Josué 24:1-33
-
Bisietenalaʼdxiʼ Josué guidxi que guiráʼ ni maʼ bizaaca guidxi Israel (1-13)
-
Guluube gana guidxi que guni ni ná Jehová (14-24)
-
«Naa ne ca ni nabeza ra lidxeʼ la? zuni adorardu Jehová» (15)
-
-
Acuerdu ni biʼniné Josué guidxi Israel (25-28)
-
Guti Josué ne bicaachicabe laa (29-31)
-
Bicaachicabe ca dxita ladi José guidxi Siquem (32)
-
Guti Eleazar ne bicaachicabe laa (33)
24 Para biseendacaa Josué guiráʼ tribu stiʼ guidxi Israel ndaaniʼ guidxi Siquem ne laaca biseendacaabe ca hombre huaniisi* stiʼ guidxi Israel, ca xaíque, ca juez ne ca hombre ni napa autoridad,* ne bidxíñacabe nezalú Dios ni dxandíʼ.
2 Para gudxi Josué guidubi guidxi que: «Ndiʼ nga ni ná Jehová, Dios stiʼ guidxi Israel: “Maʼ xadxí guleza ca bixhozebiidatu* chericaʼ Guiiguʼ* ca —dede né Taré, bixhoze Abrahán ne bixhoze Nacor—, ne biʼniʼ adorárcabe xcaadxi dios.
3 »”Gudiʼdiʼ si ti tiempu, biseendaʼ bixhozebiidatu Abrahán sti ladu Guiiguʼ ca, ne guzabe lu guidubi layú stiʼ Canaán ne bitaleʼ ca xiiñibe. Bidieeʼ laabe Isaac;
4 ne Isaac bidieeʼ laa Jacob ne Esaú. Despué bidieeʼ Esaú dani Seír; Jacob ne ca xiiñiʼ la? guyecaʼ Egipto.
5 Biseendaʼ Moisés ne Aarón raqué ne biseendaʼ plaga Egipto; despué guleeʼ laatu de raqué.
6 Dxi cabeeʼ ca bixhózetu de Egipto ne yendatu ruaa nisadóʼ, guzananda ca egipciu ca bixhózetu né carru rié lu guerra dede ruaa nisadóʼ Xiñáʼ.
7 Para bicaacabe ridxi naa, Jehová, ne guluaaʼ ti guelacahui galahuiʼ de laatu ne ca egipciu, bindaateʼ nisadóʼ que luguiacaʼ ne bilaahuacaʼ, ne laapetu bíʼyatu guiráʼ ni bineʼ ndaaniʼ guidxi Egipto. De raqué gulézatu stale iza* lu desiertu.
8 »”Ne yeniáʼ laatu lu layú stiʼ ca amorreu, ca ni guleza chericaʼ* guiiguʼ Jordán, ne bicaalúcabe laatu. Peru bisaanaʼ laacabe lu natu ti ganda guicaatu ca layú stícabe ne biniteluáʼ laacabe nezalutu.
9 De raqué bicaalú Balac xiiñiʼ Zipor, rey stiʼ Moab, guidxi Israel. Biseendatídxibe Balaam xiiñiʼ Beor para guinabaʼ guiaba maldición luguiatu.
10 Peru qué ninaʼyaʼ nucaadiaʼgaʼ Balaam. Nga runi guluube ndaayaʼ laatu stale biaje ne bilaʼyaʼ laatu de lu nabe.
11 »”De raqué gudiʼditu guiiguʼ Jordán ne yendatu Jericó. Ne ca xaíque stiʼ guidxi Jericó, ca amorreu, ca perizita, ca cananeu, ca hitita, ca guirgaseu, ca heveu ne ca jebuseu bicaalucaʼ laatu, peru naa bisaanaʼ laacabe lu natu.
12 Ne biiyatu modo bichibeʼ laacabe ne pur nga bixooñelúcabe de laatu, cásica bineʼ guiropaʼ rey stiʼ ca amorreu. Cadi pur espada ne arcu stitu.
13 Qué ñúnitu gastiʼ para gucuaatu layú riʼ ne ca guidxi riʼ, ne yanna maʼ nabézatu lúcani. Cayoto ni rudii ca lubáʼ uva ne ca yaga olivu ni qué nudxiibatu”.
14 »Nga runi, laguidxibi Jehová ne laguni ni nabe de guidubi ladxidoʼto* ne cadi gucheenetu laabe. Lacuee ca dios ni nuu ládetu, ni biʼniʼ adorar ca bixhozebiidatu chericaʼ Guiiguʼ ne ndaaniʼ guidxi Egipto, ne laguni adorar Jehová.
