Génesis 38:1-30
-
Judá ne Tamar (1-30)
38 Ca dxi que, bisaana Judá ca biʼchiʼ ne bicuibe yoo de lari stibe gaxha de ra nuu ti hombre adulamita ni láʼ Hirá.
2 Raqué biiyaʼ Judá ti xiiñidxaapaʼ Suá, ti cananeu, bichaganabe gunaa que ne gúpabe relación sexual né laa.
3 De raqué gucaxiiñiʼ gunaa riʼ. Ne gupa gunaa riʼ ti hombrehuiiniʼ ni gulee lá Judá Er.
4 Gucaxiiñibe sti biaje, gúpabe sti hombrehuiiniʼ ne gulee labe laa Onán.
5 Biguetaʼ gucaxiiñibe, gúpabe sti hombrehuiiniʼ ne gulee labe laa Selá. Nuu Judá guidxi Aczib dxi gupa xheelaʼ hombrehuiiniʼ riʼ.
6 Gudiʼdiʼ si tiempu, bicheelaʼ Judá baʼduʼ primé stiʼ ni láʼ Er ti gunaa láʼ Tamar.
7 Peru qué ñuulaʼdxiʼ Jehová xpiaʼ Er, baʼduʼ primé stiʼ Judá. Ngue runi biiti Jehová laabe.
8 Pur ni bizaaca que gudxi Judá Onán: «Bichaganáʼ xheelaʼ bíʼchiluʼ ne biʼniʼ cumplir deber ni nápaluʼ de guichaganaluʼ xcuñádaluʼ.* Gupa relación né laabe para gale xiiñiʼ bíʼchiluʼ».
9 Peru nanna Onán lá biʼchiʼ nga guiaanané ca xiiñiʼ. Ngue runi, ora rápabe relación sexual né xheelaʼ bíʼchibe ruxhiibe semen stibe layú para cadi gale xiiñiʼ bíʼchibe.
10 Peru para Jehová cadi jneza ni rúnibe. Nga runi laaca biiti laabe.
11 Óraque gudxi Judá Tamar: «Biaana ra lidxi bixhózeluʼ, biaana viuda dede ora maʼ guiniisi Selá, xiiñeʼ». Bíʼnibe ndiʼ purtiʼ guníʼ íquebe: «Cadi málasi laaca gatiʼ hombrehuiiniʼ riʼ casi gutiʼ ca biʼchiʼ». Ngue runi biree Tamar zeʼ ne biaana ra lidxi bixhoze.
12 Despué, guti xheelaʼ Judá, ni guca xiiñidxaapaʼ Suá. Gudiʼdiʼ si ca dxi biʼnaʼ Judá pur xheelaʼ, yenebe xhamígube Hirá, adulamita que, ra nuu ca hombre ni cugá guicha ladi ca dendxuʼ stibe guidxi Timná.
13 Ne guyuu tu gudxi Tamar: «Biaa, zeʼ suégruluʼ guidxi Timná para ugá guicha ladi ca dendxuʼ stiʼ».
14 Ngue runi, guleebe lari de viuda ni nácube, bichiibe lube ne biréndabe ti chal ne guribe ra puertaʼ guidxi Enaím, ni nuu lu neza ni zeʼ guidxi Timná. Bíʼnibe ndiʼ purtiʼ biiyabe maʼ huaniisi Selá ne caʼruʼ gucheelacabe laabe Selá.
15 Ora biʼyaʼ Judá laabe, nagueendaca guníʼ ique ti prostituta laabe, purtiʼ bichii Tamar lú.
16 Ngue runi guyebe ra nuu gunaa que, ne cumu qué gánnabe pa xuaalídxibe laa la? gúdxibe laa: «¿Ñee zanda gapaʼ relación sexual né lii la?». Para bicabi gunaa que laabe: «¿Xi gudiiluʼ naa pa gataniáʼ lii yaʼ?».
17 Ne bicabi Judá: «De lade ca chiva stinneʼ, zuseendaʼ ti chivuhuiiniʼ para lii». Peru bicabi gunaa que laabe: «¿Xi gusaananeluʼ naa para gannaʼ dxandíʼ zuseendaluʼ laame yaʼ?».
