Génesis 11:1-32
11 Yanna, ti diidxaʼ si nuu lu guidxilayú ne ti modo si riníʼ guiráʼ binni.
2 Ora biree binni zeʼ neza rindani gubidxa, bidxélacabe ti lugar napampa lu layú stiʼ Sinar ne biaanacabe raqué.
3 Óraque guníʼcabe: «¡Latáʼ! Gúninu ladríu ne ugáʼguinu cani lu bele». Ngue runi biquiiñecabe ladríu lugar de guié ne para mezcla biquiiñecabe alquitrán.*
4 Ne laaca guníʼcabe: «¡Ora! Gucuinu ti guidxi ne ti torre para laanu dede gucaa íqueni guibáʼ. Zacá zanna binni de laanu ne qué zareechenu lu guidubi guidxilayú».
5 De raqué, biete* Jehová para guʼyaʼ guidxi ne torre ni bizulú cucuí ca hombre que.
6 Ne guníʼ Jehová: «Cumu ti guidxi si laacabe ne ti diidxaʼ si riníʼcabe la? biaa ni cayúnicabe. Zúnicabe intiica cosa ni gacaláʼdxicabe.
7 ¡Chuu! Guiétenu ra nuucabe ne guchéndanu diidxaʼ ni riníʼcabe para cadi guienesaacabe».
8 Ne dede raqué bicheeche Jehová laacabe lu guidubi guidxilayú, ne chaahuiʼ chaahuiʼ bisaana de gucuícabe guidxi que.
9 Ngue runi biree lá guidxi que Babel,* purtiʼ raqué nga bichenda Jehová diidxaʼ ni riníʼ binni lu guidubi guidxilayú. Ne dede raqué nga bicheeche Jehová binni lu guidubi guidxilayú.
10 Ndiʼ nga historia stiʼ Sem.
Dxi napa Sem ti gayuaa iza —chupa iza despué de Diluvio—, gupa ti xiiñiʼ ni biree lá Arpaksad.
11 Despué de gupa Sem Arpaksad, bibani gaayuʼ gayuaa iza jma. Ne gúparube xiiñibe hombre ne gunaa.
12 Dxi napa Arpaksad 35 iza, gupa ti xiiñiʼ ni biree lá Selá.
13 Despué de gupa Arpaksad Selá, bibani tapa gayuaa chonna iza jma. Ne gúparube xiiñibe hombre ne gunaa.
14 Dxi napa Selá 30 iza, gupa ti xiiñiʼ ni biree lá Éber.
15 Despué de gupa Selá Éber, bibani tapa gayuaa chonna iza jma. Ne gúparube xiiñibe hombre ne gunaa.
16 Dxi napa Éber 34 iza, gupa ti xiiñiʼ ni biree lá Péleg.
17 Despué de gupa Éber Péleg, bibani tapa gayuaa treinta iza jma. Ne gúparube xiiñibe hombre ne gunaa.
18 Dxi napa Péleg 30 iza, gupa ti xiiñiʼ ni biree lá Reú.
19 Despué de gupa Péleg Reú, bibani chupa gayuaa gaʼ iza jma. Ne gúparube xiiñibe hombre ne gunaa.
20 Dxi napa Reú 32 iza, gupa ti xiiñiʼ ni biree lá Serug.
21 Despué de gupa Reú Serug, bibani chupa gayuaa gadxe iza jma. Ne gúparube xiiñibe hombre ne gunaa.
22 Dxi napa Serug 30 iza, gupa ti xiiñiʼ ni biree lá Nacor.
23 Despué de gupa Serug Nacor, bibani chupa gayuaa iza jma. Ne gúparube xiiñibe hombre ne gunaa.
24 Dxi napa Nacor 29 iza, gupa ti xiiñiʼ ni biree lá Taré.
25 Despué de gupa Nacor Taré, bibani ti gayuaa diecinueve iza jma. Ne gúparube xiiñibe hombre ne gunaa.
26 Despué de bisaa Taré 70 iza, gupa Abrán, Nacor ne Harán.
27 Ndiʼ nga historia stiʼ Taré.
Xiiñiʼ Taré nga Abrán, Nacor ne Harán. Ne Harán nga bixhoze Lot.
28 Dxi nabániruʼ Taré bixhoze Harán, guti Harán ndaaniʼ guidxi ra gule: Ur, guidxi stiʼ ca caldeu.
29 Yanna, bichaganáʼ Abrán ne laaca bichaganáʼ Nacor. Xheelaʼ Abrán biree lá Sarái ne xheelaʼ Nacor biree lá Milcá, Harán nga bixhoze Milcá ne Iscá.
30 Peru qué gapa Sarái xiiñiʼ, purtiʼ estéril laa.
31 Biree Taré de Ur, guidxi stiʼ ca caldeu ne zinebe xiiñibe Abrán, xniétube Lot —xiiñiʼ Harán— ne xuaalídxibe Sarái, xheelaʼ xiiñibe Abrán. Bireecabe zécabe neza región stiʼ Canaán ne ora yendácabe Harán gulézacabe raqué.
32 Biaʼsi chupa gayuaa gaayuʼ iza bibani Taré. Ne gútibe ndaaniʼ guidxi Harán.
Nota
^ Lit. «betún».
^ Ndiʼ riníʼ dede ra nuube biiyabe ni cayuni ca binni que.
^ Riníʼ lá riʼ “guendaruchenda”.
