NUU tiru Jiobá runi xiixa guendaridxagayaa para gulá ca hombrehuiiniʼ ni qué zanda gápacaʼ laacaʼ. Pa cheluʼ neza ra ñaa, o laʼchiʼ la? zándaca gúʼyaluʼ gaca xiixa casi ni runi Jiobá, neca qué guienegaluʼ xii ngue cayaca.

Guiníʼ íquenu zeluʼ neza raqué, málasi gúʼyaluʼ zeeda guipapa ti manihuiiniʼ ne bizuhuaame gaxha de lii. Ruluíʼ gucaname purtiʼ caxuubi ti xiaame layú. Ora gacaláʼdxiluʼ guidxíñaluʼ laame la? zaxéleme, ne pa guidxíñaruluʼ la? zaxéleme jma. Málasi guipápame. Laame cadi gucanádime. Nannuʼ xii ngue guca la?...

Gaxha de ra biéteme que nuu ca xiiñihuiinime gáʼchicaʼ lade ca guixi gáʼ que. Jñaacame bidxibi nidxeʼluʼ laacame ne ñuninaluʼ laacame. Ngue runi bíʼnisime casi ora gucaname para guxháleme lii de raqué. Ñee nannuʼ tu zanda gapa laanu cásica manihuiiniʼ ni gupa ca xiiñihuiiniʼ que la?... Ndaaniʼ Biblia rieeteʼ zeeda gaca Jiobá casi ti manihuiiniʼ ni láʼ bisiá, o águila, ni rapa ca xiiñihuiiniʼ (Deuteronomio 32:11, 12).

Jesús nga ni jma nadxii Jiobá lade ca xiiñiʼ. Dxi bibánibe guibáʼ la? gúcabe ti espíritu guizáʼ  nadipaʼ casi bixhózebe ne gunda gúpabe laabe. Peru ora gúlebe lu Guidxilayú riʼ la? beeda gácabe ti baʼduhuiiniʼ ni biquiiñeʼ chuʼ tu gapa laa.

Yanna para ganda gúnibe dxiiñaʼ ni bidii Jiobá laabe la? naquiiñeʼ guiniisibe ne gácabe ti hombre sin donda. Peru ante guiniisibe la? Binidxabaʼ gucalaʼdxiʼ ñuuti laabe. Guizáʼ sicarú nga gúʼndanu historia ra rihuinni ximodo gucalaʼdxiʼ Binidxabaʼ ñuuti laabe dxi nahuiinibe ne ximodo bilá Jiobá laabe. Riuláʼdxiluʼ gunadiágaluʼ ni la?...

Despué de gule Jesús la? Binidxabaʼ bisihuinni ti biaaniʼ neza ra rindani gubidxa casi ti beleguí, o estrella. Tuudxi hombre ni ruundacaʼ de ca beleguí ca, yenándacaʼ ni ne guzacaʼ gayuaa kilómetru dede bidxíñacaʼ Jerusalén. Raqué gunabadiidxacabe paraa chigale ni chigaca rey stiʼ ca judíu que. Despué gunabadiidxacabe tuudxi hombre ni ruundaʼ Biblia, ne laacaʼ guniʼcaʼ: «Ndaani guidxi Belén» (Mateo 2:1-6).

Ora gunna Herodes, rey malu ni nuu Jerusalén que gule sti  rey ndaaniʼ guidxi Belén la? gúdxibe ca hombre ni ruundaʼ de ca beleguí que: Lachiyubi baʼduhuiiniʼ ca, ne ora guidxélatu laabe la? laguibiguetaʼ para gábitu naa. Ñee nannuʼ xiñee gucalaʼdxiʼ Herodes guidxela Jesús la?... ¡Purtiʼ bidxiichibe gule sti rey, ne nuube guutibe laa!

Ximodo gupa Dios xiiñiʼ yaʼ.... Bidxela si ca hombre que Jesús ne bisigáʼdecabe laabe stale cosa la? Dios gudxi laacabe lu ti bacaandaʼ cadi guibiguétacabe ra nuu Herodes. Ngue runi, gucuaacabe sti neza para bibiguétacabe xquídxicabe, ne maʼ qué nidíʼdicabe Jerusalén. Ora gunna Herodes maʼ zeʼ ca hombre que guizáʼ bidxiichi. Cumu nuube guutibe Jesús la? biʼniʼ mandarbe gati guiráʼ baʼduhuiiniʼ ni caʼruʼ gusaa chupa iza ni nuu Belén. Peru Jesús maʼ qué guinni diʼ raqué.

Ñee nannuʼ ximodo bilabe la?... Zeʼ si ca hombre ruundaʼ de ca beleguí que, Jiobá gúdxibe José, xheelaʼ María, cheʼ Egipto. Raqué bilá Jesús de Herodes, rey malu que. Gudiʼdiʼ si tuudxi iza, María ne José bibiguetanécabe Jesús de Egipto; óraque Dios guniʼné José sti biaje. Lu ti bacaandaʼ gudxi Dios laabe chebe Nazaret; raqué qué zaca diʼ baʼduhuiiniʼ que gastiʼ (Mateo 2:7-23).

