Génesis 48:1-22
48 Bizaaca si guiráʼ ndi’, gúdxicabe José: «Guizáʼ maʼ cará stipa stiʼ bixhózeluʼ». Ngue runi yeguuyabe bixhózebe ne yenebe guiropaʼ xiiñibe, Manasés ne Efraín.
2 Óraque gúdxicabe Jacob: «Beeda xiiñiluʼ José, zeeda guuya lii». Ngue runi biʼniʼ Israel stipa ne gurí ruaa cama.
3 Ne gudxi Jacob José:
«Dxi nuaaʼ Luz, lu región stiʼ Canaán, bihuinni Dios ni jma napa poder nezaluáʼ ne guluube ndaayaʼ naa.
4 Bidii stiidxabe naa: “Zudieeʼ lii xiiñiluʼ ne zutaleʼ laacabe. Ne zuneʼ lii ti grupu naroʼbaʼ de guidxi. Zudieeʼ layú riʼ ca ni zá de lii ne qué ziuu dxi gusaana de gácani stícabe”.
5 Yanna, guiropaʼ hombrehuiiniʼ ni gúpaluʼ raríʼ, Egipto, ante guedandayaʼ ra nuuluʼ, maʼ xiiñeʼ laacabe. Zaca Efraín ne Manasés xiiñeʼ, casi Rubén ne Simeón.
6 Peru ca xiiñiluʼ ni gápaluʼ despué, stiluʼ laacaʼ. Ne zacaacabe layú lu herencia ni guicaa ca bíʼchicabe.
7 Ne naa la? dxi bireeniáʼ ca xpinneʼ de Padán ne yendayaʼ lu región stiʼ Canaán, guti Raquel. Peru cumu cayaadxaruʼ para chindadu Efrat, bicaacheʼ laabe neza ni zeʼ Efrat, laca laani nga Belén».
8 Óraque biiyaʼ Israel ca xiiñiʼ José ne gunabadiidxaʼ: «¿Tu laacabe pue?».
9 Ne bicabi José: «Laacabe nga ca xiiñeʼ ni bidii Dios naa ndaaniʼ guidxi riʼ». Para gudxi bixhózebe laabe: «Canabaʼ lii guchíñaluʼ laacabe ra nuaaʼ para cuaaʼ ndaayaʼ laacabe».
10 Maʼ huaxiéʼ ruuyaʼ Israel purtiʼ maʼ nagola. Ngue runi bichiña José guiropaʼ xiiñiʼ ra nuube, ne óraque gudiidxi Israel laacabe ne bidii bixiduʼ laacabe.
11 Despué gudxi Israel José: «Qué niníʼ iqueʼ pa nibiguetaʼ ñuuyaʼ lii, ne yanna biaa, maʼ bidii Dios lugar naa guuyaʼ ca xiiñiluʼ».
12 Óraque bituubaʼ José ca xiiñiʼ de ra nuu ca xibi Israel ne bizuxibi ne gundeteʼ ique layú nezalú bixhoze.
13 Óraque bichiña José guiropaʼ xiiñiʼ ra nuu Israel. Né nabe ladu derechu gucuaabe Efraín ne bizuhuaabe laa ladu bigaʼ* stiʼ Israel. Ne Manasés la? gunaazebe laa né nabe ladu bigaʼ ne bizuhuaabe laa ladu derechu stiʼ Israel.
14 Peru gudixhenáʼ Israel ique Efraín né náʼ ladu derechu, neca laa nga ni nahuiiniʼ. Ne gudixhenabe ique Manasés né nabe ladu bigaʼ. Ne laapebe bíʼnibe ni zaqué neca nánnabe Manasés nga baʼduʼ primé.
15 Despué guluube ndaayaʼ José ne gúdxibe laa:
«Dios ni dxandíʼ, ni biʼniʼ servir bixhozebiidaʼ Abrahán ne bixhozeʼ Isaac,*Dios ni dxandíʼ, ni huayaca pastor stinneʼ biaʼ dxi huabaneʼ hasta yannadxí,
16 ne ángel ni maʼ bilá naa de guiráʼ cosa malu, cuʼ ndaayaʼ ca hombrehuiiniʼ riʼ.
Ne ganna binni, naa, bixhozebiidaʼ Abrahán ne bixhozeʼ Isaac, nácadu bixhózebiidacabe,ne gácacabe ti guidxi naroʼbaʼ lu guidxilayú».
17 Peru ora biʼyaʼ José naguixhenáʼ bixhoze ique Efraín né náʼ ladu derechu, qué ñuulaʼdxiʼ ni. Ngue runi gucaláʼdxibe nutiixhibe náʼ bixhózebe para niguixhenáʼ ique Manasés.
18 Para gudxi José bixhoze: «Coʼ, bixhozeʼ, hombrehuiiniʼ riʼ nga baʼduʼ primé. Gudixhe naluʼ ladu derechu íquebe».
19 Peru qué niná bixhózebe ñuni ni ne guníʼ: «Nannaʼ, xiiñeʼ, nannaʼ ni. Laaca zácabe ti guidxi ne zasácabe. Peru jma zasaca bíʼchibe ni nahuiiniʼ, zaca ca ni zá de laa stale dede zácacaʼ stale guidxi naroʼbaʼ».
20 Ne guluurube ndaayaʼ laacaʼ dxi que, ne guniʼbe:
«Ora cuʼ ca xiiñiʼ Israel ndaayaʼ, guzeetecaʼ laluʼ ra guiniʼcaʼ:“Guni Dios lii casi Efraín ne Manasés”».
Zaqué nga bisánirube Efraín nezalú Manasés ora guluube ndaayaʼ laacaʼ.
21 Despué gudxi Israel José: «Biaa, mayaca gateʼ, peru dxandíʼ peʼ qué zusaana Dios laatu ne zudxiguétabe laatu lu layú stiʼ ca bixhozebiidatu.
22 Ne cudieeʼ lii jma xiroobaʼ layú* que ca bíʼchiluʼ, layú ni guxhaʼ ca amorreu né espada ne arcu stinneʼ».
Nota
^ O «izquierdo».
^ Lit. «ni guzá ca bixhozeʼ Abrahán ne Isaac delante de laa».
^ O «guriá dani».
