Adán ne Eva gúpacaʼ xiiñicaʼ, ne qué nindaa bidale binni lu Guidxilayú riʼ. Laaca guyuu xcaadxi ángel ni yenanda Binidxabaʼ ne bidxiidéchecaʼ Dios.

Biétecabe de guibáʼ ne gúcacabe casi binni guidxilayú para guichaganácabe gunaa. Nabé malu guca ca xiiñicabe ne jma nadipaʼ gúcacaʼ que xcaadxi binni.

Bidale binni malu lu Guidxilayú. Biblia na dxiqué «bidale guendaquéiquiiñeʼ ni cayuni binni ndaaniʼ guidxilayú riʼ» ne nisi bicaa ique binni guni cosa malu.

Nabé nachaʼhuiʼ guca Noé. Gudxi Jiobá laabe chigusaba ti nisaguié naroʼbaʼ para gunitilú ca binni malu.

Gudxi Dios laabe gúnibe ti arca, o ti caja de yaga ni cadi guiaaziʼ ndaaniʼ nisa. Ne gudxi laabe cuʼbe binnilídxibe ndaaniʼ ni ne guiráʼ clase maniʼ.

Noé gudxi ca binni que chigueeda ti nisaguié naroʼbaʼ, peru qué nucaadiágacabe laabe. Nuu tu bixidxi laabe ne nuu tu bidxiichiné laabe.

Biluxe si Noé arca que, guluube ca maniʼ que ndaaniʼ ni.