Génesis 49:1-33
49 Ne biseendacaa Jacob ca xiiñiʼ, ne ná rabi laacabe: «Laguidxiña para gabeʼ laatu xi chiguizaacatu despué.
2 Laguidxiña ne lagucaadiaga naa, laatu, ca xiiñiʼ Jacob. Lagucaadiaga bixhózetu Israel.
3 »Rubén, lii nga baʼduʼ primé stinneʼ, stipa stinneʼ ne ra bizulú gupaʼ ca ni zá de naa. Lii nga ni jma biʼniʼ respetárcabe ne gúcaluʼ nadipaʼ.
4 Peru maʼ qué zasácaluʼ purtiʼ qué ñuudxiluʼ, gúcaluʼ casi nisa ni cadi nexhedxí ne gudxíʼbaluʼ lu cama stiʼ bixhózeluʼ. Dxi que, qué ñuni respetarluʼ* cama stinneʼ. ¡Ya, nga peʼ nga ni biʼniʼ Rubén!
5 »Simeón ne Leví, bíʼchicaʼ. Ne riquiiñecaʼ espada sticaʼ para guuticaʼ.
6 Cayabeʼ alma* stinneʼ, cadi guyúbiluʼ guidxaagaluʼ laacabe. Ne cayabeʼ ladxiduáʼ cadi guieeguluʼ laacabe, purtiʼ ra cadxiichicabe biiticabe binni ne pur gustu si bininácabe ñee toro.*
7 Gaca maldecir xiana stícabe, purtiʼ runinácabe ne gaca maldecir guendaridxiichi stícabe, purtiʼ qué riácabe. Zucheecheʼ laacabe lu layú stiʼ Jacob. Zucheecheʼ laacabe lu layú stiʼ Israel.
8 »Ne lii, Judá, zusisaca ca bíʼchiluʼ lii. Zanaazeluʼ yanni ca enemigu stiluʼ. Zuzuxibi ca xiiñiʼ bixhózeluʼ nezaluluʼ.
9 Ti liónhuiiniʼ nga Judá. Lii xiiñeʼ, zieluʼ dede ra nuu maniʼ ni chiguinaazeluʼ para goloʼ. Maʼ nexheʼ Judá ne caziilaʼdxiʼ casi ti lión. ¿Ne tu laa zaná chigucuaaniʼ ti lión yaʼ?
10 Qué zaxeleʼ cetru* stiʼ rey de Judá, nin bastón ni runi mandarnebe, ni nuu lade guiropaʼ batañeebe, qué zaxéleni de laabe dede ora gueeda Siló,* ne zuzuubaʼ ca guidxi ca stiidxabe.
11 Zundiibibe burru stibe lu ti lubaʼ uva ne zundiibibe cría stiʼ burru stibe lu ti lubaʼ uva de ni jma galán. Zaguiibibe xhábabe ndaaniʼ vinu ne lari ni rácube luguiáʼ zaguiibibe ni ndaaniʼ rini stiʼ uva.
12 Naxiñáʼ rini ca bizalube pur vinu ne naquichiʼ ca láyabe purtiʼ reʼbe leche.
13 »Zabeza Zabulón guriá nisadóʼ, gaxha de ra riaana barcu ni naaze ancla. Ne zindá frontera stibe neza riaana Sidón.
14 »Isacar nga ti burru ni naguidxi dxita ladi ni caziilaʼdxiʼ interu nuaaʼ chupa carga nanaa.
15 Ne zuuyaʼ galán lugar ra caziilaʼdxiʼ ne sicarú layú ca. Zandeteʼ xiʼqueʼ para guaʼ carga nanaa ne zuni dxiiñaʼ nadipaʼ.
16 »Dan, tobi de ca tribu stiʼ Israel, zuni juzgar xquidxi.
17 Zaca Dan ti beendaʼ ni nuu guriá neza, ti beendaʼ napa cachu ni nuu guriá ti nezahuiiniʼ, ni royaa xatiniñee caballu ne riabasá hombre ni dxiʼbaʼ laame.
