¿Tuu nga ca ni cheʼ guibáʼ?
Ni ricabi Biblia
Ma’ gulí Dios caadxi xpinni Cristu fiel para guibánicaʼ guibáʼ despué de gáticaʼ (1 Pedro 1:3, 4). Despué de maʼ gulí Dios laacabe la? caquiiñeʼ gápacabe fe ne gúnicabe ni jneza, purtiʼ pa coʼ la? zuníticabe herencia stícabe de guibánicabe guibáʼ (Efesios 5:5; Filipenses 3:12-14).
¿Xi zúnicabe racá ya?
Zuninécabe Jesús dxiiñaʼ, zácacabe rey ne sacerdote ne zúnicabe ni ti mil iza (Apocalipsis 5:9, 10; 20:6). Ziuucabe guibáʼ lu Reinu stiʼ Dios (ni runibiáʼ Biblia casi «guibáʼ cubi») ne zuni mandárcabe binni (o «guidxilayú cubi»). Zuni ca rey riʼ stipa guibani binni jneza cásica modo gudixhe ique Dios ni (Isaías 65:17; 2 Pedro 3:13).
¿Panda binni cheʼ guibáʼ yaʼ?
Biblia ná 144,000 binni ziásacaʼ de lade gue’tu’ para checaʼ guibáʼ (Apocalipsis 7:4). Lu ti visión biiyaʼ apóstol Juan «zuhuaa Dendxuhuiiniʼ que [Jesucristu ni biasa de lade gue’tu’] lu dani Sion, ne zuhuaanebe 144,00» (Apocalipsis 14:1-3; Juan 1:29; 1 Pedro 1:19). Dani Sion runi representar ni autoridad maʼ bidii Dios Jesús ne 144,000 para guni mandárnecaʼ laabe guibáʼ (Salmo 2:6; Hebreos 12:22).
«Ca ni guniʼné Dios ne ca ni gulí» para guni mandárnecaʼ Cristu lu Reinu stiʼ Dios laaca runibiáʼcabe laacaʼ casi «grupuhuiiniʼ de dendxuʼ» (Apocalipsis 17:14; Lucas 12:32). Ndiʼ riníʼ huaxiéʼ binni maʼ gulí Dios para guibánicaʼ guibáʼ ne jma stale nga ca xcaadxi dendxuʼ (Juan 10:16).
Ni cadi dxandíʼ ni riníʼ ique binni de ca ni cheʼ guibáʼ
Ni runi cré caadxi binni: Guiráʼ binni nacha’hui’ rié guibáʼ.
Ni dxandíʼ: Ma’ biʼniʼ prometer Dios zabani stale binni nacha’hui’ lu Guidxilayú riʼ (Salmo 37:11, 29, 34)
Jesús guníʼ «nin ti hombre qué huaguiʼbaʼ guibáʼ» (Juan 3:13). Ora guníʼ Jesús ca diidxaʼ riʼ la? bisihuinni qué ñé diʼ ca binni nacha’hui’ casi Abrahán, Moisés, Job ne David guibáʼ (Hechos 2:29, 34). Laacaʼ gúpacaʼ esperanza guiásacaʼ de lade gue’tu’ para guibánicaʼ lu Guidxilayú (Job 14:13-15).
Biblia ruzeeteʼ ziuu «primé resurrección» (Apocalipsis 20:6). Lu resurrección riʼ nga nuu ca ni cheʼ guibáʼ. Laaca ziuu sti resurrección, peru maʼ raríʼ lu Guidxilayú riʼ.
Biblia rusiidiʼ ora guni mandar Reinu stiʼ Dios «maʼ qué ziuuruʼ guendaguti» (Apocalipsis 21:3, 4). Ca diidxaʼ riʼ rusihuinni ca ni maʼ qué ziuuruʼ guendaguti raríʼ lu Guidxilayú, ne cadi guibáʼ purtiʼ racá gastiʼ diʼ guendaguti.
