Guni saludárcabe bandera. Stale biaje ruundaʼ binni ti himno ora rúnicaʼ homenaje stiʼ bandera ne runi saludárcabe ni. Ca testigu stiʼ Jiobá nánnacaʼ pa guni saludarcaʼ bandera zusihuínnicaʼ cayuni adorarcaʼ ni ne casi ñaca niniʼcaʼ hualá xaíque sticaʼ ne xquídxicaʼ laacaʼ ne cadi Dios (Isaías 43:11; 1 Corintios 10:14; 1 Juan 5:21). Tobi de ca rey ni bisisácacabe ndaaniʼ guidxi Babilonia que nga rey Nabucodonosor. Para guidxagayaa guiráʼ cani runi xhiiñabe pabiáʼ nandxoʼbe ne rusisácabe religión stibe la? bíʼnibe ti bidóʼ naroʼbaʼ ne biʼniʼ mandarbe guzuxibi guiráʼ ca binni que nezalú bidóʼ que laga caxidxi ti saa, casi ti himno. Peru Sadrac, Mesac ne Abednego, chonna hombrehuiiniʼ hebreu qué ninacaʼ nuzuxíbicaʼ xañee bidóʼ que neca nánnacaʼ zándaca gáticaʼ (Daniel, capítulo 3).

Xi zanda guininu de ca dxi stinu riʼ yaʼ. Ti hombre ni biʼndaʼ de historia ni láʼ Carlton Hayes bicaa lu libru El nacionalismo: una religión «de modo runi adorar binni xquidxi yanna», ne nabe: «Bandera ca nga ni jma riquiiñeʼ binni para guni adorar xquidxi. [...] Ca hombre ca ribeecaʼ sombreru íquecaʼ ora maʼ zidiʼdiʼ bandera; ca poeta rucaacaʼ poesía para gusisácacaʼ ni; ca baʼduhuiiniʼ ca ruundacaʼ himno». Laaca bizeetebe nuu xcaadxi cosa ni rusihuinni pabiáʼ runi adorar binni xquidxi. Nuu stale guidxi ni napa caadxi dxi jma risaca, casi 16 stiʼ septiembre, dxi rietenaláʼdxicabe Independencia stiʼ México, ne laaca rusisácacaʼ ca binni «ni guti para bilá» xquídxicaʼ ne laacaʼ runi adorarcaʼ xiixa yuʼduʼ o lugar. Zaqueca Diario Oficial de la Federación stiʼ México na «escudu, bandera ca ne himno rusihuinni cani xi guidxi nabáninu» ne na ni naquiiñeʼ guni adorar binni cani. Maʼ xadxí bizeeteʼ ti enciclopedia «rusisaca binni bandera cásica rusisácacaʼ cruz» (The Encyclopedia Americana).

Enciclopedia ca laaca bisiene xiná ca diidxaʼ ni zeeda lu himno stiʼ ca guidxi ca. Laani na ni: «Rusihuinni ca himno ca xi runi sentir binni pur xquidxi ne luni rinábacaʼ gacané Dios xquídxicaʼ o cani runi mandar». Nga runi, zanda guininu napa ca testigu  stiʼ Jiobá razón para guiniʼcaʼ cadi jneza guni saludarcaʼ bandera ne gúʼndacaʼ himno stiʼ xquídxicaʼ purtiʼ zusihuínnicaʼ cayuni adorarcaʼ xiixa. Lu libru ni láʼ Genio y figura del norteamericano bizeeteʼ maestru D. W. Brogan de caadxi baʼduscuela Testigu ni yenécabe nezalú juez purtiʼ qué ninacaʼ ñuni saludarcaʼ bandera stiʼ Estados Unidos ne qué ninacaʼ ñuni jurarcaʼ nezalú ni. Ne laabe bizeetebe de ni huaníʼ ca juez jma risaca (Suprema Corte) stiʼ Estados Unidos: «[Lu stale] de ca juiciu ni huayápacabe huaníʼcabe ora guni binni ca ndiʼ cayuni adorarcaʼ xiixa».

Laanu, ca Testigu, neca qué rúninu guiráʼ ni maʼ bizéʼtenu ca purtiʼ nánnanu cadi jneza cani, peru cadi pur nga rucueezanu xcaadxi binni de gúnicaʼ ni pa zacá racaláʼdxicaʼ. Ne runi respetarnu ca bandera ca purtiʼ nánnanu laacani nga rusihuínnicani padé tuuxa binni ne laaca ruzúʼbanu stiidxaʼ cani naca gobiernu purtiʼ laacaʼ nga runi mandarcaʼ ndaaniʼ xquídxinu ne «xhiiña Dios cayuni ca» (Romanos 13:1-4). Ne laaca «[r]iní né nu Dios pur presidente ne [pur guiráʼ cani] runi mandar». Rúninu zacá «ti ganda chuʼ dxí xquidxi nu, ne ibani nu sin cuʼ xa ique nu gastiʼ. Ne ibani nu modo racalaʼdxi Dios ti qué gapa binni xi pur iníʼ laanu» (1 Timoteo 2:2).

