Ndaaniʼ ti guidxi stiʼ Asiria ni biree lá Nínive, guizáʼ malu guca ca binni guleza raqué. Biseendaʼ Jiobá profeta Jonás cheʼ Nínive ne gabi ca binni que naquiiñeʼ guchaacaʼ. Peru lugar de ñebe Nínive, gadxé ladu guyebe, laga gudxíʼbabe lu ti barcu ni zeʼ guidxi Tarsis.

Laga zeʼ barcu que lu nisadóʼ, biasa ti tormenta guizáʼ nadipaʼ, guizáʼ bidxibi ca marineru que óraque. Biʼniʼ orarcaʼ dios sticaʼ ne gunabadiidxacaʼ: «¿Xiñee cazaacanu ndiʼ pue?». Últimu la? gudxi Jonás laacabe: «Naa napa donda. Cuxooñeʼ para cadi guneʼ ni biʼniʼ mandar Jiobá naa. Lagulaa naa ndaaniʼ nisadóʼ ca ti guiaanadxi tormenta riʼ». Qué niná ca marineru que nusábacaʼ Jonás ndaaniʼ nisadóʼ que, peru tantu gucuabe lucaʼ guni cani la? bisábacaʼ laabe ndaaniʼ nisadóʼ, ne óraque biaanadxí tormenta que.

Guni ique Jonás seguru zati. Laga jma ziyaazibe ndaaniʼ nisadóʼ que, biʼniʼ orarbe Jiobá. Óraque biseendaʼ Jiobá ti benda ngola ne gubi Jonás, peru qué ñuuti benda que laabe. Ndaaniʼ benda que biʼniʼ orar Jonás: «Jiobá, runeʼ prometer lii, yanna huaxa maʼ zuzuubaʼ stiidxaluʼ». Chonna gubidxa guyuu Jonás ndaaniʼ benda que, gupa Jiobá laabe ne despué biʼniʼ de que guidxiʼbaʼ benda que laabe ra nabidxi.

Bilá Jiobá Jonás, peru ¿ñee rábiluʼ pur ndiʼ maʼ qué zié Jonás guidxi Nínive la? Coʼ. Biseendaʼ Jiobá laabe raqué sti biaje, ne yanna huaxa  bizuubaʼ Jonás diidxaʼ. Guyebe raqué ne gúdxibe ca binni malu que: «Zunitilú Jiobá guidxi riʼ dentru de 40 dxi». Peru bizaacaʼ xiixa ni cadi cabézabe. Bicaadiaga ca ninivita que ne bichaacaʼ. Gudxi rey stiʼ Nínive guidxi que: «Lainaba perdón Dios ne lagaca arrepentir, tílapeʼ zacá cadi gunitilube laanu». Ora biʼyaʼ Jiobá dxandíʼ maʼ guca arrepentir ca binni que, maʼ qué nunitilube laacaʼ.

Bidxiichi Jonás purtiʼ maʼ qué nunitilú Jiobá guidxi que. Guníʼ ique ndiʼ: Gupa Jiobá paciencia Jonás ne biá laabe. Peru Jonás qué ñá ca binni de Nínive. Laga guribe fuera de guidxi que xaʼnaʼ bandáʼ stiʼ ti lubáʼ xigabá (o calabaza vinatera) ne bisituumbube lube. Despué, bibidxi yaga que, ne jmaruʼ si bidxiichi Jonás. Ngue runi gudxi Jiobá laabe: «¿Ñee jma risaca lubáʼ ca para lii qué ca binni de Nínive la? Naa biaʼyaʼ laacabe, nga runi bilácabe». ¿Xi nuu Dios gusiidiʼ Jonás yaʼ? Bisiidibe laa, jma risaca ca binni de Nínive que intiica yaga.