NABÉ cayecheʼ estudiante stiuʼ purtiʼ maʼ biene ti versículo ni biʼndaʼ lu Biblia. Óraque gunabadiidxabe lii: «Peru, dxandíʼ xa nga rusiidiʼ Biblia zanda guibáninu sin gátinu... ndaaniʼ ti paraísu lu Guidxilayú». Dede cuxidxihuiiniʼ hermanu zineuʼ rabi laabe: «Xi biéneluʼ lu textu ni bíʼndaluʼ riʼ yaʼ». Cumu nabé cadxagayaa estudiante riʼ la? dede runiibi ique ne riníʼ: «¡Xiñee qué huayuu dxi gusiidicabe ndiʼ naa pue!». Cadi deruʼ nga primé biaje gúʼyaluʼ guiniʼbe zacá. Ngaca nga guniʼbe raca chupa chonna semana, dxi gúnnabe Jiobá nga láʼ Dios.

Ora gápanu ti experiencia casi ni bizéʼtenu riʼ, jmaruʼ si rucaani laanu guiníʼ íquenu pabiáʼ risaca nga nánnanu ni dxandíʼ. Peru, ñee maʼ huaníʼ íqueluʼ ximodo gucuaanu regalu riʼ la? Zacábinu ni lu primé ndaa stiʼ libru riʼ. Nánnanu dxandíʼ nuu Reinu stiʼ Dios ne ti razón ni rusihuinni zacá ni nga modo cayacané espíritu santu xquidxi Dios guiene guiráʼ ni racalaʼdxiʼ Jiobá chaahuiʼ chaahuiʼ. Maʼ gudiʼdiʼ ti gayuaa iza de cayacané Rey Jesucristu laacabe gánnacabe xii nga ni dxandíʼ.