Éxodo 24:1-18
24 De raqué gúdxibe Moisés: «Gudxiʼbaʼ ra nuu Jehová ne dané Aarón, Nadab, Abihú ne 70 hombre huaniisi* de Israel, ne dede zitu laguzuxibi.
2 Moisés si zanda guidxiña ra nuu Jehová. Xcaadxi hombre ca cadi naquiiñeʼ guidxíñacaʼ, ne cadi naquiiñeʼ quibaʼ guidxi ca né laabe».
3 Óraque yetidxi Moisés guidxi que guiráʼ ni maʼ guníʼ Jehová ne guiráʼ ca decisión* stibe. Ne guidubi guidxi que bicabi: «Nuudu dispuestu gúnidu guiráʼ ni maʼ guníʼ Jehová».
4 Ngue runi bicaa Moisés guiráʼ ni guníʼ Jehová. De raqué biásabe tempranu ne bicuibe ti altar ñee dani que ne gundísabe 12 columna biaʼ ca 12 tribu stiʼ Israel.
5 Despué gulibe hombre joven de Israel, ne laacaʼ bidiicaʼ ofrenda ni riaʼquiʼ ne biiticaʼ toro para gudiicaʼ laacame casi sacrificiu de paz para Jehová.
6 Óraque bitopa Moisés galaa de rini stícame ndaaniʼ caadxi tazón ne birúbabe xcalaa que lu altar que.
7 Últimu la? gucuaabe libru ra cá acuerdu ni bíʼnicabe ne biindabe ni reciu para gunadiaga guidubi guidxi que ni. De raqué, guníʼ ca binni que: «Nuudu dispuestu gúnidu guiráʼ ni maʼ guníʼ Jehová ne zuzúʼbadu stiidxabe».
8 Ngue runi biruba Moisés rini que luguiáʼ guidxi que, ne gúdxibe laacaʼ: «Ndiʼ nga rini stiʼ acuerdu ni maʼ biʼniʼ Jehová né laatu casi ná ca diidxaʼ ni zeeda raríʼ».
9 De raqué gudxiʼbaʼ Moisés, Aarón, Nadab, Abihú ne 70 hombre huaniisi de Israel lu dani que
10 ne biiyacabe Dios stiʼ Israel. Ra nuxhatañeebe que ruluiʼni ti pisu de guié zafiro, nayáʼnini casi guibáʼ.
11 Ne qué ñuninabe ca hombre risaca stiʼ Israel riʼ. Laacabe biiyacabe Dios ni dxandíʼ lu ti visión, ne gudócabe ne güéʼcabe.
12 Yanna, gudxi Jehová Moisés: «Gudxiʼbaʼ ra nuaaʼ lu dani ca ne biaana racá. Chigudieeʼ lii ca tabla de guié ne ca ley ne ca mandamientu ni chigucaaʼ para gusiideʼ guidxi riʼ».
13 Para guyuu Moisés listu ne Josué, hombre ni racané laabe. Ne gudxiʼbaʼ Moisés lu dani stiʼ Dios ni dxandíʼ.
14 Peru ante la? gúdxibe ca hombre huaniisi que: «Lacueza raríʼ dede ora guibiguétadu. Ziaana Aarón ne Hur ra nuutu, laché ra nuucabe pa gapa tuuxa xiixa guendanagana ni caquiiñeʼ gaca juzgar».
15 De raqué gudxiʼbaʼ Moisés lu dani que, ne nuchii za que ni.
16 Qué nixeleʼ poder stiʼ Jehová de lu dani Sinaí, ne bichii za que ni xhoopaʼ gubidxa. Lu gadxe gubidxa que, guniʼné Dios Moisés dede lu za que.
17 Ne ca israelita ni cayuuyadxí lu dani que, biiyacaʼ poder stiʼ Jehová casi ti bele ni cunitilú ique dani que.
18 Óraque guyuu Moisés lade za que ne gudxíʼbabe lu dani que, ne biaanabe raqué 40 dxi ne 40 gueelaʼ.