15 Yanna, pa qué natu guni adorartu Jehová, lacuí yannadxí tu racaláʼdxitu guni adorartu: ca dios ni biʼniʼ adorar ca bixhozebiidatu chericaʼ Guiiguʼ que la? o ca dios stiʼ ca amorreu, ca ni stiʼ layú ra nabézatu. Peru naa ne ca ni nabeza ra lidxeʼ la? zuni adorardu Jehová».
16 Para bicabi guiráʼ binni guidxi que: «Qué ziuu dxi tidiʼ ndaaniʼ íquedu gusaanadu Jehová ne guni adorardu xcaadxi dios.
17 Jehová, Dios stidu, nga gulee laadu ne ca bixhózedu de ndaaniʼ guidxi Egipto, ra guyuʼdu casi esclavu, ne bíʼnibe stale milagru naroʼbaʼ nezaludu, gúpabe laadu guiráʼ neza ra guzadu ne lade guiráʼ ca guidxi ra gudídidu.
18 Laaca guladxi Jehová guiráʼ guidxi, dede né ca amorreu, ni guleza lu layú riʼ. Nga runi laaca zuni adorardu Jehová, purtiʼ laabe nga Dios stidu».
19 Para gudxi Josué guidxi que: «Qué zanda diʼ guni adorartu Jehová, purtiʼ nácabe ti Dios santo; ti Dios ni rinabaʼ guni adorárcabe laa si. Qué zuni perdonarbe laatu pa gudxiidéchetu laabe ne gucheenetu laabe.
20 Pa gudxiidéchetu Jehová ne guni adorartu ca dios stiʼ xcaadxi guidxi, laaca zudxiidéchebe laatu ne zunduuxebe laatu. Nécaxa bíʼnibe stale cosa galán pur laatu».
21 Para bicabi ca binni guidxi que Josué: «¡Qué zúnidu nga, laadu la? zuni adorardu Jehová!».
22 Ngue runi gudxi Josué laacabe: «Laapetu cudii stiidxatu zuni adorartu Jehová». Para bicábicabe: «Dxandíʼ, laadu cudii stiidxadu».
23 «Yanna, lacuee ca dios stiʼ xcaadxi guidxi ca ládetu ne de guidubi ladxidoʼto laguni ni ná Jehová, Dios stiʼ guidxi Israel».
24 Para bicabi ca binni guidxi que Josué: «¡Zuni adorardu Jehová, Dios stidu, ne zuzúʼbadu stiidxabe!».
25 Dxi que nga biʼniʼ Josué ti acuerdu né ca binni guidxi que ne gudíxhebe ti regla para laacaʼ ndaaniʼ guidxi Siquem.
26 Para bicaa Josué ca diidxaʼ que lu libru ra cá Ley stiʼ Dios ne gudíxhebe ti guié ngola xaʼnaʼ ti yaga naroʼbaʼ ni zuhuaa cueʼ ti lugar risaca stiʼ Jehová.
27 Ne laaca gudxi Josué guidxi que: «Ora gúʼyatu guié riʼ, zietenaláʼdxitu guiráʼ ni gudxi Jehová laanu ne qué ziaandaʼ laatu tuu nga Dios stitu».
28 De raqué, cada tobi de ca binni que biguetaʼ lu layú ni gucuaa casi herencia.
29 Bizaaca si guiráʼ ndiʼ, guti Josué, xiiñiʼ Nun, siervu stiʼ Jehová,* dxi napa ti gayuaa chii iza.
30 Bicaachicabe laabe lu layú ni gucuaabe casi herencia, Timnat-Sérah, ni nuu lade dani stiʼ Efraín, ladu guiaʼ de dani Gaas.
31 Biʼniʼ guidxi Israel ni ná Jehová biaʼ dxi bibani Josué, hasta dxi bibani ca hombre huaniisi ni nabani ca dxi gutiʼ Josué, ca ni nanna guiráʼ ni biʼniʼ Jehová pur guidxi Israel.
32 Ne ca dxita ladi José, ni bedané ca israelita de Egipto, bicaachicabe cani Siquem, lu layú ni guzíʼ Jacob lu ca xiiñiʼ Hamor, bixhoze Siquem. Ne gucuaabe ni ti gayuaa moneda ne beeda gácani herencia stiʼ ca xiiñiʼ José.
33 Laaca guti Eleazar, xiiñiʼ Aarón. Bicaachicabe laabe lu dani stiʼ xiiñibe Finehás, lu layú ni bidiicabe laa lade dani stiʼ Efraín.
Nota
^ O «ca hombre ni napa autoridad».
^ O «ca funcionariu».
^ O «ca familia stitu ni bibani dxiqué».
^ Laca laani nga guiiguʼ Éufrates.
^ Lit. «stale dxi».
^ Ladu rindani gubidxa.
^ O «sin chuʼ ni quiñeyú laatu».
^ O «hombre ni biʼniʼ xhiiñaʼ Jehová».
