Historia 14

Fe stiʼ Abraham bihuinni pa dxandíʼ ni

ÑEE zanda gúʼyaluʼ xi cayuni Abraham la? Naazebe ti gudxíu, ne ruluíʼ chiguutibe xiiñibe. Xiñee pue, primeru la? chiguidúʼyanu ximodo gupa Abraham ne Sara xiiñiʼ.

Bietenalaʼdxiʼ, Dios bizabiruaa de que zápacabe ti xiiñicabe. Biluíʼ ni nagana purtiʼ Abraham ne Sara guizáʼ maʼ bióʼxhocaʼ. Peru Abraham biʼniʼ cré de que Jiobá zanda guni ni ruluíʼ nagana. Pur nga, xi guca yaʼ.

Gudiʼdiʼ si ti iza de ni bizabiruaa Dios que la? Abraham gupa 100 iza ne Sara 90, óraque beeda gápacabe ti baʼduhuiiniʼ ni biree lá Isaac. ¡Dios biʼniʼ ni guníʼ que!

Peru biniisi si Isaac la? Jiobá biiyaʼ pa dxandíʼ fe stiʼ Abraham. Bicaabe ridxi: ¡Abraham! Ne Abraham bicabi: ¡Raríʼ nuaa! Óraque Dios guníʼ: Gucuaa xiiñiluʼ, tobi lucha xiiñiluʼ Isaac, ne guyé lu dani ra chiguluéʼ lii riʼ. Racá biiti laabe ne bidii laabe naa.

¡Pabiáʼ bisiuubaʼ ndiʼ ladxidóʼ Abraham yaʼ, purtiʼ laabe guizáʼ nadxiibe xiiñibe! Ne bietenalaʼdxiʼ, Dios bizabiruaa de que ca xiiñiʼ Abraham zabánicaʼ ndaaniʼ guidxi Canaán. Peru ximodo gaca ndiʼ pa gati Isaac yaʼ. Abraham qué guiene diʼ xi cayaca, peru bizuubarube stiidxaʼ Dios.

Ora yendabe lu dani que la? Abraham bindiibibe Isaac ne gudíxhebe laa lu ti altar ni bíʼnibe. Óraque guleebe gudxíu que para guutibe xiiñibe. Peru oraqueca ángel stiʼ Dios bicaa ridxi: ¡Abraham, Abraham! Ne Abraham bicabi: ¡Raríʼ nuaa!

Cadi guninaluʼ ne cadi guʼnuʼ gastiʼ hombrehuiiniʼ ca, na Dios. Yanna maʼ nannaʼ napuʼ fe naa, purtiʼ qué nucueezaluʼ xiiñiluʼ de naa, tobi lucha xiiñiluʼ.

¡Biiyaʼ pabiáʼ fe gupa Abraham! Laabe biʼniʼ crebe de que para Jiobá la? gastiʼ nagana ne Jiobá ñanda nindisaʼ Isaac de lade gueʼtuʼ. Peru dxandipeʼ Dios qué ñacalaʼdxiʼ diʼ ñuuti Abraham Isaac; Dios biʼniʼ de que ti dendxuʼ guirenda lade ca yaga nuu gaxha de raqué ne gúdxibe Abraham guuti manihuiiniʼ que ne maʼ cadi Isaac diʼ.

Génesis 21:1-7; 22:1-18.