Ñee riéneluʼ ximodo bilá Jiobá xiiñiʼ la?... Tuu nga raʼbuʼ zeeda gaca casi ca manihuiiniʼ ni bicaachiʼ jñaacaʼ laacaʼ lade ca guixi gáʼ que yaʼ. O casi Jesús dxi nahuiiniʼ yaʼ. Cadi zaqueca nga lii la?... Laaca nuu tu racalaʼdxiʼ guniná lii. Nannuʼ tu laacabe la?...

 Biblia na Binidxabaʼ zeeda gaca casi ti lión ni cuguu beedxeʼ ni nuu gó laanu. Cásica ca lión ca nabé ruyúbicaʼ manihuiiniʼ para gocaʼ, zacaca nga Binidxabaʼ ne ca demonio stiʼ nabé ruyúbicaʼ baʼduʼ para guninacaʼ (1 Pedro 5:8). Peru Jiobá jma nadipaʼ que Binidxabaʼ ne zanda gápabe ca baʼduʼ ni cayuni ni nabe o zacanebe laacaʼ lu intiica cosa malu ni guni Binidxabaʼ laacaʼ.

Cásica bíʼyanu lu capítulo 10 stiʼ libru riʼ, xi racalaʼdxiʼ Binidxabaʼ ne ca demonio stiʼ gúninu yaʼ.... Racaláʼdxicabe gúninu xiixa ni na Dios cadi jneza, casi gatanenu tuuxa ne gúninu cosa malu. Rietenaláʼdxiluʼ tu laa si ndiʼ zanda gátacaʼ juntu la?... Ti hombre ne ti gunaa ni maʼ bichaganáʼ si.

Peru guizáʼ feu nga gánnanu nuu binni huaniisi ni riuláʼdxicaʼ gatanecaʼ baʼduʼ ne gúnicaʼ cosa malu ne laacabe. Nuu tiru ca baʼduʼ ca rúnicaʼ cosa malu ni riziidicaʼ de cani huaniisi ca, ne riquiiñecaʼ ra nácacaʼ dxaapahuiiniʼ o ra nácacaʼ hombrehuiiniʼ para gúnicaʼ cosa malu. Zacá guca ndaaniʼ guidxi Sodoma maʼ raca stale iza. Biblia na «dede nahuiiniʼ hasta binnigola», gucaláʼdxicaʼ ñatanecaʼ ca hombre ni guyé ra nuu Lot que (Génesis 19:4, 5).

Cásica Jesús biquiiñeʼ tu gupa laa, lii laaca caquiiñeluʼ tu gapa lii de cani huaniisi ca ne de stuudxi hombrehuiiniʼ o dxaapahuiiniʼ ni racaláʼdxicaʼ gatanecaʼ lii ne guninecaʼ lii cosa malu. Ca binni riʼ riníʼsicabe xhamígucabe lii. Zándaca guiníʼcabe gudiicabe lii xiixa pa cadi gaʼbuʼ guirutiʼ. Peru ni dxandíʼ nga la? riuláʼdxicaʼ xiixa para laasicaʼ, cásica Binidxabaʼ ne ca demonio stiʼ. Ruyúbicaʼ modo chuʼcaʼ galán laasicaʼ, ne modo rúnicabe ni nga gatanécabe stuudxi baʼduʼ ne gúnicabe cosa malu. ¡Guizáʼ malu nga xa!

Ñee nannuʼ xi rúnicabe para guni sentírcabe galán la?... Zándaca xhubinácabe o cánacabe ra nácaluʼ dxaapahuiiniʼ o  ra nácaluʼ hombrehuiiniʼ, ne dede xhúbicabe ra nácacabe hombre o ra nácacabe gunaa lu stiluʼ. Peru qué chuʼ dxi gudiiluʼ lugar quítecabe ni, nin bizáʼnaluʼ o béndaluʼ, nin bixhózeluʼ o jñaaluʼ. Ra nácaluʼ dxaapahuiiniʼ o ra nácaluʼ hombrehuiiniʼ ca lii si nga stiluʼ ni, ne naquiiñeʼ gápaluʼ ni.

Ximodo zanda gápaluʼ xcuérpuluʼ de ca binni ni rúnicaʼ cosa malu riʼ yaʼ.... Primé ni gúniluʼ la? cadi gudiidiluʼ lugar chuʼ tu quite ra nácaluʼ dxaapahuiiniʼ o ra nácaluʼ hombrehuiiniʼ. Pa tuuxa gacalaʼdxiʼ guni lii zacá la? qué chiguidxiʼbuʼ ne guníʼ nadipaʼ: «¡Cadi cánaluʼ naa! ¡Naa zaniéʼ xi cayúniluʼ!». Ne pa laabe guiniʼbe lii nápaluʼ donda la? cadi guni crédiluʼ laabe. Cusiguiibe. Guyé ne gúdxini tutiica binni. Naquiiñeʼ guiniʼluʼ ni neca gábibe lii guirópasitu nánnatu xi guca. Neca guiniʼbe zusigáʼdebe lii stale cosa galán o guchíbibe lii, naquiiñeʼ guixéleluʼ de laabe ne guiniʼluʼ xi bíʼnibe.

Qué gápaluʼ xi pur guidxíbiluʼ, peru naquiiñeʼ gápaluʼ lii. Ora gabi jñaaluʼ o bixhózeluʼ lii nuu binni zanda guniná lii o nuu lugar ra zanda gácaluʼ xiixa la? naquiiñeʼ guzuubaluʼ stiidxacabe. Zacá la? nagana chuʼ tu guni lii xiixa.