Génesis 33:1-20
33 Ora gundisalú Jacob, biiyabe zedané Esaú tapa gayuaa hombre. Ngue runi gudiizibe ca xcuidi que lu Lea, lu Raquel ne lu ca criada stibe.
2 Bisánirube ca criada que né ca xiiñicaʼ, atrá de laacaʼ guluube Lea né ca xiiñiʼ, ne dede atrá guluube Raquel né José.
3 De raqué guzániru Jacob nezalú guirácabe ne ra zidxíñabe jma gaxha de bíʼchibe, bizuxíbibe dede gudixhe íquebe layú gadxe biaje.
4 Peru bixooñeʼ Esaú para idxaagalú laabe, gudiidxi laabe ne bidii bixiduʼ laabe, ne biinaʼ guirópacabe.
5 Ora gundisalú Esaú, biiyabe ca gunaa ne ca xcuidi que ne gunabadiidxabe: «¿Tu guiráʼ binni ndiʼ zedané lii pue?». Para bicabi Jacob laabe: «Xiiñeʼ laacabe, zacá nga caguu Dios ndaayaʼ siervu stiluʼ».
6 Óraque bidxiñaʼ ca criada que né ca xiiñicaʼ ne bizuxíbicaʼ,
7 laaca bidxiña Lea né ca xiiñiʼ ne bizuxíbicaʼ. Ne últimu la? bidxiña José ne Raquel ne bizuxíbicaʼ.
8 Óraque gunabadiidxaʼ Esaú Jacob: «¿Xi para biseendaluʼ guiráʼ ni bidxaagaluáʼ riʼ pue?». Bicabi Jacob laabe: «Para gusiecheʼ ladxidoʼloʼ, señor stinneʼ».
9 Ne gudxi Esaú laabe: «Bicheʼ, maʼ bidale guiráʼ ni napaʼ. Ca ndiʼ la? stiluʼ cani. Biaanané cani».
10 Peru gudxi Jacob laabe: «Coʼ, pa cusiecheʼ ladxidoʼloʼ la? rinabaʼ lii guicaaluʼ regalu riʼ, purtiʼ bedaniáʼ ni para ganda guuyaʼ lii. Maʼ biiyaʼ luluʼ ne zeeda gácani casi ñuuyaʼ lú Dios, purtiʼ galán modo bidxaagaluluʼ naa.
11 Rinabaʼ lii guicaaluʼ regalu ni bedaniáʼ para lii,* purtiʼ maʼ guluu Dios ndaayaʼ naa ne maʼ napaʼ guiráʼ ni caquiiñeʼ». Ne gúdxibe Esaú guicaa ni dede ra bicuudxibe laa.
12 Despué gudxi Esaú laabe: «Chuu pue. Naa gulueeʼ lii neza».
13 Peru bicabi Jacob laabe: «Señor stinneʼ, nánnaluʼ zeeda xcuidi ládedu. Ne laaca nánnaluʼ niáʼ dendxuʼ ne vaca ni napa cría. Pa sácame nagueenda ti dxi si la? guirácame záticame.
14 Canabaʼ lii, señor stinneʼ, sániruluʼ delante de siervu stiluʼ. Naa ziaaʼ jma chaahuiʼ, biaʼ rizá ca maniʼ ne ca xcuidi ni zedaniáʼ, dede ra chindayaʼ ra nuu señor stinneʼ guidxi Seír».
15 Óraque gudxi Esaú laabe: «Bidii lugar gusaananiáʼ lii caadxi binni ni niáʼ raríʼ». Peru bicabi Jacob laabe: «¿Xi para nuuluʼ gúniluʼ nga pue? Pur modo bidxaagaluluʼ naa, né nga si nuaaʼ nayecheʼ».
16 Ngue runi biguetaʼ Esaú guidxi Seír dxi que.
17 Ne biree Jacob zeʼ Sucot. Raqué bíʼnibe ti yoo ne bíʼnibe currá ni deʼguʼ ique ra guiaana ca maniʼ stibe. Ngue runi gulee labe lugar que Sucot.*
18 Dede dxi biree Jacob Padán-Aram, qué nizaacabe gastiʼ dede dxi yendabe guidxi Siquem, ni nuu lu región stiʼ Canaán, ne bizuhuaabe ca yoo de lari stibe gaxha de guidxi que.
19 Despué gudíxebe ti gayuaa pieza de bueltu para guziʼbe ti ndaa layú ra bizuhuaabe yoo de lari stibe. Guziʼbe ni lu ca xiiñiʼ Hamor, bixhoze Siquem.
20 Raqué bicuibe ti altar ne gulee labe ni Dios ni dxandíʼ, Dios stiʼ Israel.
