Génesis 16:1-16
-
Agar ne Ismael (1-16)
16 Qué ganda gapa Sarái, xheelaʼ Abrán, xiiñiʼ. Peru napa Sarái ti criada egipcia láʼ Agar.
2 Ngue runi gudxi Sarái Abrán: «¡Bicaadiaga naa, por favor! Caʼruʼ gudii Jehová lugar naa gapaʼ xiiñeʼ. Nga runi, gupa relación sexual né criada stinneʼ, tila peʼ zacá gapaʼ xiiñeʼ ni gueeda de laabe». Ne biʼniʼ Abrán ni gudxi Sarái laa.
3 Dxi maʼ ziné Abrán chii iza de nabeza Canaán, gucuaa Sarái, xheelaʼ Abrán, criada egipcia stiʼ ni láʼ Agar que ne bidiibe gunaa riʼ Abrán para gaca sti xheelaʼ.
4 Óraque gupa Abrán relación sexual né Agar ne gucaxiiñiʼ gunaa riʼ. Peru ora bidii Agar cuenta nacaxiiñiʼ, bizulú biʼniʼ despreciar Sarái.
5 Ora biʼyaʼ Sarái ni cazaaca que, gúdxibe Abrán: «Lii napuʼ donda pur ni cayuni gunaa riʼ naa. Naa guluaaʼ criada stinneʼ ndaaniʼ naluʼ, peru ora bidiibe cuenta nacaxiiñibe bizulú biʼniʼ despreciarbe naa. Jehová guʼyaʼ pa lii nápaluʼ donda o pa naa».
6 Ngue runi gudxi Abrán Sarái: «Lii nga runi mandarluʼ criada stiluʼ, nga runi biiyaʼ xii nga ni jma jneza gúniluʼ né laabe». Óraque bisituí Sarái lú Agar, ne bixooñeʼ Agar de ra nuucabe.
7 Despué biiyaʼ ángel stiʼ Jehová laabe gaxha de ti lugar ra rindani nisa* lu desiertu, ni riaana neza zécabe ti lugar ni lá Sur.
8 Ne gudxi ángel que laabe: «Agar, criada stiʼ Sarái, ¿padé zeedaluʼ ne paraa cheluʼ?». Laabe bicábibe: «Cuxooñeluáʼ de Sarái, patrona stinneʼ».
9 Para gudxi ángel stiʼ Jehová laabe: «Biguetaʼ ra nuu patrona stiluʼ ne bidii lugar guni mandarbe lii».
10 Laaca gudxi ángel stiʼ Jehová laabe: «Guizáʼ zutaleʼ ca ni zá de lii. Zácacabe stale dede guirutiʼ zanda ugabaʼ laacabe».
11 De raqué gudxi ángel stiʼ Jehová laabe: «Nacaxiiñiluʼ ne zápaluʼ ti hombrehuiiniʼ. Napa xidé cueelaluʼ laabe Ismael,* purtiʼ maʼ binadiaga Jehová cayuunaluʼ de tantu cayacanaluʼ.
12 Zácabe casi ti burru guiʼxhiʼ.* Zadindenebe guiráʼ binni ne guiráʼ binni zadindené laabe. Zabézabe frente de* guiráʼ ca bíʼchibe».
13 Óraque bicaabe ridxi lá Jehová, ni caniʼné laabe, ne gúdxibe laa: «Lii nga ti Dios ni ruuyaʼ». Guniʼbe zaqué purtiʼ guníʼ íquebe: «¿Ñee dxandíʼ biiyaʼ raríʼ ni ruuyaʼ naa la?».
14 Nga runi biree lá bizé, ni nuu entre Cadés ne Bered que, Beer-Lahái-Roí.*
15 Bedandá dxi gupa Agar ti xiiñiʼ Abrán, ne gulee lá Abrán hombrehuiiniʼ que Ismael.
16 Napa Abrán 86 iza dxi gupa Agar Ismael.
Nota
^ O «manantial».
^ Riníʼ lá riʼ “rucaadiaga Dios”.
^ O «ti onagro», ti tipu burru guiʼxhiʼ. Nuu tu ná raríʼ caniʼni de ti cebra. Zándaca purtiʼ qué randa rusidoʼ binni laame.
^ O zándaca «Zucaalube».
^ Zándaca riniʼni “bizé stiʼ Ni nabani ni ruuyaʼ naa”.
