Génesis 23:1-20
-
Guti Sara ne bigaachiʼ (1-20)
23 Bibani Sara ti gayuaa veintisiete iza. Biaʼ cá nga ca iza bindaa xquendanabánibe.
2 Guti Sara Quiryat-Arbá —laani nga Hebrón—, lu región stiʼ Canaán. Ne guizáʼ biinaʼ Abrahán ne gucaná ladxidóʼ pur guti Sara.
3 Óraque biree Abrahán de ra nexheʼ xheelaʼ ne gúdxibe ca xiiñiʼ Het:
4 «Ti binni de sti guidxi nga naa ne beedándezaʼ siaʼ ládetu. Lagudii naa ti layú lu región stitu, para iquiiñeʼ ni casi baʼ. Zacá zanda gucaacheʼ xheelaʼ racá».
5 Ne bicabi ca xiiñiʼ Het Abrahán:
6 «Señor stinneʼ, bicaadiaga laadu. Nánnadu lii nga ti xaíque ni gulí Dios.* Zanda gucaachiluʼ xheelaluʼ ndaaniʼ baʼ jma galán nápadu. Tutiica si de laadu zudii lii baʼ stiʼ para gucaachiluʼ xheelaluʼ».
7 Ngue runi biasa Abrahán, ne bizuxibi nezalú ca binni de lugar que —ca xiiñiʼ Het—
8 ne gúdxibe laacaʼ: «Pa cudiitu lugar naa gucaacheʼ xheelaʼ raríʼ, laguni ni chitidxeʼ laatu riʼ: laguiníʼ pur naa nezalú Efrón xiiñiʼ Zóhar
9 para gutoobe cueva ni nuu Macpelá luaʼ, purtiʼ stibe ni ne nuuni punta layú stibe. Lagudii lugar quixeʼ laabe nezalutu biaʼ saca ni né plata. Zacá zapaʼ ti lugar para iquiiñeʼ casi baʼ».
10 Yanna, zuba Efrón lade ca xiiñiʼ Het. Nga runi, nezalú ca xiiñiʼ Het ne nezalú ca binni riuu ra puertaʼ guidxi stibe, gudxi Efrón, hitita que, Abrahán:
11 «¡Coʼ señor stinneʼ! Bicaadiaga naa. Cadi cudieeʼ siaʼ lii cueva ca, laaca cudieeʼ lii layú ra nuuni. Cudieeʼ ni lii nezalú guiráʼ ca hombre de guidxi stinneʼ. Racá bicaachiʼ xheelaluʼ».
12 Óraque bizuxibi Abrahán nezalú ca binni de lugar que
13 ne gúdxibe Efrón nezalú guiracaʼ: «Pa ruuyaluʼ jneza ni canabaʼ lii la? bicaadiaga naa. Zaguixeʼ lii biaʼ saca layú ca. Gucuaa plata ca, para ganda gucaacheʼ xheelaʼ racá».
14 Ne bicabi Efrón Abrahán:
15 «Señor stinneʼ, bicaadiaga naa. Risaca layú riʼ tapa gayuaa siclo* de plata, peru ¿ñee stale nga para laanu la? Lii guyé ne bicaachiʼ xheelaluʼ racá».
16 Para guyuu Abrahán conforme gudii biaʼ guníʼ Efrón ne biaʼ plata ni gudxi Efrón laabe. Ne guluubiaʼbe nezalú ca xiiñiʼ Het: tapa gayuaa siclo de plata, según modo riguubiáʼ binni runi negocio dxiqué.
17 Zacá nga biaana nezalú binni maʼ bitoo Efrón layú ni gúpabe Macpelá, frente de Mamré —layú que, cueva ni nuu luni ne guiráʼ yaga ni nuu lu layú que—, ne beeda gácani
18 stiʼ Abrahán, ni guzíʼ nezalú ca xiiñiʼ Het ne guiráʼ ca ni riuu ra puertaʼ guidxi que.
19 Despué de ngue, bicaachiʼ Abrahán Sara, xheelaʼ, ndaaniʼ cueva ni nuu Macpelá, frente de Mamré —laani nga Hebrón—, lu región stiʼ Canaán.
20 Zaqué nga maʼ qué ñaca stiʼ ca xiiñiʼ Het layú ne cueva que,* ne beeda gácacani stiʼ Abrahán para iquiiñebe ni casi ti lugar para gaca baʼ.
Nota
^ O zándaca «ti xaíque guizáʼ risaca».
^ Ti siclo nga 11.4 g. Biiyaʼ apén. B14.
^ Raríʼ caniʼni de cueva ni nuu lu layú que.
