憐恤“各種各樣嘅人”
耶穌教導門徒點樣傳講好消息嘅時候，佢知道唔係所有人都鍾意聽王國嘅信息。（路加福音10:3,5,6）我哋做傳道工作嗰時，可能會遇到一啲粗暴無禮嘅人。佢哋嘅反應使我哋好難向佢哋表現憐恤。
一個有憐恤之心嘅人，見到其他人需要幫助，就會體恤佢哋並樂意伸出援手。不過，如果我哋開始對傳道對象失去憐恤之心，噉我哋可能亦都開始失去我哋嘅熱心，唔能够有效噉傳道。正如一團火得到更多氧氣就會越燒越旺，我哋不斷培養憐恤就會更加熱心參與傳道工作！（帖撒羅尼迦前書5:19）
喺唔容易應付嘅情況下，我哋可以點樣培養憐恤之心？接住落嚟，我哋會討論三個值得效法嘅榜樣——耶和華、耶穌同使徒保羅。
效法耶和華，表現憐恤
幾千年來，耶和華因為自己嘅聖名受到羞辱而一直保持忍耐。但係，“忘恩負義嘅惡人，佢都善待”。（路加福音6:35）耶和華係仁慈嘅上帝，因為佢耐心對待所有人，希望“各種各樣嘅人”都能得救。（提摩太前書2:4）雖然上帝憎恨惡事，不過喺佢眼中，人係好寶貴嘅，佢唔想任何人失去生命。（彼得後書3:9）
耶和華知道撒但成功蒙騙咗好多人。（哥林多後書4:3,4）呢啲不信嘅人因為自細被灌輸好多錯誤嘅道理同思想，所以唔容易接受真理。耶和華好想幫助呢啲人。我哋點知道呢？
請考慮吓耶和華對古代尼尼微人嘅睇法。雖然佢哋兇殘成性，但係耶和華對約拿講：“呢座尼尼微大城，入面有超過十二萬嘅人連左手右手都分唔清，……唔通我唔應該顧惜咩？”（約拿書4:11）耶和華憐憫呢啲唔認識佢嘅尼尼微人，所以差派約拿向佢哋發出警告。
我哋同耶和華一樣，好重視其他人嘅生命。即使一個人並冇馬上對聖經嘅信息作出回應，我哋仲係可以效法耶和華，努力嘗試幫助佢認識真理。
效法耶穌，表現憐恤
耶穌同天父一樣，見到嗰啲喺屬靈上飢渴嘅人，“就憐憫佢哋，因為佢哋俾人剝削，四處流離，好似冇牧人嘅綿羊一樣”。（馬太福音9:36）耶穌睇出，佢哋喺靈性上得唔到飽足嘅背後原因係，宗教領袖教導佢哋錯誤嘅道理，而且惡待佢哋。雖然耶穌知道好多人會因為各種原因而唔接受真理，佢依然“教導佢哋好多事”。（馬可福音4:1-9）
唔好因為對方反應冷淡就感到灰心
一個人對聖經真理嘅態度可能會因為情況而改變
如果有人唔想聽我哋傳講嘅信息，我哋就唔應該只係睇表面，而係要諗吓點解對方有噉嘅反應。有啲人對聖經同基督教有負面嘅睇法，係因為佢哋睇到一啲自稱基督徒嘅人做壞事；有啲人係因為聽到對見證人嘅錯誤宣傳；有啲人就因為擔心自己接受我哋嘅信息會被人取笑。
有啲人對王國信息反應冷淡，可能係因為佢哋曾經遭遇不幸，喺感情上受過創傷。一個叫金美嘅特派傳道員話：“喺我哋嘅某啲地區，好多人因為戰爭而變得一無所有。佢哋覺得前路茫茫，變得灰心沮喪，對人失去信心。喺呢度，經常有人想阻止我哋傳道。甚至有一次，我喺傳道嗰陣受到襲擊。”
