NÁNNALUʼ xii nga ti señal, njaʼ.... Lu capítulo 46 que bíʼndanu bidii Jiobá ti señal para gusihuínnibe maʼ qué zunitilúdibe guidxilayú riʼ ne ti nisaguié roʼbaʼ. Ca apóstol que laaca gunábacabe ti señal para gánnacabe padxí ndiʼ guibiguetaʼ Jesús guibáʼ ne padxí ndiʼ guidxiña dxi guinitilú guidxilayú, o guiráʼ ca cosa malu cayuni binni yanna riʼ (Mateo 24:3).

Cumu maʼ qué zahuinni Jesús, ne maʼ chichuube guibáʼ la? zaquiiñeʼ ti señal ni guluíʼ maʼ cayuni mandarbe. Ngue runi Jesús gúdxibe ca discípulo stibe xi guiráʼ ndiʼ naquiiñeʼ cuézacaʼ gaca lu Guidxilayú riʼ. Ne ora gúʼyacabe cani la? zánnacabe maʼ bibiguétabe ne maʼ bizulú cayuni mandarbe guibáʼ.

Para guiene ca discípulo que pabiáʼ nga naquiiñeʼ gatanacaʼ la? Jesús  gudxi laacabe: «Laguuya ca yaga duʼga ne ca xcaadxi yaga. Ora ma cabee ni biitu la? ma nanna tu ma zeeda tiempu enda nandáʼ». Nuu ni rúʼyanu para gánnanu maʼ zeeda tiempu nandáʼ. Zacaca nga ora gúʼyanu gaca cani guníʼ Jesús ca, laaca gánnanu maʼ gaxha nuu Armagedón (Lucas 21:29, 30).

Lu yaza riʼ ne lu sti yaza ca rihuinni tuudxi cosa ni zeeda lade ca señal ni cayabi laanu maʼ  gaxha nuu Reinu stiʼ Dios. Ora maʼ gaca guiráʼ xixé ni la? Reinu stiʼ Dios ne Rey stini Cristu la? zunduuxebe guiráʼ ca gobiernu ca, casi bíʼndanu lu capítulo 46.

Biiyachaahuiʼ ca dibuju ni cá lu guiropaʼ yaza ni maʼ gudídinu ca, ti guininu de laacani. Lu Mateo 24:6-14 ne Lucas 21:9-11 zanda gúʼndaluʼ xi cayaca lu cani. Biiyaʼ ca númeru ni cá lu cada tobi de laacani: laaca laani nga númeru ni cá ra ruzulú párrafo ni cusiene dibuju ca. Yanna guidúʼyanu pa stale de ca señal ni guníʼ Jesús ca cayaca ca dxi stinu riʼ.

1) Jesús guníʼ: «Zanna tu cayaca guerra ti ladu ne nuu de gaca ni sti ladu, [...] zucaa lú ti gobiernu sti gobiernu ne zucaa lú ti guidxi sti guidxi». Ñee huayunadiágaluʼ cadinde ca guidxi ca lu noticia la?... Primé guendaridinde stiʼ ca guidxi roʼ ni guca guidubi naca guidxilayú riʼ gúcani lu ca iza 1914 dede 1918, qué nindaa diʼ gudinde ca guidxi roʼ ca sti biaje, ndiʼ gúcani lu iza 1939 dede 1945. ¡Qué huayuuruʼ dxi tinde ca guidxi ca guidubi naca guidxilayú casi cani guca ca! Yanna riʼ la? stale guidxi cadinde guiráʼ ladu. Guiráʼ dxi runadiáganu rieeteʼ de laacani lu tele, lu radiu o lu periódicu.

2) Jesús guniʼruʼ: Ziuu guendarindaana ti lugar ne sti lugar. Zándaca nánnaluʼ cadi guiráʼ diʼ binni napa stale ni gó. Stale mil binni rati guiráʼ dxi pur riaadxaʼ ni gocaʼ.

