Gran tribulación nga ti tiempu ra ziuu stale yuuba’ ni qué huayuu dxi gu’ya’ binni guidxilayú. Ca profecía sti’ Biblia ruzeete’ zazaaca ni lu ca «últimu dxi» o «tiempu gueeda fin» (2 Timoteo 3:1; Daniel 12:4). Marcos 13:19 ná: «Ziuu stale yuubaʼ ca dxi que. Dede dxi bizáʼ Dios guiráʼ cosa hasta nagasi, qué huayuu dxi chuʼ yuubaʼ casi laani, ne qué ziuuruʼ dxi gaca ni sti biaje» (Daniel 12:1; Mateo 24:21, 22).

¿Xi zazaaca lu gran tribulación?

•   Zanitilú guirá’ ca religión falsu. Nagueendaca zanitilú guirá’ ca religión falsu (Apocalipsis 17:1, 5; 18:9, 10, 21). Ora gunitilú ca gobiernu ni nuu lu Naciones Unidas guirá’ ca religión falsu, zuni cumplirca’ ni ma’ gudixhe ique Dios gaca (Apocalipsis 17:3, 15-18). a

•   Zucaalúcabe religión ni dxandí’. Ti grupu de guidxi ni bi’ya’ Ezequiel lu ti visión ni lá’ «Gog de guidxi Magog», zuyúbica’ gunitiluca’ religión ni dxandí’. Peru qué zudii Dios lugar gunitilúcabe xquidxi (Ezequiel 38:1, 2, 9-12, 18-23).

•   Zaca juzgar ca ni nabani lu Guidxilayú. Zuni juzgar Jesús binni ne «zabeechube caadxi binni lade xcaadxi, cásica ribeechú pastor dendxu’ lade chiva» (Mateo 25:31-33). Ne zúnibe ni ra gú’yabe tuu pe’ nga gucané ca bí’chibe, ca ni chiguni mandarnebe guibá’ (Mateo 25:34-46).

•   Zadagulisaa guirá’ ca ni chiguni mandarné Jesús lu Reinu sti’. Guirá’ ca ni bibí para guni mandarneca’ Jesús guibá’, zaluxe xquendanabánica’ lu Guidxilayú ri’ ne ziásaca’ para guibánica’ guibá’ (Mateo 24:31; 1 Corintios 15:50-53; 1 Tesalonicenses 4:15-17).

•   Zedandá Armagedón. Ruzeete’ Biblia naca Armagedón ti guerra ni chigaca lu «dxi ro’ sti’ Dios ni jma napa poder» ne laaca riete ni casi «dxi sti’ Jehová» (Apcalipsis 16:14, 16; Isaías 13:9; 2 Pedro 3:12). Ca binni ni qué ñuni ni jneza zuni juzgar Cristu laaca’ ne zanitiluca’ lu Armagedón (Sofonías 1:18; 2 Tesalonicenses 1:6-10). Laaca zanitilú sistema políticu ni nuu lu guidxilayú ri’, laani nga ni ruzeete’ Biblia casi ti bestia salvaje ni napa gadxe ique (Apocalipsis 19:19-21).

¿Xi zazaaca guiluxe si gran tribulación?

•   Zadeguyoo Binidxaba’ ne ca demonio sti’. Ti ángel ni napa stale poder zulaa Binidxaba’ ne ca demonio sti’ ndaani’ ti «abismo» (Apocalipsis 20:1-3). Racá ma’ qué zanda gúnicabe gasti’, purti’ casi ñaca ma’ gúticabe. Nga runi, ora guiaba Binidxaba’ ndaani’ abismo ca ma’ qué zanda di’ guiree para quite’ binni (Apocalipsis 20:7).

•   Zuzulú ti mil iza. Óraca nga zuzulú zuni mandar Reinu sti’ Dios pur ti mil iza ne zedaneni stale ndaaya’ para binni guidxilayú (Apocalipsis 5:9, 10; 20:4, 6). Biblia ruzeete’ zalá «stale binni» lu gran tribulación ne laacabe nga zuuyacabe ra guzulú ti mil iza ca (Apocalipsis 7:9, 14; Salmo 37:9-11).