ÑEE runibiaʼluʼ tuuxa binni huará la?... Zándaca liipeʼ gaca huaraluʼ nuu tiru. Guinaazeʼ ti guidxagáhuiiniʼ lii o ti yuubaʼ ndaaniʼ. Peru nuu binni jma huaracaʼ que stuudxi. Ne nuucaʼ dede nin qué randa riásacaʼ stúbicaʼ, jmaruʼ si pa maʼ nagólacaʼ.

Guiráʼ binni nuu tiru raca huará. Nannuʼ xiñee raca huará binni, rioʼxhoʼ ne rati la?... Jesús bisihuinni xi pur ridídinu cani ora yenécabe ti hombre ni qué ganda sáʼ ra nuube. Chitidxeʼ lii xi guca.

Jesús nuu ndaaniʼ ti yoo gaxha de nisadóʼ stiʼ Galilea, raqué yeguuya stale binni laabe. Guizáʼ stale binni que dede bidxá yoo que. Nin ra puertaʼ que qué ganda guidxíñacabe. Peru guyeruʼ jma binni. Tuudxi binni yené ti hombre ni maʼ guti ti galaa ra nuu Jesús ne cumu qué ganda sabe la? gupa xidé yené tapa hombre laabe lu ti camahuiiniʼ.

Ñee nannuʼ xiñee yenécabe hombre huará riʼ ra nuu Jesús la?... Purtiʼ gúpacabe fe zacané Jesús laabe ne zusianda guendahuará stibe. Peru cumu dxaʼ binni ndaaniʼ yoo que la? ximodo raʼbuʼ bichíñacabe laabe ra nuu Jesús yaʼ....

Lu dibuju ca zanda guʼyuʼ ximodo bíʼnicabe ni. Primé la? bidxiibacabe hombre que ique yoo, despué gudxiidecabe ique ni, últimu guluucabe laabe ndaaniʼ yoo que. ¡Nabé stale fe gúpacabe!

Guiráʼ binni nuu ndaaniʼ yoo que bidxagayaacaʼ pur ni guca  que. Hombre que biaana galaapeʼ de ca binni que. Nouʼ bidxiichi Jesús ora biʼyaʼ ni biʼniʼ ca hombre que la?... Coʼ, qué nidxiichidibe. Biéchebe ora bíʼyabe napa ca binni que fe. Gúdxibe hombre ni guti galaa que: «Ma bine perdonar xpecadu lu».

Tuudxi de ca binni que qué ñuláʼdxicaʼ ni guníʼ Jesús que, purtiʼ guníʼ íquecabe qué zanda diʼ guni perdonarbe stonda binni. Ngue runi, para gusihuínnibe zanda gúnibe ni la? gúdxibe hombre huará que: Biasa, gundisaʼ camahuiiniʼ stiluʼ, ne guyé raliʼdxuʼ.

 Ora guníʼ Jesús ca diidxaʼ riʼ la? biándaca hombre que. Gunda biásabe laasibe ne guzabe. Ca binni biʼyaʼ milagru riʼ bidxagayaacabe stale. Qué huayuu dxi gúʼyacabe xiixa casi ngue. Bisisácacabe Jiobá pur bidii laacabe Maestru Ni Jma Nanna Gusiidiʼ que para cuee dede ca guendahuará ca (Marcos 2:1-12).

Xi rizíʼdinu de milagru riʼ yaʼ.... Rizíʼdinu napa Jesús poder para guxhá stóndanu ne gusianda binni huará. Peru rizíʼdinu sti cosa jma risaca: raca huaranu pur stóndanu.

Cumu guiranu raca huaranu nuu tiru la? riníʼ nga guiranu nápanu donda la?... Ya, Biblia na guiranu ralenenu donda. Nannuʼ xii nga galené binni donda la?... Nga nga ora rálenu maca binni ruchee laanu. Nuu tiru rúninu xiixa ni cadi jneza nécapeʼ qué racaláʼdxinu. Peru xiñee guiranu nácanu binni ruchee yaʼ....

Purtiʼ Adán, primé hombre que bichee ra qué ñuni ni na ley stiʼ Dios. Ne pur nga guiranu biaananenu donda stibe. Nannuʼ ximodo la? Chigusiene lii para ganda guieʼnuʼ ni.

Zándaca huayuuyaluʼ gúnicabe pan ndaaniʼ ti molde. Ximodo zaree pan ca pa nataadxiʼ, o nataabaʼ, cueʼ molde que yaʼ. Nannuʼ ximodo la?... Cadi dxandíʼ nga intiica pan ni gaca ndaaniʼ molde que zaree nataadxiʼ, o nataabaʼ la?...

 Adán nga casi molde que, ne laanu nga casi pan que. Ra qué ñuni Adán ni na ley stiʼ Dios, beeda gácabe ti binni ruchee. Ne zacá la? casi ora ñápabe ti marcahuiiniʼ. Ngue runi, ora gule ca xiiñibe, ximodo raʼbuʼ gúcacaʼ yaʼ.... Guiracaʼ gúpacaʼ marcahuiiniʼ que, o gúcacaʼ binni ruchee.

Stale baʼduhuiiniʼ qué rihuínnica pa gulenecaʼ donda purtiʼ qué riaadxaʼ diʼ nacaʼ ne ñeecaʼ. Peru guendaruchee ni gulenecaʼ, nga si runi huará laacaʼ ne despué ráticaʼ.

Peru nuu binni jma raca huará que stuudxi. Xiñee raca ndiʼ yaʼ. Nouʼ purtiʼ jma gulenécabe donda la?... Coʼ, ngueca donda ralenenu. Guiranu ralenenu guendaruchee ne pur nga raca huaranu. Dede cani runi stipa pur gúnicaʼ ni na ley stiʼ Dios raca huaracaʼ.

Yanna, xiñee nuucabe jma raca huarácabe que stuudxi pue.... Nuu stale razón. Zándaca qué gápacabe stale ni gócabe o cani rócabe qué rudii stipa laacabe. Ne zándaca rócabe stale dxiñahuiiniʼ o xiixa biruuchu. Stobi nga pa rásicabe maʼ huaxhinni ne qué rasi chaahuicabe. O que riréndacabe lari ora nananda. Nuu binni nabé nadá, ne qué randa runi huantar guendahuará neca gápacaʼ laacaʼ.

Raʼbuʼ zadxiña dxi maʼ qué zaca huaranu la? Ziuu dxi maʼ cadi gápanu donda la?... Xi biʼniʼ Jesús ne hombre ni guti  galaa que yaʼ.... Biʼniʼ perdonarbe ca donda stiʼ ne bisiándabe laa. Ne ni guca riʼ la? Jesús biluíʼ xi chiguni despué para ca binni ni runi stipa pur gúnicaʼ ni jneza.

Pa gusihuínninu qué riuláʼdxinu gucheʼnu ne gacananaláʼdxinu cosa malu la? Jesús zusianda laanu. Cumu laabe nga Rey stiʼ Reinu stiʼ Dios la? zabeebe guendaruchee ni nápanu yanna. Donda ca qué zanitilú diʼ ni nagueendaca, sínuque chaahuidugá. Ne ora maʼ guiree ni la? maʼ qué ziuu dxi gaca huaranu. Guiranu ziuʼnu nazaaca ne maʼ qué zápanu nin ti donda. ¡Guizáʼ sicarú nga xa!