Génesis 8:1-22
8 Peru qué nusiaandaʼ* Dios Noé, nin ca maniʼ duxhuʼ ne nin ca maniʼ nadóʼ ni nuu ndaaniʼ arca que. Ngue runi biseendaʼ Dios ti bi gundubi lu guidxilayú, ne bizulú biete lu nisa que.
2 Bieeguʼ ca manantial stiʼ ca nisa ziáʼ ne ca compuerta stiʼ guibáʼ, ngue runi biaanadxí de guiaba nisaguié.
3 Chaahuiʼ chaahuiʼ, biete ca nisa que lu guidxilayú. Ne ra bizaa ti gayuaa cincuenta dxi maʼ biétecani stale.
4 Ne dxi 17 lu beeu gadxe, bicá arca que lu ca dani stiʼ Ararat.
5 Ne ziyete ca nisa que hasta lu beeu chii. Ne lu primé dxi stiʼ beeu chii que bizulú bihuinni punta ca dani que.
6 Gudiʼdiʼ si 40 dxi, bixheleʼ Noé ventana sti’ arca que
7 ne biseendabe ti cuervo, rieme ne ribiguétame dede ora bibidxi layú.
8 De raqué biseendaʼ Noé ti paloma para guʼyaʼ pa maʼ huaxiéʼ nisa nuu lu guidxilayú.
9 Peru qué nidxélame ra nuzuhuaame* purtiʼ nuchiiruʼ nisa que lu guidubi guidxilayú, ngue runi bibiguétame ra nuu arca que. Óraque bisigaanáʼ Noé para cuʼ paloma que ndaaniʼ arca que.
10 Gulézabe gudiʼdiʼ gadxe dxi ne biseendabe laame sti biaje fuera de arca que.
11 Ra maʼ ziyaaziʼ gubidxa biguetaʼ paloma que. ¡Ne biiyaʼ Noé neme lu xpícume ti bandaga stiʼ olivu casi biruuguʼ! Zaqué bidiibe cuenta maʼ biete nisa que lu guidxilayú.
12 Gulézabe gudiʼdiʼ si xcadxe dxi para biseendabe paloma que sti biaje, peru biaje riʼ maʼ qué nibiguétame.
13 Dxi napa Noé xhoopaʼ gayuaa ne ti iza, lu primé dxi stiʼ primé beeu, maʼ biete nisa que lu guidxilayú. Gundisaʼ Noé ti ndaa techu stiʼ arca que ne biiyabe cabídxiruʼ layú.
14 Ne dxi 27 lu guiropa beeu, maʼ bibidxi layú que.
15 Óraque gudxi Dios Noé:
16 «Bireené xheelaluʼ, ca xiiñiluʼ ne ca xuaalídxiluʼ de ndaaniʼ arca ca.
17 Ne gulee guiráʼ ni nabani: guiráʼ maniʼ ni ripapa, ni rizá layú ne ca ni rixubi ndaaniʼ. Zacá zadálecame lu guidxilayú, zápacame cría ne zácacame stale».
18 Ngue runi bireené Noé ca xiiñiʼ, xheelaʼ ne ca xuaalidxi de ndaaniʼ arca que.
19 Ne guiráʼ ca ni nabani, guiráʼ ca maniʼ ni rixubi ndaaniʼ ne guiráʼ ca maniʼ ni ripapa —guiráʼ ca ni riniibi lu guidxilayú— bireecame de ndaaniʼ arca que pur grupu.
20 Despué bizáʼ Noé ti altar* para Jehová ne gudíxhebe caadxi de ca maniʼ nayá ne caadxi de ca maniʼ ripapa ni nayá luni ne bidiibe laacame casi ofrenda ni riaʼquiʼ.
21 Ne yendá ti xhoʼ rindáʼ naxhi* ra nuu Jehová. Ngue runi guníʼ Jehová de ndaaniʼ ladxidóʼ: «Qué ziuuruʼ dxi guneʼ maldecir layú pur donda stiʼ binni, purtiʼ puru cosa malu si nuu ndaaniʼ ladxidóʼ binni guni dede dxi nahuiiniʼ. Maʼ qué ziuu dxi guniteluáʼ guiráʼ ni nabani sicaríʼ.
22 A partir de yannadxí, siempre ziuu siembra ne cosecha lu guidxilayú, nanda ne calor, tiempu nandáʼ ne tiempu nananda,* ridxíʼ ne huaxhinni».
Nota
^ Lit. «bietenalaʼdxiʼ».
^ Lit. «ti lugar ra niziilaʼdxiʼ ñeeme».
^ Lit. «ni riguixhedxí».
^ O «verano ne invierno».
