Apocalipsis 20:1-15
20 Ne biiyaʼ zedayete ti ángel de guibáʼ, naaze llave stiʼ abismo* que ne ti cadena roʼ.
2 Gunaazebe dragón que, beendaʼ yooxhoʼ que, laa nga Diablu* ne Binidxabaʼ, ne bindiibibe laa 1,000 iza.
3 Ne bilaabe laa ndaaniʼ abismo, ra biseeguyoobe laa, ne biʼniʼ sellarbe ni para maʼ cadi quíteruʼ ca guidxi ca dede ora maʼ bizaa 1,000 iza. Gaca si nga zalaabe ti tiempuhuiiniʼ si.
4 Biiyaʼ caadxi trono, ne gucuaa ca ni zuba lu ca trono que autoridad para guni juzgarcaʼ. Laaca biiyaʼ alma* stiʼ ca ni biiticabe* pur bidiicaʼ testimonio de Jesús ne pur guniʼcaʼ de Dios, ca ni qué ñuni adorar bestia salvaje que ne imagen stiʼ, ne qué nicá marca stime lu nacaʼ ne lucuacaʼ. Bibánicaʼ sti biaje ne biʼniʼ mandarnecaʼ Cristu 1,000 iza.
5 Laani nga primé resurrección. (Xcaadxi gueʼtuʼ que la? qué nibánidicaʼ dede óraruʼ bizaa 1,000 iza que).
6 Dichoso ne santo nga ni chuʼ lu primé resurrección; maʼ qué gapa guiropa guendaguti* autoridad luguiacaʼ, sínuque zácacaʼ sacerdote stiʼ Dios ne stiʼ Cristu, ne zuni mandarnecaʼ laabe 1,000 iza que.
7 Peru casi peʼ guiluxe 1,000 iza que, zaree Binidxabaʼ de ra deguyoo
8 para quiteʼ ca guidxi nuu lu guidapaʼ ladu guidxilayú —Gog ne Magog— ne para guni reunir laacabe para lu guerra. Stálecabe casi yuxi stiʼ nisadóʼ.
9 Ne bireechecabe lu guidubi guidxilayú ne guluucabe leʼ campamentu stiʼ ca santo ne guidxi ni nadxii Dios. Peru biaba bele de guibáʼ ne bizaaquiʼ laacabe.
10 Ne bilaa ángel que Binidxabaʼ,* ni caguite laacabe, ndaaniʼ lago de bele ne azufre, ra maca nuu bestia salvaje ne falsu profeta que. Zacanacaʼ* ridxíʼ ne huaxhinni para siempre.
11 Biiyaʼ ti trono blancu naroʼbaʼ ne biiyaʼ ni zuba luni. Biree guidxilayú ne guibáʼ de ra nuube, ne maʼ qué nihuínnirucaʼ.
12 Ne biiyaʼ zuhuaa ca gueʼtuʼ —ca ni huaniisi ne ca ni nahuiiniʼ— nezalú trono que, ne bixeleʼ caadxi rollo. Peru bixeleʼ sti rollo: laani nga rollo de guendanabani.* Ne guca juzgar ca gueʼtuʼ que pur ni bíʼnicaʼ, según ni cá lu ca rollo que.
13 Ne biʼniʼ entregar nisadóʼ ca gueʼtuʼ nuu ndaaniʼ, ne biʼniʼ entregar guendaguti ca gueʼtuʼ ni napa ne biʼniʼ entregar Baʼ* ca gueʼtuʼ nuu ndaaniʼ. Ne cada binni guca juzgar pur ni biʼniʼ.
14 Ne bilaacabe guendaguti ne Baʼ* ndaaniʼ lago de bele que. Runi representar lago de bele que guiropa guendaguti.
15 Ne bilaacabe guiráʼ ni cadi cá lá* lu libru de guendanabani* ndaaniʼ lago de bele.
Nota
^ Biiyaʼ Glosario ne nota stiʼ Apocalipsis 6:9.
^ Lit. «ca ni biiticabe né jacha».
^ O «muerte segunda».
^ O «Zieguyoocaʼ».
^ O «rollo de la vida».
^ O «xlá».
^ O «libru de la vida».
