊又惡待同胞。（約伯記6:14）佢冇抬高自己，輕視其他人。無論對方係乜嘢身份，佢都關注佢哋，向人表現弟兄之情。佢話：“嗰位造我喺母腹中嘅，唔係亦都造咗我嘅僕婢咩？”（約伯記31:13-22）雖然約伯有好多財富，又有好高嘅聲望，但係佢冇變得驕傲，亦都冇認為自己比其他人更重要。喺呢方面，約伯同世上好多有財有勢嘅人真係完全唔同！
19 約伯發自内心拒絶任何形式嘅偶像崇拜。佢知道錯誤嘅崇拜，包括追求物質財富，都係背棄“在上嘅上帝”嘅行為。（請讀約伯記31:24-28）約伯將男女之間嘅婚姻關係視為神聖嘅，佢甚至同自己雙眼立約，唔會懷住淫念注視女性。（約伯記31:1）要記得，喺約伯嘅時代耶和華容許一個男子可以娶多個妻子。所以，如果約伯想嘅話，佢都可以娶多一個妻子。 *不過，佢顯然將上帝喺伊甸園設立嘅婚姻安排視為典範，一直按照呢個原則嚟生活。（創世記2:18,24）大約1600年之後，耶穌教導門徒喺婚姻方面要遵守同樣嘅原則。（馬太福音5:28;19:4,5）
20．認識耶和華同佢嘅標準點樣幫助我哋選擇有益嘅交往同娛樂？
20 我哋點樣培養約伯噉嘅信心。關鍵同樣係要對耶和華有正確嘅認識，而且根據確切嘅知識嚟指引自己生活嘅方方面面。詩篇執筆者大衛提到，“凡喜愛暴力嘅人，［耶和華］必恨惡”，佢亦都提醒人唔好同“狡詐嘅人”交往。（請讀詩篇11:5;26:4）呢啲經文點樣幫助你清楚明白上帝嘅觀點？喺娛樂交往同使用互聯網方面，上帝嘅觀點點樣幫助你作出明智嘅選擇？你嘅答案可以幫助你睇出自己對耶和華嘅認識有幾深。如果我哋唔想受到今日呢個又複雜又邪惡嘅世界影響，就一定要鍛鍊自己嘅辨識力，學識辨别是非對錯，分辨智慧同愚昧。（希伯來書5:14；以弗所書5:15）
21．我哋點樣做就可以“凡事”取悦耶和華？
21 因為挪亞、但以理同約伯全心尋求耶和華，所以耶和華幫助佢哋“領悟”到點樣先可以“凡事”取悦佢。佢哋嘅榜樣證明，用耶和華嘅方式行事為人可以擁有成功嘅人生。（詩篇1:1-3）所以，請你問吓自己：“我係咪好似挪亞、但以理同約伯噉深入認識耶和華呢？”我哋好感激耶和華俾機會我哋認識佢。隨住屬靈嘅亮光越照越明，我哋可以更加全面認識耶和華！（箴言4:18）所以，我哋要深入研讀同認真沉思上帝嘅話語，亦都要祈求上帝賜聖靈俾我哋。噉樣，我哋就可以同天父耶和華有更親密嘅關係，而且喺今日呢個不敬虔嘅世界，可以運用洞悉力同上帝嘅智慧行事為人。（箴言2:4-7）
^ 5段 挪亞爺爺嘅父親以諾亦都“一直與上帝同行”。不過喺挪亞出世之前，上帝已經“將佢帶走”。（創世記5:23,24）
