LU GUIROPAʼ capítulo ni gudiʼdiʼ ca guninu ximodo biasa caadxi binni ni guti dxiqué. Pándacabe yaʼ.... Gaayuʼ. Panda de laacabe nahuiiniʼ.... Chonna, ne stobi que ti baʼdunguiiu. Xi rábiluʼ rusiidiʼ cani laanu yaʼ....

Rusiidiʼ ni laanu nadxii Dios ca baʼduhuiiniʼ ne cani jma maʼ huaniisi. Peru laaca zandísabe stuudxi binni. Ñee puru binni si ni guca nachaʼhuiʼ la?... Zándaca guiníʼ íquenu zacá. Peru nuu stálepeʼ binni ni qué liica ñánnacaʼ tupeʼ nga Jiobá Dios ne Xiiñiʼ. Bíʼnicabe cosa malu purtiʼ nga nga ni biziidicabe. Ñee raʼbuʼ laaca zandisaʼ Jiobá laacabe la?...

Biblia na: «Zusibani Dios gueʼtuʼ, cásica ni nachaʼhui zaqueca ni cadi nachaʼhuiʼ» (Hechos 24:15). Xiñee ziasa cani qué ñaca nachaʼhuiʼ o cani qué ñuni ni jneza yaʼ.... Purtiʼ qué ñanda niziidicabe de Jiobá nin ni racaláʼdxibe gúninu.

 Yanna, padxí ndiʼ raʼbuʼ guiasa ca gueʼtuʼ ca yaʼ.... Guníʼ ique ndiʼ: ora guti Lázaro, Jesús gúdxibe Marta: «Zabani bizaʼna luʼ», para na rabi laabe: «Nanna zabani be dxi iluxe guidxilayú», lu últimu dxi (Juan 11:23, 24). Xii ngue gucalaʼdxiʼ Marta niníʼ ora na ziasa Lázaro lu últimu «dxi» que yaʼ....

Marta binadiaga ora guníʼ Jesús sicaríʼ: Guiráʼ cani nuu ndaaniʼ ca baʼ ca zareecaʼ (Juan 5:28, 29). Últimu «dxi» ca nga ora guibiguetaʼ guibani guiráʼ gueʼtuʼ ni nuu lu xquendabiaaniʼ Dios. Cadi ti dxi diʼ ni napa veinticuatro hora ni, sínuque de ti mil iza. Biblia na zabidxi Dios cuenta binni guidxilayú dxi ca, ne ládecabe ziuu cani guiasa (Hechos 17:31; 2 Pedro 3:8).

Guníʼ ique si pabiáʼ galán zaca dxi ca. Lu ti mil iza ca ziasa stale binni ni maʼ guti. Jesús guníʼ Paraísu nga láʼ ra chindeza cani guiasa ca. Paraa ndiʼ chichuu Paraísu ca, ne ximodo zácani yaʼ. Guidúʼyanu.

Biaʼ chonna ora ante gati Jesús lu yaga que, guníʼnebe hombre ni cá gaxha de laabe de Paraísu riʼ. Hombre que malu laa, bíʼnibe stale ni qué iquiiñeʼ, ne gudíxhecabe dxi gátibe. Peru despué de biiyabe Jesús ne binadiágabe ni guníʼ binni de laa la? biʼniʼ crebe, ngue runi gunábabe laa: «Jesús, bietenalaʼdxi naa ora gueda guni mandar luʼ». Jesús bicabi laabe: Dxandipeʼ zabeʼ lii yannadxí: Ziuuneluʼ naa ndaaniʼ Paraísu (Lucas 23:42, 43).

 Xi nuu Jesús niníʼ ne ca diidxaʼ que yaʼ. Paraa ndiʼ nuu Paraísu riʼ.... Guníʼ ique si: paraa ndiʼ guyuu Paraísu que dxiqué yaʼ.... Bietenalaʼdxiʼ, Dios guluu primé hombre, Adán, ne xheelaʼ ndaaniʼ ti paraísu lu Guidxilayú riʼ. Biree lani jardín stiʼ Edén. Ndaaniʼ jardín que guyuu stale maniʼ, peru qué ñuninádicame guirutiʼ. Laaca guyuu jma yaga ni bidii cuananaxhi nanixe, ne ti guiiguʼ naroʼbaʼ. Guizáʼ sicarú raqué para guibani binni (Génesis 2:8-10).

Nga runi, ora rúʼndanu ziuu hombre malu que ndaaniʼ Paraísu la? naquiiñeʼ guiníʼ íquenu Guidxilayú riʼ maʼ naca ti lugar guizáʼ sicarú para guibani binni. Yanna pue, ziuuné Jesús hombre ni guca malu que ndaaniʼ Paraísu lu Guidxilayú riʼ la?... Coʼ. Ñee nannuʼ xiñee la?...

