Génesis 20:1-18
-
Bilá Sara de lu náʼ Abimélec (1-18)
20 Yanna, gundisaʼ Abrahán ca yoo de lari stiʼ ne biree zeʼ lu región stiʼ Négueb ne yendeza entre Cadés ne Sur. Laga nabézabe* Guerar,
2 ndiʼ nga guniʼbe de xheelabe Sara: «Bizanaʼ laabe». Ngue runi Abimélec, rey stiʼ Guerar, biʼniʼ mandar chiyúbicabe Sara ne chinécabe laa ra nuube.
3 Despué, huaxhinni lu ti bacaandaʼ bihuinni Dios nezalú Abimélec ne gúdxibe laa: «Gunna zátiluʼ pur gunaa ni bisendacaaluʼ ca, purtiʼ maʼ bichaganabe ne stiʼ sti hombre laabe».
4 Peru caʼruʼ canaʼ Abimélec Sara.* Ngue runi gunabadiidxabe: «Jehová, ¿ñee zunitiluluʼ ti guidxi ni qué gapa donda* la?
5 ¿Cadi gudxi hombre ca naa “bizanaʼ laabe” la? ¿Ne cadi laaca gudxi gunaa ca naa “bizanaʼ laabe” la? Naa ndaʼ rabeʼ cadi cayuneʼ xiixa cosa malu».*
6 Ngue runi gudxi Dios ni dxandíʼ laabe lu bacaandaʼ que: «Nannaʼ qué nudiiluʼ cuenta pa cayúniluʼ ti cosa malu. Nga runi bicueezaʼ lii para cadi gucheeneluʼ naa ne qué nudieeʼ lugar nigáʼnaluʼ gunaa ca.
7 Yanna bidxiguetaʼ gunaa ca xheelaʼ, purtiʼ profeta* xheelabe. Ne hombre ca zuni orar pur lii ne qué zátiluʼ. Peru pa qué gudxiguétaluʼ gunaa ca la? naa cayabeʼ lii zátiluʼ ne zati guiráʼ ca ni nabeza ndaaniʼ lídxiluʼ».
8 Siadoʼroʼ biasa Abimélec, bicaa ridxi guiráʼ ca ni runi xhiiñaʼ ne gudxi laacabe xi bizaaca. Ne guizáʼ bidxíbicaʼ.
9 De raqué bisendacaa Abimélec Abrahán ne gúdxibe laa: «¿Xii ndiʼ bíʼniluʼ laadu pue? ¿Xi bineʼ lii para nucaaluʼ naa ne guidxi ni runeʼ mandar ñúnidu ti pecadu naroʼbaʼ pue? Cadi galán diʼ ni bíʼniluʼ naa ca».
10 Laaca gudxi Abimélec Abrahán: «¿Xi bicaa lii gúniluʼ ni pue?».
11 Para bicabi Abrahán: «Es que guníʼ iqueʼ: “Qué ridxibi ca binni de raríʼ Dios, nga runi zuuticabe naa para guiaananécabe xheelaʼ”.
12 Ne laaca cadi cusiguieeʼ ora gunieeʼ bizanaʼ laabe, purtiʼ tobi si bixhózedu, peru gadxé jñaadu. Ne yanna laaca xheelaʼ laabe.
13 Nga runi, ora biʼniʼ mandar Dios naa guireeʼ de ra lidxi bixhozeʼ ne chaaʼ de ti lugar ne sti lugar, gudxeʼ Sara: “Ratiica si chuunu guníʼ bizanaʼ lii, zacá zusihuínniluʼ nadxiiluʼ naa”».
14 De raqué biseendacaa Abimélec dendxuʼ ne vaca, zaqueca hombre ne gunaa ni runi xhiiñabe ne bidiibe laacaʼ Abrahán. Ne laaca bidxiguétabe Abrahán Sara.
15 Laaca gudxi Abimélec laabe: «Biaa, laaca lu naluʼ nuu guidxi stinneʼ. Zanda cuézaluʼ ra gápaluʼ gana».
16 Ne Sara la? gúdxibe laa: «Cudieeʼ bizáʼnaluʼ ti mil pieza de plata. Zaquiiñecani casi señal* para guʼyaʼ guiráʼ binni qué ñúniluʼ xiixa cosa malu. Zacá guirutiʼ zaníʼ mal de lii».
17 Óraque gunabaʼ Abrahán lu Dios ni dxandíʼ pur Abimélec ne bisianda Dios Abimélec, xheelaʼ ne ca esclava stiʼ ne bizulú gúpacaʼ xiiñicaʼ.
18 Cumu yené Abimélec Sara, xheelaʼ Abrahán, ra lidxi la? nga runi biʼniʼ Jehová cadi gapa ca gunaa ni nuu ra lidxi Abimélec xiiñicaʼ.*
Nota
^ O «nabézabe xquidxi binni».
^ Ndiʼ riníʼ caʼruʼ gápabe relación sexual né gunaa riʼ.
^ O «inocente».
^ O «de guidubi ladxiduáʼ cayuneʼ ni jneza ne inocente naa».
^ Lit. «Zeeda gaca ca ni para lii casi ti velu ni guchii lú xcaadxi».
^ O «guieeguʼ matriz stiʼ guiráʼ ca ni nabeza ra lidxi Abimélec».