3) Jesús laaca guníʼ: «Ziuu enda huará zaguixhe idubi naca ti guidxi». Ca guendahuará riʼ nabé malu cani ne ruuti cani stale binni. Ti guendahuará ni jma bireeche ni biree lá gripe española que biiti ni gande millón binni lu ti iza si. Ca dxi stinu riʼ zándaca jma stale binni gati de sida. Ne laaca nuu cáncer, guendahuará de ladxidóʼ ne stuudxi guendahuará ni ruuti stale mil binni guiráʼ iza.

 4) Jesús bizeeteʼ de sti señal ne ca diidxaʼ riʼ: «Zaca [...] xu stale lugar». Ca xu roʼ riʼ la? rusaba cani yoo, ne ruuti ni ca binni ni nuu ndaaniʼ cani. Dede 1914 la? guiráʼ iza huayaca xu roʼ. Ñee huayunadiágaluʼ de laacani la?...

5) Jesús guníʼ de sti cosa ni zeeda lade ca señal ca nga zadale guendaruchee. Nga runi nuu stale gubaanaʼ ne stale guendaridinde. Ndaaniʼ stale guidxi la? ridxibi binni chindánacabe ralidxi. Qué huayuu dxi chuʼ stálepeʼ binni gucheené ley ne chuʼ stale guendaridinde lu guidubi naca guidxilayú casi yanna.

6) Jesús guníʼ sti cosa ni jma risaca de señal que ora guniʼbe: «Zuiʼ cabe stiidxa Dios de idubi naca guidxilayú para ganna irá xixé guidxi modo runi mandar, ne dxi que ru nga iluxe guidxilayú riʼ». Pa lii runi creluʼ «stiidxa Dios» riʼ la? naquiiñeʼ guiníʼneluʼ ni stuudxi binni. Zacá la? zanda gacaneluʼ gaca sti ndaa de señal riʼ.

Nuu tu na guiráʼ ni guníʼ Jesús ca maca huayaca cani. Peru qué huayuu dxi gaca guiráʼ ni juntu ne lu guidubi naca guidxilayú. Yanna, ñee riéneluʼ xi riníʼ señal ca la?... Ra gúʼyanu maʼ cayaca ca cosa riʼ riníʼ cani mayaca guiluxe guidxilayú malu riʼ ne oracaruʼ maʼ chuʼ guidxilayú cubi stiʼ Dios.

Ora bidii Jesús señal riʼ la? laaca guniʼbe de tobi de ca tapa tiempu ni rápanu lu ti iza. Nabe: «Lainaba lu Dios cadi dxi pe guxooñe tu ca guiaba nanda» (Mateo 24:20). Xi raʼbuʼ riníʼ nga yaʼ....

Biaa, pa tuuxa binni nuu guilá de ti lugar ra canitilú tiempu riaba nanda, ca dxipeʼ nagana raca guiree binni cheʼ sti ladu, xi zándaca gueeda gácacabe yaʼ.... Nagánapeʼ zaca para laabe guxooñebe, ne zándaca cadi guireebe raqué. Ñee cadi feu nga gati  binni ca ra calaateʼ hielu biuxe purtiʼ nabé guyuu xhiiñabe lu sti cosa ne qué ñanda nireebe ante la?...

Ñee riéneluʼ xi guyuu Jesús niníʼ ora na cadi cuézadinu ca dxi riaba nanda para guxooñenu la?... Ni gúdxibe laanu nga, cumu Armagedón ca maʼ gaxha nuu ni la? naquiiñeʼ gácanu nagueenda para gúninu ni na Dios ne gusihuínninu nadxiinu laabe. Pa cadi gaca puranu la? zándaca maʼ qué zudii tiempu laanu. Ne pa zacá ni la? zácanu casi ca binni ni bibani dxi beeda Nisaguié roʼbaʼ que, laacaʼ bicaadiágacaʼ ni guníʼ Noé, peru qué ñuudicaʼ ndaaniʼ arca que.

Yanna maʼ chiguininu ximodo nga chigaca guiráʼ cosa ora guiluxe Armagedón, guendaridinde ni jma naroʼbaʼ ca. Chiguizíʼdinu xi napa Dios para guiráʼ tu nadxii laabe ne cayúnicaʼ ni nabe yanna riʼ.