Xi rúniluʼ ora maʼ cadxíbiluʼ... Zándaca ruyúbiluʼ bixhózeluʼ o jñaaluʼ gacané lii. Peru nuuruʼ sti binni ni zanda gacané lii. Laabe jma nápabe poder que tutiica binni. Nannuʼ tu laabe la?... Laabe nga Jiobá. Ora tiisi zanda guinábaluʼ laabe gacanebe lii. Nga nga biʼniʼ David, ti hombrehuiiniʼ ni ruzeeteʼ Biblia. Gúcabe nadxibalú purtiʼ nánnabe zacané Jiobá laabe.

Dede nahuiiniʼ David bisiidiʼ bixhoze ne jñaa laa gannaxhii Jiobá. Ngue runi, qué nidxíbibe. Neca bizaacabe stale cosa ni nuchibi tutiica binni. Nánnabe zanda gacané Jiobá laabe purtiʼ xhamígube laa. Ti dxi cayapa David dendxuʼ stiʼ, beeda ti lión ziné tobi de laacame. Ñee nannuʼ xi biʼniʼ David la? Guzanándabe lión que ne zándaca qué niquiiñebe gastiʼ para biitibe laame. Ne laaca biitibe ti oso ni gucalaʼdxiʼ ñuniná ca dendxuʼ que. Nannuʼ tu gucané David para guca nadxibalú la?... Biaʼsi, Jiobá gucané laabe.

Guidúʼyanu ximodo bisihuinni David nadxibalú sti biaje. Guca ni dxi cadindené ca israelita xquidxi ca filisteu. Tobi de ca soldadu stiʼ ca filisteu que láʼ Goliat, hombre riʼ nabé nasoo, ¡ti gigante ngola laabe! Nabé runi burla Goliat ca soldadu stiʼ Israel ne laaca runi búrlabe Jiobá. Rábibe ca soldadu que: «¡Tu laa na zanda tindené naa!». Peru guirutiʼ qué niná purtiʼ cadxíbicaʼ laabe. Ora binadiaga David ni guníʼ Goliat, gúdxibe laa: «¡Naa tindeniáʼ lii! ¡Zacané Jiobá naa ne zuneʼ ganar lii!». Cadi dxandíʼ guizáʼ nadxibalú guca David la?... Dxandíʼ, nabé nadxibalube. Peru, xi bizaaca despué yaʼ.

Gucuaa David gaayuʼ guié lisu ne ti guixhe bixeendaʼ ne zitindené gigante que. Ora biʼyaʼ Goliat nahuiiniruʼ David, bizulú biʼniʼ burla laabe. Para gudxi David laabe: «Lii zeeduʼ ra nuaaʼ né ti espada, ¡peru naa ziaaʼ ra nuuluʼ ne ziniáʼ lá Jiobá!». Óraque bixooñeʼ David neza ra nuu gigante que. Guluu ti guié ndaaniʼ guixhe bixeendaʼ stiʼ ne bindaa ni laabe. Biaʼsi lucuá gigante que gucuá guié que, ¡oraqueca biaba Goliat ne guti!  Ora biʼyaʼ ca filisteu ni bizaaca riʼ, guizáʼ bidxíbicaʼ dede bixooñecaʼ. ¡Neca nahuiiniruʼ David gunda biʼniʼ ganarbe Goliat, gigante que! Xiñee raʼbuʼ gunda biʼniʼ ganarbe yaʼ... Purtiʼ gucané Jiobá laabe, ¡laa jma nadipaʼ que tutiica gigante!

Xi rusiidiʼ historia stiʼ David laanu... Rusiidini laanu jma napa Jiobá poder que tutiica binni. Nga runi, pa chuʼ dxi guidxíbiluʼ la? bietenalaʼdxiʼ, Jiobá nga xhamíguluʼ ne zacanebe lii gácaluʼ nadxibalú.