Historia 88

Juan ruguunisa Jesús

BIIYAʼ paloma zeeda yete luguiáʼ hombre ca. Laabe nga Jesús. Yanna maʼ nápabe 30 iza. Ne hombre ni nuuné laabe racá nga Juan. Maʼ bizíʼdinu caadxi de laabe. Rietenalaʼdxuʼ ora María yeganna Elisabet ne baʼduhuiiniʼ nuu ndaanibe que biecheʼ la? Pue baʼduhuiiniʼ caʼruʼ gale que nga Juan. Peru, xi cayuni Juan ne Jesús yanna pue.

Juan la? cásipeʼ guluube Jesús ndaaniʼ nisa stiʼ guiiguʼ Jordán. Zacá nga riuunísacabe. Ruguucabe guidubi naca binni ndaaniʼ nisa ne despué ribeecabe laacaʼ. Sicaríʼ runi Juan ca binni que; nga runi ribee lácabe laabe Juan ni ruguunisa. Peru xiñee guluunísabe Jesús yaʼ.

Buenu, Juan guluunísabe Jesús purtiʼ laa guyé ra nuube ne gudxi laabe uguunísabe laa. Juan ruguunisa binni ni racalaʼdxiʼ gusihuinni de que guizáʼ feu nuu pur guiráʼ ni maʼ biʼniʼ. Peru, huayuni Jesús xiixa ni guchiiñaʼ laa la? Coʼ, Jesús qué huayuni diʼ gastiʼ, purtiʼ laabe nga Xiiñiʼ Dios ni beeda de guibáʼ. Ngue runi, nuu xi pur laabe gunábabe Juan uguunisa laabe. Guidúʼyanu xi laani.

Ante cheʼ Jesús ra nuu Juan la? nácabe carpinteru. Ti carpinteru nga ni runi mexaʼ, asientu, ne banguʼ. José xheelaʼ María, gúcabe carpinteru ne laabe bisiidibe Jesús dxiiñaʼ ca. Peru Dios cadi biseenda Xiiñiʼ lu Guidxilayú riʼ para gaca carpinteru. Laabe nápabe ti dxiiñaʼ risaca para Jesús ne yanna maʼ bidxiña dxi gúnibe ni. Ngue runi, para gusihuínnibe de que zeedabe para gúnibe ni na Bixhózebe la? Jesús rinábabe Juan uguunisa laabe. Ñee guyuulaʼdxiʼ Dios ndiʼ la?

Guyuulaʼdxiʼ, purtiʼ despué de biree Jesús ndaaniʼ nisa que la? biree ti ridxi de guibáʼ ne na: Ndiʼ nga Xiiñeʼ ni nadxieʼ ne ni rusiecheʼ naa. Laaca bixaleʼ guibáʼ ne riete paloma riʼ luguiáʼ Jesús. Peru cadi dxandíʼ diʼ ti paloma nga ni riete. Sínuque, espíritu santu stiʼ Dios.

Yanna huaxa Jesús napa stale ni guiníʼ ique, nga runi ruyúbibe ra chuʼbe stúbibe, ne raqué riaanabe cuarenta dxi. Raqué rie Binidxabaʼ ra nuube. Chonna tiru gucalaʼdxiʼ Binidxabaʼ nucheené Jesús ca ley stiʼ Dios. Peru Jesús qué runi diʼ ni nabe.

Despué de ngue la? Jesús ribiguétabe ne binibiaʼbe caadxi hombre ni yenanda laabe primé, ni laaca lacaʼ discípulo. Caadxi de laacabe nga: Andrés, Pedru (ni laaca láʼ Simón), Felipe ne Natanael (ni laaca láʼ Bartolomé). Jesús ne ca hombre riʼ riécabe Galilea. Rindácabe Caná xquidxi Natanael, raqué lu ti guendaxheelaʼ rúnibe primé milagru stibe. Nannuʼ xi laani la? Rúnibe nisa vinu.

Mateo 3:13-17; 4:1-11; 13:55; Marcos 6:3; Juan 1:29-51; 2:1-12.