PA GÁTINU, zaná Dios guindisaʼ laanu o gusibani laanu sti biaje la?... Ti hombre nachaʼhuiʼ ni biree lá Job biʼniʼ cré zanda guni Dios ni. Ngue runi, ora guníʼ íquebe maʼ chigátibe la? gúdxibe Dios: «Lii zucaa rídxiluʼ, ne naa zacabeʼ lii». Job guníʼ guizáʼ ziuulaʼdxiʼ Jiobá Dios guindisaʼ laabe, ne dxandipeʼ racalaʼdxiʼ Dios gúnini (Job 14:14, 15).

Jesús nácabe casi bixhózebe Jiobá Dios. Laaca racaláʼdxibe gacanebe laanu. Ora gudxi ti hombre napa lepra laabe: «Pa na lu la? zanda usianda lu naa», Jesús bicabi: Racalaʼdxeʼ, ne bisiándabe laa (Marcos 1:40-42).

Gunnaxhii Jesús ca baʼduʼ ca purtiʼ nga biziidibe de Bixhózebe. Maʼ raca stale iza Jiobá biquiiñebe ca xpínnibe para gusibánibe chupa  hombrehuiiniʼ. Elías gunabaʼ laabe guindísabe xiiñiʼ ti gunaa ni nabé guca nachaʼhuiʼ ne laa, ne Jiobá biʼniʼ ni. Dios laaca biquiiñebe Eliseo para guindisaʼ sti hombrehuiiniʼ (1 Reyes 17:17-24; 2 Reyes 4:32-37).

Cadi sicarupeʼ nga gánnanu nadxii Jiobá laanu stale la?... Cadi ora si nabáninu riníʼ íquebe de laanu, sínuque laaca rietenaláʼdxibe binni ni maʼ guti. Jesús laaca guníʼ casi ora nabániruʼ ti xpinni Dios para laa neca maʼ guti (Lucas 20:38). Biblia na nin guendaguti, nin guendanabani, nin ni ridúʼyanu yanna, nin ni gueedaruʼ qué zanda guxhaleʼ laanu de Dios ni nadxii laanu (Romanos 8:38, 39).

Dxi bibani Jesús lu Gudxilayú riʼ la? bisihuínnibe nadxii Jiobá ca baʼduʼ ca. Bietenalaʼdxiʼ, gulee Jesús tiempu para guniʼné laacabe de Dios. Peru, ñee nánnaluʼ bidii Jiobá laabe poder para gusibánibe baʼduʼ ni maʼ guti la?... Chiguininu ximodo gundisaʼ Jesús ti dxaapahuiiniʼ de doce iza xiiñiʼ ti hombre láʼ Jairu.

Jairu ne xheelaʼ ne tobi lucha xiiñiʼ gulézacabe gaxha de nisadóʼ stiʼ Galilea. Ti dxi la? dxaapahuiiniʼ que guizáʼ guca huará, ne Jairu biiyaʼ maʼ cayátibe. Óraque bietenaláʼdxibe Jesús, hombre ni nabé binadiágabe rusianda binni huará. Ngue runi yeyúbibe Jesús ne bidxélabe laa gaxha de nisadóʼ stiʼ Galilea que cusiidiʼ stale binni.

Jairu gudiʼdiʼ lade ca binni que, biábabe xañee Jesús ne gúdxibe laa: «Ma cayati xiiñeʼ. Chuu, quixhe ná lu luguiá be ti guianda be ne cadi gati be». Oraqueca ziné Jesús laabe. Guiráʼ binni ni nuu ra nuu Maestru Ni Jma Nanna Gusiidiʼ que laaca yenanda laabe. Peru maʼ zituhuiiniʼ guzácabe ora bidxagalúcabe tuudxi hombre ni zeeda de ralidxi Jairu para na ca hombre  que rabi laabe: «Ma guti xiiñi luʼ, xi para cuchiiña rouʼ ma[e]stru» ca.

Jesús binadiaga ni guníʼcabe que. Cumu nánnabe pabiáʼ naná nga para Jairu guniti tobi lucha xiiñiʼ la? gúdxibe laa: «Cadi idxibi luʼ. Bini cre, ne zianda xiiñi luʼ». Óraque zécabe dede bidxíñacabe ralidxi Jairu. Guiráʼ xhamígucabe nuucaʼ raqué cayuunacaʼ purtiʼ guti dxaapahuiiniʼ que. Jesús gudxi laacabe: «Cadi guʼna tu purti cadi guti badu dxapa huiini ca, sínuque nisiaasi si [be]».

