Ndaaniʼ guidxi Cesarea guyuu ti oficial nabé risaca stiʼ ejércitu romanu ni biree lá Cornelio. Neca cadi judíu laabe, peru nabé biʼniʼ respetar ca judíu laabe. Gúcabe ti hombre nachaʼhuiʼ, purtiʼ gucanebe binni pobre. Guiráʼ dxi biʼniʼ orar Cornelio ne gupa fe Jiobá. Ti dxi, guyé ti ángel ra nuube ne gudxi laabe: «Maʼ bicaadiaga Dios ca oración stiluʼ. Biseendaʼ ca hombre runi xhiiñaluʼ cheʼ guidxi Jope, ra nuu Pedro, para guinábacaʼ laabe gueedabe ra nuuluʼ». Oraqueca biseendaʼ Cornelio chonna hombre runi xhiiñaʼ checaʼ guidxi Jope, ni riaana biaʼ 50 kilómetru ladu gueteʼ stiʼ guidxi Cesarea.

Ndaaniʼ guidxi Jope, gucuaa Pedro ti visión. Biiyabe caadxi maniʼ ni qué ró ca judíu. Óraque binadiágabe ti ridxi ni gudxi laabe gobe beela stiʼ ca maniʼ que. Qué niná Pedro ñó ni ne guníʼ: «Qué huayuu dxi gahuaʼ maniʼ ni cadi nayá». Ridxi que gudxi laabe: «Cadi guiniʼluʼ cadi nayá ca maniʼ riʼ, purtiʼ Dios maʼ guníʼ nayácame». Laaca gudxi ridxi que laabe: «Nuu chonna hombre ra puertaʼ yoo riʼ, guyé ra nuucabe». Guyé Pedro ra puertaʼ que ne gunabadiidxabe ca hombre que xi racaláʼdxicaʼ. Ca hombre que bicábicaʼ: «Biseendaʼ Cornelio laadu, ti oficial stiʼ ejércitu  romanu. Racaláʼdxibe chinedu lii ra lídxibe ndaaniʼ guidxi Cesarea». Óraque gudxi Pedro ca hombre que guiaanacaʼ gueelaʼ que raqué. Birá si gueelaʼ, yenebe ca hombre que Cesarea. Ne yenanda xcaadxi hermanu de Jope laacabe.

Ora biʼyaʼ Cornelio Pedro bizuxíbibe xañee. Peru Pedro gudxi laabe: «Biasa. Laaca hombre casi lii naa. Gudxi Dios naa guenda ra lídxiluʼ, neca qué riuu ca judíu ra lidxi ni cadi naca judíu. Yanna gudxi naa xiñee biseendacaaluʼ naa».

Gudxi Cornelio Pedro: «Raca tapa gubidxa, laga cayuneʼ orar Dios, gudxi ti ángel naa guseendacaaʼ lii. Yanna bisiidiʼ laadu ca cosa ni ná Jiobá». Para bicabi Pedro laabe: «Yanna huaxa maʼ nannaʼ biaʼca risaca guiráʼ binni nezalú Dios, purtiʼ ricaabe tutiica binni gacalaʼdxiʼ guni adorar laabe». Bisiidiʼ Pedro laacabe stale cosa de Jesús. Óraque gucuaa Cornelio ne xcaadxi binni nuu raqué espíritu santu ne guyuunísacaʼ.