Ni runi cré caadxi binni: Cada binni zanda cuí pa zabani guibáʼ o lu Guidxilayú riʼ.
Ni dxandíʼ: Dios si nga nanna tuu nga ca xpinni Cristu fiel ni zacaa premiu guibani guibáʼ (Filipenses 3:14). Ne cadi ti binni nga ribí paraa chiguibani (Mateo 20:20-23).
Ni runi cré caadxi binni: Ca binni ni chiguibani lu Guidxilayú riʼ nga ca binni ni qué nicaa privilegiu guibani guibáʼ.
Ni dxandíʼ: Ca binni ni chiguibani raríʼ lu Guidxilayú rabi Dios laacaʼ «ca binni xquidxeʼ», «ca binni ni maʼ gulieeʼ» ne «ca binni ni maʼ guluu Jehová ndaayaʼ» (Isaías 65:21-23). Zuni cumplir ca binni riʼ ni maca gudixhe ique Dios: guibani binni perfectu ndaaniʼ guidxilayú riʼ ne gúnicaʼ ni ti paraísu (Génesis 1:28; Salmo 115:16; Isaías 45:18).
Ni runi cré caadxi binni: Númeru 144,000 ni riete lu Apocalipsis zeeda gácani ti númeru simbólicu.
Ni dxandíʼ: Neca riete númeru simbólicu lu libru riʼ, caadxi de laacani dxandíʼ ca ni. Ti ejemplu nga ca «12 nombre stiʼ 12 apóstol stiʼ Dendxuhuiiniʼ» (Apocalipsis 21:14). Guidúʼyanu xcaadxi prueba ni rusihuinni dxandíʼ nga númeru 144,000.
Lu Apocalipsis 7:4 riete «panda binni gucuá sellu [o panda binni chiguibani guibáʼ]: 144,000», de racá riete «zuhuaa stale binni (o ti gran muchedumbre) delante de trono ne delante Dendxuhuiiniʼ que dede guirutiʼ ñanda nugabaʼ laacaʼ». Laaca zalá «gran muchedumbre» riʼ (Apocalipsis 7:9, 10, nota). Pa ñaca númeru 144,000 ca simbólicu ne niníʼ ni de stale binni la? maʼ qué ñaca guiropaʼ grupu riʼ gadxé. a
Ca binni ni nuu lu grupu de 144,000 laaca «bixuíʼcabe lade binni guidxilayú para Dios» (Apocalipsis 14:4). Ndiʼ riníʼ cadi ti grupu naro’ba’ nga laacabe, sínuque ti grupuhuiiniʼ. Nga runi maʼ gulí Dios laacabe ne Cristu para guni mandarcaʼ dede guibáʼ guiráʼ xixé binni ni chiguibani lu Guidxilayú riʼ (Apocalipsis 5:10).
a Sicaríʼ bicaa Robert Thomas de númeru 144,000 ni riete lu Apocalipsis 7:4: «Lu versículo riʼ caníʼ ni de ti númeru de binni si, ne lu Apocalipsis 7:9 caníʼ ni de stale binni. Pa nininu zeeda gaca númeru riʼ simbólicu la? maʼ qué ñanda nininu biaʼsi peʼ nga ca xcaadxi númeru ni riete lu libru riʼ» (Revelation 1-7: An Exegetical Commentary [Comentario exegético de Revelación 1-7], yaza 474).
Laaca zándaca ziuuláʼdxiluʼ ca ndiʼ
ESSENTIAL BIBLE TEACHINGS
Xii nga Reinu stiʼ Dios
Ca dxi bicheeche Jesús diidxaʼ, jma guníʼ de Reinu stiʼ Dios que de sti tema. Maʼ stale iza huanabaʼ binni gueeda Reinu ca.
CA NI RUSIIDIʼ BIBLIA
Biiyaʼ ximodo ridúʼndanedu binni Biblia
Gunabaʼ guʼndané tuuxa lii sin quíxeluʼ.