Ora guníʼ Jesús zaqué la? ca binni que bixídxicaʼ, purtiʼ nánnacaʼ maʼ guti dxaapahuiiniʼ que. Xiñee guníʼ Jesús nisiaasibe yaʼ.... Xi raʼbuʼ nuube gusiidibe ca binni que yaʼ.... Nuube gánnacaʼ zeeda gaca guendaguti ca casi ti bacaandaʼ. Ne nuube gusiidibe laacaʼ cadi nagana diʼ nga guindísabe ti binni ni maʼ guti ne poder stiʼ Dios, cásica ora nucuaanibe laa de ti bacaandaʼ.

Jesús gulee guiráʼ binni nuu ndaaniʼ yoo que ne bisaanabe bixhoze si ne jñaa dxaapahuiiniʼ que ne apóstol Pedru, Jacobo ne Juan. Despué guyuube ra nuu dxaapahuiiniʼ que, gudápibe náʼ ne gúdxibe laa: «Biasa, badu dxapa huiiniʼ». Oraqueca biasa  dxaapahuiiniʼ que ne guzá. Bixhózebe ne jñaabe guizáʼ biéchecaʼ (Marcos 5:21-24, 35-43; Lucas 8:40-42, 49-56).

Guníʼ ique si ndiʼ: pa Jesús gunda bisibánibe dxaapahuiiniʼ que, ñee zanda gúnibe zacaca para stuudxi binni la?... Runi creluʼ pa dxandíʼ zúnibe ni la?... Ya. Jesús laapeʼ guníʼ: «Zadxiña dxi guna diaga irá cani nuu ndaani baʼ stidx[eʼ] ne zaree caʼ» (Juan 5:28, 29).

Ñee raʼbuʼ zaná Jesús guindisaʼ binni la?... Sti ejemplu ni zeeda ndaaniʼ Biblia zacané laanu gánnanu ni. Ni guca ti dxi, gaxha de ti guidxi láʼ Naín ruluíʼ xi runi sentir Jesús pur ca binni ni ruunaʼ ora gati ti binnilidxi.

Stale binni ziree ndaaniʼ guidxi stiʼ Naín que zigucaachicaʼ ti baʼdunguiiu ni guti. Jñaa baʼdunguiiu riʼ guizáʼ nuu triste. Purtiʼ cadi xadxipeʼ de guti xheelabe, ne yanna maʼ beeda gati tobi lucha xiiñibe. Stale de ca xpesínube guyuunú laabe. Gunaa que cayuunaʼ, ne ca binni que qué guidxélacabe xi gúnicabe para gucueezacaʼ laabe.

Dxi quepeʼ Jesús ne ca discípulo stiʼ zécabe Naín. Ora bidxíñacabe ra puertaʼ guidxi que, bidxagalúcabe guiráʼ binni ziucaachiʼ baʼdunguiiu que. Ora biʼyaʼ Jesús cayuunaʼ jñaabe la? biabe laa. Biniibi ladxidoʼbe purtiʼ biiyabe pabiáʼ triste nuu gunaa que, ne gucaláʼdxibe gacanebe laa.

Ngue runi, biquídxibe laabe ne guniʼbe ne diidxaʼ nadóʼ: «Cadi guʼna luʼ». Pur modo guniʼbe que guiráʼ binni biiyadxí laabe ne canabadiidxacaʼ xi chigúnibe. Óraque bidxiña Jesús gueʼtuʼ que ne biʼniʼ mandar: «Biasa, xiiñeʼ. Canié nia lii». Oraqueca biasa baʼdunguiiu que ne gunda guníʼ (Lucas 7:11-17).

Guníʼ ique si xi biʼniʼ sentir gunaa que. Ximodo ñuni sentirluʼ  lii pa nibiguetaʼ nibani tuuxa binni ni nadxiiluʼ stálepeʼ yaʼ.... Ñee cadi rusihuinni ni biʼniʼ Jesús ca dxandíʼ nadxiibe binni ne racaláʼdxibe gacanebe laacaʼ la?... Guníʼ ique si pabiáʼ sicarú nga guidxaagalunu binni ni guiasa ndaaniʼ guidxilayú cubi stiʼ Dios ca (2 Pedro 3:13; Apocalipsis 21:3, 4).

Caadxi de ca binni ni guiasa ca maca runibiaʼnu laacaʼ, ne ládecabe zeeda baʼduhuiiniʼ. Zacabiaʼnu laacabe cásica binibiáʼ Jairu xiiñiʼ ora gundisaʼ Jesús laa. Stuudxi binni ca nga cani guti maʼ raca gayuaa iza o jma de mil iza. Peru, neca maʼ gudiʼdiʼ stálepeʼ iza la? Dios qué zusiaandaʼ diʼ laacabe.

Cadi sicarupeʼ nga gánnanu nadxii Jiobá Dios, ne Xiiñibe Jesús laanu stálepeʼ la?... Laacabe qué racaláʼdxicabe guibáninu chupa chonna si iza, sínuque racaláʼdxicabe guibáninu sin qué chuʼ dxi gátinu.