18 Para gunabadiidxaʼ Judá laabe: «¿Xi racaláʼdxiluʼ gusaananiáʼ lii yaʼ?». Óraque bicabi gunaa que: «Aníu stiluʼ ni rucaaneluʼ sellu né doo stini ne vara ni naazeluʼ ca». Ngue runi bidiibe ca cosa que Tamar, gutanebe laa ne gucaxiiñiʼ.
19 Despué, biree Tamar zeʼ, gulee chal ni renda ne gucu lari de viuda sti’.
20 De raqué biseendaʼ Judá xhamigu, adulamita que, para chisaana chivuhuiiniʼ que ne chicaaʼ ca cosa ni bisaananebe gunaa que, peru qué nidxela hombre que gunaa que.
21 Ngue runi, gunabadiidxabe ca hombre de raqué: «¿Paraa nuu prostituta stiʼ templu* ni ribí guriá neza stiʼ guidxi Enaim que pue?». Para bicabi ca hombre que laabe: «Qué huayuu dxi chuʼ ti prostituta stiʼ templu raríʼ».
22 Para biguetaʼ hombre que ra nuu Judá ne gudxi laabe: «Qué nidxelaʼ diaʼ gunaa que. Ne laaca gudxi ca hombre de raqué naa: “Qué huayuu dxi chuʼ ti prostituta stiʼ templu raríʼ”».
23 Óraque gudxi Judá laabe: «Zaa guiaananebe ca cosa ca, cadi málasi guni nga guni búrlacabe laanu. Peru naa maʼ bineʼ cumplir, maʼ biseendaʼ chivuhuiiniʼ ca ra nuu gunaa ca, peru qué nidxélaluʼ laabe».
24 Gudiʼdiʼ si chonna beeu, gúdxicabe Judá: «Maʼ guzá xuaalídxiluʼ Tamar de prostituta. Ne pur nga, yanna maʼ nacaxiiñibe». Óraque guníʼ Judá: «Lacuee laabe fuera ne laguzaaquiʼ laabe».
25 Ne ora zinécabe laabe fuera, biseendabe tu chitidxi suégrube ca diidxaʼ riʼ: «Stiʼ bixhoze baʼduhuiiniʼ ni nacaxiiñeʼ ca cosa riʼ». Ne laaca guniʼbe: «Canabaʼ lii gúʼyaluʼ tu stiʼ aníu ni ricané sellu riʼ, doo ne vara riʼ».
26 Biiyaʼ si Judá ca cosa que guníʼ: «Qué gapa diʼ gunaa riʼ donda, purtiʼ naa nga qué nudieeʼ laabe xiiñeʼ Selá para nichaganabe». Bizaaca si ngue, maʼ qué nibiguetaʼ ñápabe relación sexual né gunaa que.
27 Yanna, dxi bedandá tiempu gapa Tamar xiiñi’, bihuinni cuachi nacaxiiñiʼ.
28 Ora cayápabe ca baʼduhuiiniʼ que, gulee náʼ tobi de laacaʼ. Nagueendaca gucuaaʼ partera que ti hilu naxiñáʼ rini, bindiibi ni náʼ baʼduhuiiniʼ que, ne guníʼ: «Ndiʼ biree primé».
29 Peru guluu náʼ baʼduhuiiniʼ que sti biaje ne biree bíʼchibe. Óraque bicaa partera que ridxi ne ná: «¡Maʼ bininaluʼ* jñaaluʼ!». Ngue runi gulee lácabe baʼduhuiiniʼ que Pérez.*
30 Despué biree bíʼchibe ni liibi hilu naxiñáʼ rini que náʼ. Ne gulee lácabe laa Zérah.
Nota
^ Zándaca raríʼ caniʼni de tuuxa ni raca prostituir para guni adorar ca dios stiʼ ca cananeu.
^ O «guchézaluʼ».
^ Riníʼ lá riʼ “gureza”. Zándaca raríʼ caniʼni gureza ra nácabe gunaa.
