Jesús beeda gulá ca binni ruzuubaʼ diidxaʼ ra bidii xquendanabani casi sacrificiu (Mateo 20:28). Nga runi Biblia ná laabe beeda gulabe binni guidxilayú (1 Juan 4:14). Ne laaca ná ni «laasi be zanda ulá be laanu, purti iruti ru stobi ndaani guidxilayú ni huaguixhe Dios ulá binni, sínuque laasi be» (Hechos 4:12).

 Guti Jesús pur guiráʼ ni napa fe laa (Hebreos 2:9; Juan 3:16). Despué, gundisaʼ Dios laabe de lade gueʼtuʼ, ne biguétabe guibáʼ casi ti binni de espíritu (Hechos 3:15). Jesús, dede guibáʼ «zanda ulá be cani uchiña be ra nuu Dios ne ma qué zanitilú caʼ, purti qué ziuu dxi gati be, ne nuu be para iníʼ né be Dios pur laacaʼ» (Hebreos 7:25).

¿Xiñee caquiiñenu guiníʼ Jesús pur laanu?

 Guiranu nácanu binni ruchee (Romanos 3:23). Pecadu ca riné ni laanu lu guendaguti ne pur laani raca nagana guidxíñanu Dios (Romanos 6:23). Peru Jesús zeeda gaca casi tuuxa ni «caníʼ né Dios pur laanu» o ti abogadu para cani gapa fe lu sacrificiu stibe (1 Juan 2:1). Cumu bidii Jesús xquendanabani pur laanu la? zanda guiniʼbe pur laanu nezalú Dios para gucaadiaga ca oración stinu ne guni perdonar ca pecadu stinu (Mateo 1:21; Romanos 8:34). Dios ricabi ca oración stiʼ Jesús purtiʼ riuuláʼdxibe cani rinabaʼ laabe. Biseendabe Xiiñibe lu Guidxilayú «para ilá binni pur Iaa» (Juan 3:17).

¿Ñee caquiiñeʼ si guni crenu Jesús para guilanu la?

 Coʼ. Neca caquiiñeʼ guni crenu Jesús para guilanu, caquiiñeʼ gúninu xcaadxi cosa (Hechos 16:30, 31). Biblia ná: «Cásica qué iquiiñe xcuerpu nu sin espíritu stinu la? zaqueca nga qué iquiiñe modo runi cre nu pa qué guni nu jneza» (Santiago 2:26). Para guilanu caquiiñeʼ:

•   Guizíʼdinu de Jesús ne de Bixhózebe, Jehová (Juan 17:3).

•   Gápanu fe laacabe (Juan 12:44; 14:1).

•   Gusihuínninu nápanu fe ra gúninu ni ná ca mandamientu stibe (Lucas 6:46; 1 Juan 2:17). Jesús guníʼ cadi guiráʼ tu gabi laa «Señor» nga zalá, sínuque cani guni si ni ná Bixhózebe (Mateo 7:21).

•   Cadi gusaana de gusihuínninu nápanu fe neca guidxagalunu intiica guendanagana. Jesús guníʼ: «Tu qué ixhacalaʼdxi dede dxi iluxe irá ni la? zalá» (Mateo 24:13).