Génesis 14:1-24
14 Yanna, lu ca dxi stiʼ rey Amrafel stiʼ guidxi Sinar, rey Arioc stiʼ guidxi Elasar, rey Kedorlaomer stiʼ guidxi Elam ne rey Tidal stiʼ guidxi Goyim,
2 bizulú ca rey riʼ ti guerra né rey Bera stiʼ guidxi Sodoma, rey Birsá stiʼ guidxi Gomorra, rey Sinab stiʼ guidxi Admá, rey Seméber stiʼ guidxi Zeboyim ne rey stiʼ guidxi Bela, o Zóar.
3 Ca últimu rey riʼ gúcacaʼ tobi si lu valle stiʼ Sidim,* o mar Salado.*
4 Maʼ zinécabe 12 iza de cayúnicabe xhiiñaʼ Kedorlaomer, peru lu iza 13 bicaalúcabe laa.
5 Lu iza 14, guyé Kedorlaomer ne ca rey ni nuuné laa tobi si ne biʼniʼ ganarcaʼ ca refaím ndaaniʼ guidxi Asterot-Carnaim, ca zuzim ndaaniʼ guidxi Cam, ca emim ndaaniʼ guidxi Savé-Quiryataim
6 ne ca horeu lu ca dani stiʼ Seír hasta El-Parán, ni nuu cueʼ desiertu.
7 De raqué biguétacabe ne yendácabe En-Mispat, o Cadés. Biʼniʼ ganárcabe ca amalequita ne gucuaacabe ca layú sticaʼ ne laaca biʼniʼ ganárcabe ca amorreu ni nabeza Hazazón-Tamar.
8 Óraque biree rey stiʼ Sodoma zeʼ lu valle stiʼ Sidim ziné rey stiʼ Gomorra, rey stiʼ Admá, rey stiʼ Zeboyim ne rey stiʼ Bela o Zóar. Ne raqué bizuhuaacabe casi ti ejércitu para tindenécabe:
9 Kedorlaomer rey stiʼ Elam, Tidal rey stiʼ Goyim, Amrafel rey stiʼ Sinar ne Arioc rey stiʼ Elasar. Biaʼsi tapa rey chiguidxelasaa gaayuʼ rey.
10 Peru lu valle stiʼ Sidim nuu stale bizé de alquitrán.* Ne ora gucalaʼdxiʼ rey stiʼ Sodoma ne rey stiʼ Gomorra nuxooñelucaʼ, biábacaʼ ndaaniʼ ca bizé que, ne ca ni bilá bixooñelucaʼ neza ra nuu stale dani.
11 Ne ca ni biʼniʼ ganar que gucuaacaʼ guiráʼ cosa risaca ne guendaró ni nuu Sodoma ne Gomorra, ne bireecaʼ zecaʼ.
12 Cumu nabeza Lot —sobrinu* Abrán— ndaaniʼ guidxi Sodoma, laaca gunaazecabe laa ne zinécabe guiráʼ stiʼ, ne bireecabe zécabe.
13 Despué de ngue, tobi de ca hombre ni bilá que guyé ra nuu Abrán, hebreu que, ne gúdxibe laa ni bizaaca. Para tiempu que nabeza Abrán* lade ca yaga naroʼbaʼ stiʼ Mamré, amorreu que, biʼchiʼ Mamré nga Escol ne Aner. Naca ca hombre riʼ tobi si né Abrán.
14 Ora gunna Abrán gunaazecabe sobrinu,* bicaalisaabe guiráʼ hombre ni nanna tinde ni nuu ra nuube —chonna gayuaa dieciocho hombre ni runi xhiiñabe ni gule ndaaniʼ lídxibe— ne guzanándabe ca hombre que dede yendabe Dan.
15 Huaxhinni que, biʼniʼ dividir Abrán ca ni runi xhiiñaʼ pur grupu, ne laabe ne ca ni runi xhiiñabe bicaalúcabe ca hombre que ne biʼniʼ ganárcabe. Ne guzanándabe laacaʼ hasta Hobá, ni nuu ladu guiaʼ de Damasco.
16 Sicaríʼ nga guxhaʼ Abrán guiráʼ cosa risaca ziné ca hombre que. Laaca gucuaabe Lot, sobrínube,* ne guiráʼ cosa stiʼ, zaqueca ca gunaa ne ca binni ni gunaazeʼ ca hombre que.
17 Despué de biguetaʼ Abrán de biʼniʼ ganar Kedorlaomer ne ca rey ni ziné laa, biree rey stiʼ Sodoma para guidxaagalú Abrán lu valle* stiʼ Savé, o valle stiʼ Rey.
18 Ne Melquisedec, rey stiʼ guidxi Salem, gulee pan ne vinu. Laa naca sacerdote stiʼ Dios ni nuu guibáʼ.
19 Óraque guluube ndaayaʼ Abrán ne guniʼbe:
«¡Dios ni nuu guibáʼ, ni bizáʼ guibáʼ ne guidxilayú,uguu ndaayaʼ Abrán!
20 ¡Guisaca Dios ni nuu guibáʼ,ni biʼniʼ entregar ca enemigu stiluʼ lu naluʼ!».
Ne bidii Abrán laabe chii por ciento de guiráʼ ni ziné.
21 Despué de ngue, gudxi rey stiʼ Sodoma Abrán: «Zanda guiaananeluʼ ca cosa risaca ca, peru bidxiguetaʼ naa ca binni ca».
22 Peru gudxi Abrán rey stiʼ Sodoma: «Candisaʼ naʼyaʼ ne cayuneʼ jurar nezalú Jehová, Dios ni nuu guibáʼ ni bizáʼ guibáʼ ne guidxilayú,
23 qué zacaa’ diaʼ gastiʼ ni gudiiluʼ naa, nin ti hilu nin curriá stiʼ ti elaguidi, para cadi guiniʼluʼ despué “guca Abrán ricu pur naa”.
24 Ni gudó si ca hombre stinneʼ nga maʼ gucuaaʼ. Peru bidii lugar guicaa ca hombre ni yené naa —Aner, Escol ne Mamré— ni raca caber laacaʼ».
Nota
^ O «ra napampa lade dani stiʼ Sidim».
^ O «mar Muerto».
^ Lit. «betún».
^ Lit. «xiiñiʼ bíʼchibe».
^ O «nabeza Abrán ndaaniʼ yoo de lari».
^ Lit. «biʼchiʼ».
^ Lit. «bíʼchibe».
^ O «ra napampa lade dani».
