Guiráʼ ni biʼniʼ ca fariseu, bíʼnicabe ni para si guʼyaʼ binni ne gusisaca laacabe. Jmaruʼ si pa ti cosa galán ngue bíʼnicabe. Casi ti cosa ni biʼniʼ ca fariseu nga riguni orarcaʼ ra rié stale binni para guʼyaʼ guiráʼ xixé binni laacaʼ. Biziidicaʼ de memoria stale oración ne ngueca ca ngueca maʼ caniʼcaʼ ora maʼ nuucaʼ ra sinagoga ne lu calle para gunadiaga binni laacaʼ. Ngue runi nabé bidxagayaa ca binni que ora gudxi Jesús laacabe: «Cadi guni orartu casi runi ca fariseu. Laacaʼ riníʼ íquecaʼ zadxagayaa Dios pur guiráʼ ni riniʼcaʼ, peru cadi zacá ni. Ora guni orarluʼ, cadi guiaandaʼ lii, casi ora cayuíʼneluʼ Jiobá diidxaʼ nga laani. Cadi guiniʼluʼ ngueca ca ngueca. Ni jma racalaʼdxiʼ Jiobá nga gábiluʼ laa ximodo runi sentirluʼ».

Jesús bisiene ximodo guni orarnu: «Bixhózedu ni nuu guibáʼ, gusisaca binni laluʼ. Gueeda Reinu stiluʼ. Gaca ni naluʼ cásica  raca ni guibáʼ zaqueca gaca ni lu Guidxilayú». Despué gudxi Jesús laacabe naquiiñeʼ guni orárcabe para guinábacabe guendaró ni tiidinécabe dxi, guinábacabe perdón pur ca pecadu stícabe, ne guinábacabe xcaadxi cosa ni caquiiñecabe.

Laaca guníʼ Jesús: «Biʼniʼ orar Bixhózeluʼ Jiobá ne cadi guiaanadxiluʼ de guinábaluʼ laabe ca cosa galán ni caquiiñeluʼ. Guiráʼ cani napa xiiñiʼ racaláʼdxicaʼ gudiicaʼ xiiñicaʼ ni jma galán. Pa ninabaʼ xiiñiluʼ lii ti pan, ¿ñee nudiiluʼ laabe ti guié la? ne pa ninábabe lii ti benda, ¿ñee nudiiluʼ laabe ti beendaʼ la?».

Óraque bisiene Jesús xi zanda guizíʼdinu de ni guníʼ que: «Pa nánnaluʼ gudiiluʼ regalu galán ca xiiñiluʼ, ¡né stale razón Bixhózeluʼ, Jiobá, zudii lii espíritu santu! Ni caquiiñeʼ si gúniluʼ nga guinábaluʼ ni laabe». ¿Ñee rúniluʼ ni guníʼ Jesús ca la? ¿Xi rinábaluʼ Jiobá ora runi orarluʼ laa?