18 Jehová Dios, zabezaʼ lii para gulaluʼ laadu.
19 »Ne Gad zucaalú ti grupu de gubaanaʼ laa, peru laa zudxiilú laacabe ne zazananda laacabe.
20 »Zapa Aser stale guendaró ne zápabe guendaró de ni ró rey.
21 »Neftalí nga ti bidxiña hembra ni nalaseʼ ne ni riníʼ diidxaʼ naxhi.
22 »José nga ti ramahuiiniʼ stiʼ ti yaga ni rudii cuananaxhi, ti yaga ni rudii cuananaxhi ni zuhuaa gaxha de ra cadá nisa, ni ruchiaaʼ ca rama stiʼ luguiáʼ muru.
23 Peru ca hombre ni rundaa flecha bicaalucaʼ laabe, bindaacaʼ flecha laabe ne qué nusaana de ñaca nanaláʼdxicaʼ laabe.
24 Peru qué nitende arcu stibe ne qué nusaana de ñaca nabe naguidxi ne nagueenda. Ne gúcani zacá pur pastor que, guié stiʼ Israel, pur ca náʼ ni napa poder ni racané Jacob.
25 Laabe* zeedabe de Dios stiʼ bixhózeluʼ, ne zacané Dios lii. Nuube tobi si né Dios ni jma napa poder, ne zaguu Dios ndaayaʼ lii né ca ndaayaʼ ni zeeda de guibáʼ, zaguube ndaayaʼ lii né ca ndaayaʼ ni zeeda de xagueteʼ lu guidxilayú ne zaguube ndaayaʼ lii ra gudiibe lii stale xiiñiluʼ ne stale maniʼ.
26 Jma zasaca ca ndaayaʼ stiʼ bixhózebe que ca ndaayaʼ ni rudii ca dani ni qué rinitilú ne jma zasácacani que ca cosa risaca ni rudii ca danihuiiniʼ ni qué rinitilú. Ziaana ca ndaayaʼ ca ique José, ziaanacani galaa ique ni bibí lade ca biʼchiʼ.
27 »Zuxuuxe Benjamín ni guinaazeʼ casi runi ti gueuʼ. Siadóʼ ca zobe ni gunaazebe ne huadxí zaguiizibe ni gúxhabe ca enemigu stibe».
28 Guirácabe nga ca 12 tribu stiʼ Israel, ne nga nga ni gudxi bixhózecabe laacabe ora guluu ndaayaʼ laacabe. Cada tobi bidiibe laa ndaayaʼ ni nexheʼ guicaa.
29 Despué de guníʼ Jacob ca cosa riʼ, ndiʼ nga ni gúdxibe ca xiiñibe: «Maʼ chiguiziiladxeʼ lade ca binni xquidxeʼ.* Lagucaachiʼ naa ra gaʼchiʼ ca bixhozebiidaʼ, ndaaniʼ cueva ni nuu lu layú stiʼ Efrón, hitita que.
30 Laani nga cueva ni nuu lu layú stiʼ Macpelá, frente de Mamré, lu región stiʼ Canaán. Laani nga layú ni guzíʼ Abrahán lu Efrón, hitita que, para gapa ti lugar ra igaachiʼ.
31 Raqué bigaachiʼ Abrahán ne xheelabe Sara. Raqué bigaachiʼ Isaac ne xheelabe Rebeca. Ne raqué bicaacheʼ Lea.
32 Layú ne cueva ni nuu raqué guzíʼ Abrahán cani lú ca xiiñiʼ Het».
33 Zaqué nga gudxi Jacob ca xiiñiʼ ximodo gucaachicaʼ laabe. Despué bidxiibaʼ ñeebe lu cama, gucuaabe bi últimu biaje ne biziiláʼdxibe lade ca binni xquídxibe.*
Nota
^ O «biʼniʼ biidiluʼ».
^ O «bigácabe tendón ñee ca toro».
^ Lá riʼ riniʼni “ni stiʼ”.
^ Raríʼ caniʼni de José.
^ Ndiʼ nga ti modo guníʼcabe dxiqué ora gatiʼ tuuxa.
^ Ndiʼ nga ti modo guníʼcabe dxiqué ora gatiʼ tuuxa.