Ora gaca votar. Cani dxandíʼ xpinni Cristu qué rabidícabe binni xquídxicabe cadi guni votar. Qué ricasaacabe para gucaalúcabe cani nexheʼ guni mandar ne ruzuubacabe stiidxaʼ binni ni bibí para guni mandar ca. Ne qué lica riuucabe lu política (Mateo 22:21; 1 Pedro 3:16). Peru xi rúnicabe ora gucaa gobiernu laacabe guni votárcabe o zándaca gueeda gácacabe xiixa pa qué chécabe ra cayaca votar yaʼ. Pa qué zuchiiñaʼ xquendabiaanicabe laacabe la? zanda chécabe ra cayaca votar. Zacá zusihuínnicabe cayúnicabe casi biʼniʼ Sadrac, Mesac ne Abednego, purtiʼ laacaʼ guyecaʼ lu pampa stiʼ Dura. Peru para cadi gucheené ca xpinni Cristu Dios la? naquiiñeʼ guietenaláʼdxicabe xhoopaʼ conseju ni chiguzéʼtenu riʼ:

1. Ca xpinni Cristu cadi nácanu casi ca binni de guidxilayú (Juan 15:19).

2. Casi xpinni Dios cayúninu xhiiñaʼ Cristu ne Reinu stiʼ (Juan 18:36; 2 Corintios 5:20).

3.   Guiráʼ ca xpinni Cristu nadxiisaanu ne tobi si ni runi crenu (1 Corintios 1:10; Colosenses 3:14).

4. Tu guni votar pur tuuxa la? zapa donda pur ni guni binni ni gulí ca (biiyaʼ ca conseju ni zeeda lu 1 Samuel 8:5, 10-18 ne 1 Timoteo 5:22).

5. Dxi gunabaʼ ca israelita que gápacaʼ tuuxa lu guidxilayú riʼ para guni mandar laacaʼ la? bisihuínnicabe maʼ qué nácabe guni mandar Jiobá laacabe (1 Samuel 8:7).

6. Cumu qué riuu ca xpinni Cristu lu ca partidu ca la? randa rinínenu binni ni napa gadxé gadxé partidu de Reinu stiʼ Dios (Mateo 24:14; 28:19, 20; Hebreos 10:35).

Cani runi xiixa dxiiñaʼ para xquidxi. Nuu guidxi rinabaʼ cani qué naʼ guiziidiʼ gacaʼ soldadu gúnicaʼ xiixa dxiiñaʼ para xquídxicaʼ. Xi naquiiñeʼ gúninu pa guinabaʼ xquídxinu laanu gúninu nga. Naquiiñeʼ guni orarnu Jiobá, ganna chaahuinu pa jneza ni chigúninu ca ne laaca zanda guinábanu conseju tuuxa xpinni Cristu ni jma riene cani zeeda lu Biblia. Zacá zanda gacané xquendabiaaninu laanu para gánnanu xi gúninu (Proverbios 2:1-5; Filipenses 4:5).

Laaca canabaʼ Stiidxaʼ Dios «uzuuba cabe stiidxa presidente ne cani runi mandar ndaani xquidxi cabe [...] ne chuʼ cabe para guni cabe intiica ni jneza» ne «gaca cabe nadóʼ» (Tito 3:1, 2). Ra maʼ nánnanu ni na textu riʼ naquiiñeʼ guinabadiidxanu laca laanu, xi zazaaca pa gúninu xiixa dxiiñaʼ para xquídxinu: «Ñee zucheeniaʼ Dios pa guneʼ ni la? o zusihuinneʼ cayuneʼ ni runi religión ni qué rusiidiʼ ni dxandíʼ» (Miqueas 4:3, 5; 2 Corintios 6:16, 17). «Ñee zaca nagana para naa o qué lica zanda guneʼ ca dxiiñaʼ ni napaʼ casi ti xpinni Cristu la?» (Mateo 28:19, 20; Efesios 6:4; Hebreos 10:24, 25.) «O zapaʼ tiempu para guneʼ jma lu xhiiñaʼ Dios né dede guneʼ xhiiñabe guidubi dxi la?» (Hebreos 6:11, 12.)

Pa ti xpinni Cristu qué guchiiñaʼ xconciencia laa para guni xiixa dxiiñaʼ ndaaniʼ xquidxi purtiʼ qué racalaʼdxiʼ cúʼcabe laa ndaaniʼ cárcel la? xcaadxi xpinni Cristu naquiiñeʼ guni respetarcaʼ ni gudixhe íquebe gúnibe (Romanos 14:10). Ne zacaca naquiiñeʼ gúnicabe pa qué nabe gúnibe xiixa dxiiñaʼ para xquídxibe (1 Corintios 10:29; 2 Corintios 1:24).