Génesis 9:1-29
9 Guluu Dios ndaayaʼ Noé ne ca xiiñiʼ, ne gúdxibe laacaʼ: «Lagapa stale xiiñitu, laguidale ne laguchá guidxilayú.
2 Guiráʼ ca ni nabani lu guidxilayú, ca maniʼ ripapa guibáʼ, guiráʼ ca ni riniibi lu guidxilayú ne ca benda ni nuu ndaaniʼ nisadóʼ, qué zusaana de guidxíbicaʼ laatu. Yanna cayaanacame lu natu.*
3 Zanda goto intiica maniʼ ni riniibi ne ni nabani. Cásica bidieeʼ guiráʼ ni rindani lu layú para goto, laaca cudieeʼ laatu ca maniʼ ca.
4 Ni cadi naquiiñeʼ si goto nga beela ni biucharini, purtiʼ rini ca nga guendanabani stini.
5 Ne cadi ngasi, pa guuti ti binni o ti maniʼ ti hombre, zanabaʼ laa quixe ni. Maniʼ ni guuti ti hombre naquiiñeʼ gatiʼ. Hombre ni guuti biʼchiʼ naquiiñeʼ quixe ni né xquendanabani.
6 Pa guxhii ti hombre rini stiʼ tuuxa, sti binni zuxhii rini stiʼ hombre ca, purtiʼ biʼniʼ Dios binni casi laa.
7 Ne laatu la? lagapa stale xiiñitu, laguidale ne laguchá guidxilayú».
8 Despué, gudxi Dios Noé ne ca xiiñiʼ:
9 «Yanna cayuneʼ ti acuerdu né laatu, né ca xiiñitu
10 ne guiráʼ ca ni nabani ni bireené laatu de ndaaniʼ arca —ca pájaru, ca maniʼ rizá layú ne guiráʼ ca ni nabani lu guidxilayú ni nuu ra nuutu—, guiráʼ ni nabani ni nuu lu guidxilayú.
11 Ndi’ nga acuerdu ni cayuneniá’ laatu: qué ziuuru’ dxi guedaniá’ ti diluvio para guniteluá’ guirá’ ca ni nabani nin para guniteluá’ guidxilayú».
12 Ne laaca guní’ Dios: «Ndiʼ nga señal stiʼ acuerdu ni cayuneniáʼ laatu ne guiráʼ ca ni nabani ni nuu ra nuutu ne para guiráʼ ca ni guibani despué:
13 cucaaʼ arcoíris stinneʼ lu ca za ca. Ne zaquiiñeʼ ni casi señal stiʼ acuerdu ni cayuneniáʼ guidxilayú.
14 Cada biaje guindisaʼ za guibáʼ para guiaba nisaguié, dxandíʼ peʼ zahuinni arcoíris lu ca za ca.
15 Óraque zietenaladxeʼ acuerdu ni bineniáʼ laatu ne guiráʼ ca ni nabani.* Maʼ qué ziuuruʼ dxi gaca ca nisa ca ti diluvio para gunitilú guiráʼ ca ni nabani lu guidxilayú.
16 Ora guihuinni arcoíris lu ca za ca, zuuyaʼ ni ne zietenaladxeʼ acuerdu ni qué ziuu dxi guiluxe, ni guca entre Dios ne guiráʼ ca ni nabani* lu guidxilayú».
17 Ne biguetaʼ gudxi Dios Noé: «Ndiʼ nga señal stiʼ acuerdu ni bineniáʼ guiráʼ ca ni nabani lu guidxilayú».
18 Ne ca xiiñiʼ Noé ni biree ndaaniʼ arca que nga, Sem, Cam ne Jafet. Despué beeda gaca Cam bixhoze Canaán.
19 Laacabe nga guionnaʼ xiiñiʼ Noé, ne de laacabe nga zeeda ca binni ni nabeza lu guidxilayú.
20 Yanna, bizulú Noé biʼniʼ dxiiñaʼ lu layú ne bizuhuaabe lubáʼ uva.
21 Ora güeʼbe vinu, guxúdxibe ne guleebe lari ládibe ndaaniʼ yoo de lari stibe.
22 Ne Cam, bixhoze Canaán, biiyaʼ bixhoze xieeladi ne gúdxibe ni guiropaʼ bíʼchibe ni nuu fuera.
23 Ngue runi gucuaa Sem ne Jafet ti lari, gudíxhecaʼ ni lu xíʼquecaʼ ne zibisacaʼ guyuucaʼ ndaaniʼ yoo que. Ne bitiixhilúcabe sti ladu ora bichéndacabe lari que bixhózecabe ti cadi gúʼyacabe laa xieeladi.
24 Ora biree nisa lú* Noé, bibani. Ne óraque gúnnabe xi biʼniʼ xiiñibe ni jma nahuiiniʼ laabe
25 ne guniʼbe:
«Guiaba maldición luguiáʼ Canaán.
Gácabe esclavu ni jma huaxiéʼ risaca stiʼ ca bíʼchibe».
26 Ne laaca guniʼbe:
«Guisaca Jehová, Dios stiʼ Sem.Gaca Canaán esclavu stibe.*
27 Gudii Dios Jafet ti layú naroʼbaʼne cueza Jafet ndaaniʼ ca yoo de lari stiʼ Sem.
Ne laaca gaca Canaán esclavu stibe».
28 Bibani Noé chonna gayuaa cincuenta iza jma despué de Diluvio que.
29 Biaʼsi gaʼ gayuaa cincuenta iza bibani Noé. De raqué guti.
Nota
^ O «nápatu autoridad luguiácame».
^ O «guiráʼ tipu de alma nabani».
^ O «guiráʼ tipu de alma nabani».
^ O «maʼ cadi naxudxi».
^ O «esclavu stiʼ Sem».