遇到噉樣嘅情況，金美點樣繼續對人表現憐恤呢？佢話：“我喺受到惡待嘅時候沉思箴言19:11。經文話：‘人洞悉事理，就唔會輕易發怒’。謹記地區嘅人嘅背景，幫助我對佢哋培養憐恤。我喺傳道嗰時遇到嘅人唔係個個都態度惡劣嘅。我哋喺嗰個地區都揾到一啲好好嘅續訪。”
我哋可以問吓自己：“假如我唔認識真理，耶和華見證人向我傳道嗰時，我會有乜嘢反應？”如果有人經常同我哋講耶和華見證人嘅壞話，我哋會點諗呢？喺噉嘅情況下，我哋可能都會對見證人有唔好嘅態度，需要對方向自己表現憐恤。耶穌話，我哋希望人點樣對待我哋，我哋就要點樣對待人。所以，即使唔容易，我哋都要努力理解對方嘅感受，向佢哋表現耐心。（馬太福音7:12）
效法保羅，表現憐恤
即使有啲人猛烈反對保羅，保羅依然向呢啲人表現憐恤。點解？佢冇忘記以往自己係點樣嘅人。佢話：“我之前褻瀆上帝，迫害人，凌辱人，不過後來得蒙慈悲，因為我先前無知，由於不信先至做出呢啲事。”（提摩太前書1:13）佢知道，耶和華同耶穌向佢表現咗極大嘅慈悲。佢明白點解有啲人要阻止佢傳道，因為佢曾經都同佢哋有一樣嘅諗法。
有時，保羅會遇到一啲深受錯誤教義影響嘅人。佢有咩反應？使徒行傳17:16話，保羅喺雅典嘅時候，“睇見滿城都係偶像，心裏激動”。不過，保羅就用偶像作為話題做咗一個美好嘅見證。（使徒行傳17:22,23）佢調整自己嘅傳道方式，向唔同背景嘅人傳道，“無論如何都要救啲人”。（哥林多前書9:20-23）
我哋向嗰啲反應冷淡或者相信錯誤道理嘅人傳道嗰陣，可以效法保羅，向佢哋“傳講美事嘅好消息”。（以賽亞書52:7）一個叫多蘿茜嘅姊妹話：“喺我哋嘅地區，好多人認為上帝係一個又挑剔又苛刻嘅神。我首先會稱讚佢哋相信上帝，然後請佢哋留意聖經提到上帝有邊啲仁愛嘅特質以及佢對未來嘅應許。
“總要以善勝惡”
隨住呢個制度嘅終結臨近，我哋會睇見人嘅性情變得“越來越壞”。（提摩太後書3:1,13）我哋唔應該因為世人有噉樣嘅態度就失去喜樂，唔再對人表現憐恤。耶和華會賜力量俾我哋，使我哋能够“以善勝惡”。（羅馬書12:21）一個叫潔西卡嘅先驅姊妹話：“我經常遇到一啲高傲嘅人。佢哋嘲笑我哋同埋我哋傳講嘅信息。有時都幾煩嘅。我同人開始交談之前會作一個默禱，祈求上帝幫助我用佢嘅觀點嚟睇對方。噉樣做，使我唔再只係注重自己嘅感受，而係會諗吓點樣幫助對方。”
我哋繼續尋找嗰啲秉性適宜得永生嘅人
隨住時間過去，有啲人會接受我哋嘅幫助，願意學習聖經真理
傳道嘅時候，我哋應該盡力鼓勵弟兄姊妹。潔西卡話，同弟兄姊妹一齊傳道嗰陣，如果有唔愉快嘅經歷，佢會盡量唔去諗呢件事，而係轉換話題，例如幫助同工積極噉諗吓，堅持傳道會有乜嘢美好結果。
耶和華好清楚我哋傳道嗰陣遇到嘅挑戰。佢睇到我哋效法佢向人表現慈悲，一定感到好開心！（路加福音6:36）當然，耶和華唔會永無止境噉表現憐恤。我哋確信，佢會喺最適當嘅時候毁滅呢個邪惡制度。呢一日到嚟之前，我哋要繼續迫切噉向人傳道。（提摩太後書4:2）願我哋繼續熱心執行傳道職務，對“各種各樣嘅人”表現憐恤。
