Gálatas 5:1-26
5 Maʼ libre laanu purtiʼ biʼniʼ Cristu laanu libre. Nga runi, laguzuhuaa dxiichiʼ ne cadi gudiitu lugar chuʼ xiixa ni guni laatu esclavu sti biaje.*
2 Laguuyaʼ, naa nga Pablo, naa piaʼ cayabeʼ laatu: pa gaca circuncidartu la?* maʼ qué zaquiiñeʼ ni bi’ni’ Cristu.
3 Ne sti biaje ca chitidxeʼ ndiʼ guiráʼ hombre ni gaca circuncidar: napa xidé gúnicaʼ guiráʼ ni ná Ley.
4 Laatu, ca ni racalaʼdxiʼ gaca nachaʼhuiʼ nezalú Dios ra guni ni ná ley, maʼ bixéletu de Cristu. Maʼ bixéletu de guendanachaʼhuiʼ stiʼ.*
5 Peru laanu, pur mediu de espíritu, cabézanu pa ñanda si mápeca ñuuyabe laanu casi binni nachaʼhuiʼ pur fe stinu.
6 Yanna, cumu maʼ nuunu tobi si* né Cristu Jesús la? maʼ ngueca si rudii ni pa gaca circuncidar tuuxa o pa coʼ. Ni risaca nga fe ni rucaa laanu gannaxhiinu.
7 Dxiqué canazatu jneza.* Yanna, ¿tu bicueeza laatu de chinándatu ni dxandíʼ pue?
8 Modo riníʼ íquetu riʼ cadi zeeda ni de Dios ni gulí laatu.
9 Caadxi si levadura runi fermentar guidubi naca cuba pan.
10 Napaʼ confianza nuutu tobi si né Señor ne qué zaníʼ íquetu sti modo. Peru binni ni caguu problema ládetu zacaa castigu ni runi merecer, tutiica laa.
11 Yanna, hermanu caʼ, pa ñaca canagusiideʼ naquiiñeʼ gaca circuncidar binni, ¿xiñee canazanándaruʼ* binni naa pue? Pa ñaca zacá cayuneʼ, maʼ qué risaca ni rusiideʼ ora rinieeʼ guti Jesús lu ti yaga.*
12 Ne ca hombre ni racalaʼdxiʼ guchenda laatu, ñacalaʼdxeʼ ñúnicaʼ laacaʼ eunuco.*
13 Hermanu caʼ, gulí Dios laatu para gácatu libre. Peru cadi iquiiñetu libertad stitu casi ti oportunidad para gúnitu ni ná ca deseu stiʼ cuerpu stitu, sínuque lagusihuinni nadxiisaatu ra gacanetu stobi.*
14 Purtiʼ raca cumplir guidubi naca Ley né mandamientu riʼ: «Gunnaxhii prójimo stiluʼ cásica nadxiiluʼ lii».
15 Peru pa ridindesaatu ne runinasaatu laatu la?* laguuyagá qué chigunitilusaatu laatu.
16 Peru cayabeʼ ndiʼ laatu: cadi gusaana de guibánitu casi ná espíritu ne zacá qué zúnitu nin ti deseu stiʼ cuerpu stitu.
17 Purtiʼ cuerpu ca, pur ca deseu stini, nuuni contra espíritu ne nuu espíritu contra cuerpu ca. Cumu nuudinde guiropaʼ ni la? qué randa rúnitu ca cosa ni ñuuláʼdxitu ñúnitu.
18 Yanna, pa rinándatu ni ná espíritu la? maʼ cadi naquiiñeʼ chinándatu ni ná ley.
19 Rihuinni dxíchica gunáʼ ca deseu stiʼ xcuerpu binni: guni cometer pecadu sexual,* guni cosa yuudxuʼ,* guni cosa malu sin guituí lú,*
20 guni adorar bidóʼ, guni practicar espiritismo,* gaca nanalaʼdxiʼ stobi, guyubi pleitu, guidaa xiana,* guidxiichi nagueenda, guni discutir, uguu división, guindisaʼ secta,*
21 gapa envidia, xhudxi, chuʼ lu ca saa ra runi binni ni cadi jneza* ne guni xcaadxi cosa casi laacani. Chitidxeʼ ni laatu cásica maca gudixhenaʼyaʼ laatu dxiqué, qué ziuu ca ni runi practicar ca cosa riʼ lu Reinu stiʼ Dios.*
22 Peru, binni ni napa ca cualidad stiʼ espíritu la?* rannaxhii,* nuu nayecheʼ,* nexhedxí ladxidóʼ,* napa paciencia, amable laa,* nachaʼhuiʼ,* napa fe,
23 nadóʼ, rucueeza laca laa.* Tu guni ca cosa riʼ la? qué zucheené ley.
24 Ne laaca maʼ biiti ca xpinni Cristu Jesús guiráʼ ni riuuláʼdxicaʼ ne ca deseu stiʼ cuerpu sticaʼ.*
25 Pa nabáninu modo ná espíritu la? laaca naquiiñeʼ sanu jneza casi ná espíritu.
26 Cadi gácanu orgulloso, cadi maʼ cayuni competirnu entre laanu ne cadi chuʼ envidia ládenu.
Nota
^ O «uguucabe laatu xaʼnaʼ ayubu stiʼ esclavitud».
^ O «unidu».
^ Lit. «ziguxooñetu jneza».
^ O «dede yanna cayuni perseguir».
^ Lit. «ñuni castrarcaʼ laacaʼ». Zacá maʼ qué ñanda ñuni cumplircaʼ ley ni runi defendercaʼ.
^ O «lagaca esclavu stiʼ stobi purtiʼ nadxiitu laa».
^ O «Peru pa nisi cayoyaatu ne cuxuuxetu xcompañérutu la?».
^ O «guni inmundicia», «guni impureza».
^ O «gapa celo».
^ O «fiesta descontrolada».
^ Lit. «fruto stiʼ espíritu nga».
^ O «amor».
^ O «gozo».
^ O «paz».
^ O «napa benignidad».
^ O «bondad».
^ O «napa autodominio».
^ Lit. «maʼ bicaacaʼ beelaʼ né ca pasión ne ca deseu stini lu ti yaga».