Purtiʼ Jesús ziuu guibáʼ, dede racá zuni mandarbe ndaaniʼ Paraísu ni chichuu lu guidxilayúʼ riʼ. Zanda guiénenu ziuuné Jesús hombre ca purtiʼ zandísabe laa ne zudiibe guiráʼ ni iquiiñeʼ. Peru xiñee zudiibe lugar guibani ti hombre malu ndaaniʼ Paraísu ca yaʼ.... Guidúʼyanu pa ganda guiénenu xiñee.

Ante guiniʼné hombre riʼ Jesús, ñee nánnabe de cani chiguni Dios la?... Coʼ, qué gánnabe. Bíʼnibe cosa malu purtiʼ qué ñánnabe ni dxandíʼ de Dios. Peru ndaaniʼ Paraísu ca zaziidibe xi  chiguni Jiobá para binni guidxilayú ne racá zanda gusihuínnibe dxandíʼ nadxiibe Dios ra gúnibe ni na.

Ñee ndaaniʼ Paraísu ca nga chiguibani guiráʼ binni ni guiasa ca la?... Coʼ. Nannuʼ xiñee la?... Purtiʼ caadxi binni ziasa para guibaniné Jesús guibáʼ. Zuni mandarnécabe laabe lu Guidxilayú riʼ ora maʼ nácani ti paraísu. Guidúʼyanu ximodo nánnanu ni.

Gueelaʼ ante gati Jesús la? gúdxibe ca apóstol stibe: Nuu stale lugar ra chuʼtu guibáʼ, ralidxi Bixhozeʼ. Yanna maʼ chaa, chiguneʼ chaahueʼ ti lugar para laatu. Óraque gúdxibe laacaʼ: Zabiguetaʼ guedacaa laatu, ti ra chuaa la? laaca chuʼtu (Juan 14:2, 3).

Paraa guyé Jesús despué de biasa yaʼ.... Bibiguétabe guibáʼ ra nuu Bixhózebe (Juan 17:4, 5). Ngue runi Jesús gúdxibe ca apóstol  stibe ne stuudxi discípulo que zandísabe laacaʼ para chúʼnebe laacaʼ guibáʼ. Xi gúnicabe raqué yaʼ.... Biblia na «cani ibani primé» ca zabánicabe guibáʼ «ne zuni mandar né cabe laa[be] ti mil iza» lu Guidxilayú riʼ (Apocalipsis 5:10; 20:6; 2 Timoteo 2:12).

Panda binni nga «cani ibani primé», ne guni mandarnecaʼ Jesús yaʼ.... Maestru Ni Jma Nanna Gusiidiʼ que gúdxibe ca apóstol stibe: «Cadi idxibi tu, dendxu huiini stinne caʼ, purti neca huaxiéʼ tu peru rieche Bixhoze tu gudii laatu» Reinu stiʼ (Lucas 12:32). Ca dendxuhuiiniʼ ca nga tuudxi binni nuu lu Guidxilayú riʼ, maca nuu pándacabe ne laacabe nga chiguiásacabe para chúʼnecabe Jesús guibáʼ dede ra chiguni mandar. Biblia na «ti gayuaa cuarenta y cuatro mil binni» nga laacabe (Apocalipsis 14:1, 3).

Panda binni nga chiguibani ndaaniʼ Paraísu lu guidxilayú riʼ yaʼ.... Biblia qué ruzeeteʼ diʼ ni. Peru Dios gudxi Adán ne Eva ora nuucaʼ ndaaniʼ jardín que, gápacaʼ xiiñicaʼ ne guchacaʼ Guidxilayú. Neca qué ñúnicabe ni la? Dios zuuyaʼ chuʼ binni nachaʼhuiʼ lu Guidxilayú riʼ casi modo gudixhe íquebe (Génesis 1:28; Isaías 45:18; 55:11).

Guníʼ ique si pabiáʼ galán nga guibáninu ndaaniʼ Paraísu ca. Guidubi Guidxilayú riʼ zahuinni ni casi ti parque guizáʼ galán, purtiʼ ziuu yaga ne guieʼ de guiráʼ clase ne ziuu stálepeʼ manihuiiniʼ ripapa ne stuudxi maniʼ. Guirutiʼ tu zacaná pur guendahuará ne guirutiʼ tu zati. Guiráʼ binni zaca xhamígucaʼ. Pa riuláʼdxinu guibáninu ndaaniʼ Paraísu ca sin qué chuʼ dxi gátinu la? yanna nga naquiiñeʼ chuʼnu listu para guibáninu ndaaniʼ ni.