Génesis 39:1-23
39 Yanna, yené ca ismaelita José Egipto. Raqué bitoocabe laabe lú ti egipciu láʼ Potifar, hombre ni naca xaíque stiʼ ca ni rapa faraón ne ni napa stale autoridad ndaaniʼ palaciu stiʼ faraón.
2 Peru qué nixeleʼ Jehová de José. Ngue runi jneza riree guiráʼ ni rúnibe, ne bisaana xpixuaanabe, egipciu que, laabe gápabe ra lidxi.
3 Ne bidii Potifar cuenta cadi cusaana Jehová José ne cayacané Jehová laabe guiree guiráʼ ni rúnibe jneza.
4 Ne zeʼ dxi jma guyuulaʼdxiʼ Potifar guiráʼ ni runi José ne José nga hombre ni jma gúpabe confianza. Ngue runi bisaana Potifar laabe gápabe ra lidxi ne guiráʼ ni napa.
5 Dede dxi bisaanabe José gapa ra lídxibe ne guiráʼ ni nápabe, bizulú guluu Jehová ndaayaʼ ra lidxi egipciu que pur José. Guluu Jehová ndaayaʼ guiráʼ ni nápabe ra lídxibe ne lu layú stibe.
6 Ne bisaana Potifar guiráʼ ni napa lu náʼ José. Maʼ qué nizaaláʼdxibe nin ti cosa, ni gósibe nga rinábabe. Ne beeda gaca José ti hombre macizu ne galán.
7 De raqué bizulú biiyadxí xheelaʼ Potifar José ne ná rabi laabe: «Gutané naa».
8 Peru qué niná José ñatané laabe ne rábibe xheelaʼ xpixuaanabe: «Biaa, maʼ qué riuu xpixuaanaʼ xizaa pur ni napa ra lidxi, purtiʼ maʼ bisaanabe guiráʼ ni nápabe lu nayaʼ ne nápabe confianza naa.
9 Guirútiruʼ jma napa autoridad que naa ra yoo riʼ. Ne maʼ bisaananebe naa guiráʼ ni nápabe, peru lii si coʼ, purtiʼ xheelabe lii. Nga runi, qué zanda diʼ guneʼ ti cosa guizáʼ malu ne gucheeniáʼ Dios».
10 Guiráʼ dxi ricá gunaa que tema gatané José laa, peru qué niná José ñatané laabe ne ñaana ra nuube.
11 Peru ti dxi, qué guinni nin ti mozo ndaaniʼ yoo que ora guyuu José ziguni dxiiñaʼ.
12 Óraque biruxhayú gunaa que xhábabe ne gudxi laabe: «¡Gutané naa!». Peru biree guxooñeʼ José ne bisaana xhaba lu nabe.
13 Ora biʼyaʼ gunaa que biree guxooñeʼ José ne bisaana xhaba lu nabe,
14 bizulú bicaabe ridxi ca hombre ni runi dxiiñaʼ ra yoo que ne gúdxibe laacaʼ: «¡Laguuyaʼ! Hebreu ni bedané xheelaʼ raríʼ gucaláʼdxibe ñuni búrlabe laanu. Gucaláʼdxibe ñatanebe naa, peru guizáʼ reciu biguayaʼ ridxi.
15 Ne ora bíʼyabe jma maʼ reciu cuguayaʼ ridxi la? biree guxooñebe ne bisaanabe xhábabe ra nuaaʼ».
16 Despué, gucuaa gunaa que xhaba José ne gudixhe ni cueʼ ne gulézabe dede ora bedandá xpixuaanaʼ José ra lidxi.
17 Óraque gúdxibe Potifar laaca ni gúdxibe ca hombre que. Nabe: «Mozo hebreu ni beedaneluʼ raríʼ gucalaʼdxiʼ nilaxoo naa.
18 Peru, ora bizuluáʼ biguayaʼ ridxi, biree guxooñebe ne bisaanabe xhábabe ra nuaaʼ».
19 Ora binadiaga Potifar guníʼ xheelaʼ «Ndiʼ nga ni biʼniʼ mozo stiluʼ naa», guizáʼ bidxiichi.
20 Ngue runi, biseguyoo xpixuaanaʼ José laa ndaaniʼ cárcel, ra rieguyoo ca ni ruseguyoo rey. Raqué nga biaana José deguyoo.
21 Peru qué nusaana Jehová José. Qué nusaana de ñánnaxhiibe laa ne bicaabe xaíque stiʼ cárcel que gaca nachaʼhuiʼ né José.
22 Ngue runi, gudixhe xaíque stiʼ cárcel que gapa José guiráʼ ca ni deguyoo raqué. Ne José nga biʼyaʼ gúnicabe dxiiñaʼ ni nexheʼ gaca raqué.
23 Ne qué ñuu xaíque stiʼ cárcel que xizaa pur guiráʼ ni bisaanabe lu náʼ José, purtiʼ gupa José ndaayaʼ stiʼ Jehová ne biiyaʼ Jehová guiree guiráʼ ni rúnibe jneza.
