Génesis 1:1-31
1 Dxi bizulú guiráʼ cosa,* bizáʼ Dios guibáʼ ne guidxilayú.
2 Dxiqué, qué gapa guidxilayú forma ne gastiʼ nuu ndaanini. Nuseeguʼ guelacahui ca nisa ziáʼ* nuu luni, ne caniibi stipa* stiʼ Dios cheríʼ chericaʼ luguiáʼ ca nisa que.
3 Óraque guníʼ Dios: «Chuʼ biaaniʼ». Ne guyuu biaaniʼ.
4 Biiyaʼ Dios guizáʼ galán biaaniʼ, ne bixhélebe biaaniʼ de guelacahui.
5 Gulee lá Dios biaaniʼ que Ridxíʼ, ne guelacahui que Gueelaʼ. Ne guyuu huadxí ne siadóʼ. Ngue nga primé dxi.
6 Óraque guníʼ Dios: «Chuʼ ti espaciu* galahuiʼ de ca nisa ca, guixeleʼ ti nisa de sti nisa».
7 Ne guluu Dios ti espaciu, bixhélebe ca nisa ni nuu xagueteʼ de ca nisa ni nuu luguiáʼ de espaciu ca. Nga nga ni bizaaca.
8 Gulee lá Dios espaciu ca Guibáʼ. Ne guyuu huadxí ne siadóʼ. Ngue nga guiropa dxi.
9 Óraque guníʼ Dios: «Chuʼ ca nisa ni nuu xagueteʼ guibáʼ ti lugar si ne guihuinni layú ra nabidxi». Ne zaqué guca ni.
10 Gulee lá Dios layú ra nabidxi que Guidxilayú, ne ca nisa que Nisadóʼ. Ne biiyaʼ Dios guizáʼ galán ni.
11 Óraque guníʼ Dios: «Guindani guixi lu guidxilayú, yagahuiiniʼ ni napa semiá ne yaga cuananaxhi de guiráʼ clase, ne gudiicani cuananaxhi ne biidxiʼ». Ne zaqué guca ni.
12 Bizulú gundani guixi lu guidxilayú, yagahuiiniʼ napa semiá ne yaga ni rudii cuananaxhi ne biidxiʼ, guirácani según tipu stícani. Ne biiyaʼ Dios guizáʼ galán ni.
13 Ne guyuu huadxí ne siadóʼ. Ngue nga guionna dxi.
14 Óraque guníʼ Dios: «Guihuinni ca ni guzaaniʼ,* guihuínnicani guibáʼ, para chuʼ ridxíʼ ne huaxhinni, ne zaquiiñecani para guihuinni ca estación, dxi ne iza.
15 Zaquiiñecani casi biaaniʼ guibáʼ para guzaanicani lu guidxilayú». Ne zaqué guca ni.
16 Óraque guluu Dios chupa biaaniʼ naroʼbaʼ: ni jma naroʼbaʼ ca para guzaaniʼ* ridxíʼ ne ni jma nahuiiniʼ ca para guzaaniʼ huaxhinni. Laaca bizaʼbe ca beleguí.
17 Ne guluu Dios guirácani guibáʼ para guzaanicani guidxilayú,
18 para guzaanicani ridxíʼ ne huaxhinni, ne para cueechube biaaniʼ de guelacahui. Ne biiyaʼ Dios guizáʼ galán ni.
19 Ne guyuu huadxí ne siadóʼ. Ngue nga guidapa dxi.
20 Óraque guníʼ Dios: «Guidxá maniʼ* ndaaniʼ nisa ne ca maniʼ ripapa guipápacaʼ lu guidxilayú, lu espaciu ni nuu guibáʼ».
21 Óraque bizáʼ Dios ca maniʼ ngola ni nuu ndaaniʼ nisadóʼ ne guiráʼ ni nabani* ni riniibi ne ni ridale ndaaniʼ nisa según tipu stiʼ, ne guiráʼ maniʼ napa xhiaa ni ripapa según tipu stiʼ. Ne biiyaʼ Dios guizáʼ galán ni.
22 Óraque guluu Dios ndaayaʼ laacame sicaríʼ: «Lagapa cría, laguidale ne laguidxá ndaaniʼ nisadóʼ. Ne guidale ca maniʼ ripapa lu guidxilayú».
23 Ne guyuu huadxí ne siadóʼ. Ngue nga ra bizaa gaayuʼ dxi.
24 Óraque guníʼ Dios: «Chuʼ maniʼ* lu guidxilayú según tipu stiʼ: maniʼ nadóʼ, maniʼ ni rixubi ndaaniʼ layú ne maniʼ duxhuʼ según tipu sticaʼ». Ne zaqué guca ni.
25 Bizáʼ Dios ca maniʼ duxhuʼ ni nuu lu guidxilayú según tipu stiʼ, ca maniʼ nadóʼ según tipu stiʼ ne ca maniʼ ni rixubi ndaaniʼ layú según tipu stiʼ. Ne biiyaʼ Dios guizáʼ galán ni.
26 Óraque guníʼ Dios: «Gúninu binni casi laanu ne modo nácanu, ne gápacaʼ autoridad luguiáʼ ca benda ni nuu ndaaniʼ nisadóʼ, ca maniʼ ripapa guibáʼ ne ca maniʼ nadóʼ ne gápacaʼ autoridad lu guidubi guidxilayú ne luguiáʼ ca maniʼ rixubi ndaaniʼ layú».
27 Ne bizáʼ Dios binni casi laa. Casi laabe guyaʼcaʼ. Hombre ne gunaa nga bizaʼbe laacaʼ.
28 Ne laaca guluu Dios ndaayaʼ laacabe ne guníʼ: «Lagapa stale xiiñitu, laguidale, laguchá guidxilayú ne lagaca stini ne lagapa autoridad luguiáʼ ca benda ni nuu ndaaniʼ nisadóʼ, ca maniʼ ripapa guibáʼ ne guiráʼ ca ni nabani ni riniibi lu guidxilayú».
29 Despué guníʼ Dios: «Laguuyaʼ, cudieeʼ laatu guiráʼ ca yagahuiiniʼ ni nuu lu guidxilayú ni rudii semiá ne guiráʼ ca yaga ni rudii cuananaxhi ne semiá. Ndiʼ nga ni goto.
30 Ne para guiráʼ maniʼ duxhuʼ ni nuu lu guidxilayú ne guiráʼ ca maniʼ ripapa guibáʼ ne guiráʼ ni nabani* ni riniibi lu guidxilayú, cudieeʼ laacaʼ guiráʼ guixi nagáʼ para gocaʼ». Ne zaqué guca ni.
31 Despué de ngue, biiyaʼ Dios guiráʼ ni biʼniʼ ne ¡biaa!,* guizáʼ galán guirácani. Ne guyuu huadxí ne siadóʼ. Ngue nga ra bizaa xhoopaʼ dxi.
Nota
^ Rariʼ caniʼni principiu stiʼ universu.
^ O «ni cadi nexhedxí».
^ O «espíritu».
^ Raríʼ caniʼni de atmósfera stiʼ guidxilayú.
^ Raríʼ caniʼni de gubidxa, beeu ne beleguí.
^ O «guni dominar».
^ O «stale alma nabani».
^ O «alma nabani».
^ O «alma nabani».
^ O «alma nabani».
