Bixuiʼlú ndiʼ: deruʼ chupa beeu de xnovio Heather ne Mike, peru para Heather, ruluíʼ nga maca xadxí de runibiaʼbe Mike. Guidubi dxi maʼ cuseendacabe mensaje o maʼ caníʼcabe pur teléfono, ne dede ante guiluxe guiníʼ tobi de laacabe, mápeca nanna stobi ca xi nuube guiniʼbe. Peru Mike maʼ cadi nuu guiniʼné si Heather.

Hasta nagasi la? rinaaze si Mike náʼ Heather ne laaca maʼ bidiicabe chupa chonna bixiduʼ. Qué racalaʼdxiʼ Heather guni xiixa ni cadi jneza, peru laaca qué racalaʼdxiʼ guiluxené xnovio. Mike si nga rucaa laabe guni sentirbe sicarube ne guizáʼ risácabe. Ndiʼ nga ni riníʼ íquebe: «Intiica guiníʼ binni, naa nadxieeʼ Mike ne laa nadxii naa, xi naca yaʼ».

Pa maʼ huaniisiluʼ para guireeneluʼ tuuxa ne nidíʼdiluʼ ra cadiʼdiʼ Heather, xi ñuʼnuʼ.

Pa qué guʼnuʼ ni ná ti ley física, casi ley de gravedad la? zacanaluʼ. Ngaca nga zazaacaluʼ pa qué guʼnuʼ ni ná ca ley moral stiʼ Dios, casi ni ná malu fornicación, lu práctica riʼ zeeda ca relación sexual ni rapa binni ante guichaganáʼ (1 Tesalonicenses 4:3).

Xi rizaaca ora qué rinanda binni ni ná norma riʼ yaʼ. Biblia na: «Ni gapa jnadxii [o ni guni practicar fornicación la?] laca laa cuchee ne cuerpu stiʼ» (1 Corintios 6:18). Xi riníʼ ca diidxaʼ riʼ yaʼ.

 Pur caadxi investigación ni bíʼnicabe bihuinni stale joven ni gupa relación sexual ante guichaganáʼ, gúpacaʼ chupa chonna de ca guendanagana riʼ:

• RUCHIIÑAʼ XCONCIENCIA LAA. Stale de ca joven ni gupa relación sexual ante guichaganáʼ, guniʼcaʼ guca arrepentircaʼ pur bíʼnicaʼ ni.

• MAʼ QUÉ RAPA CONFIANZA. Nuu tu riníʼ ique pa cadi laaca maʼ gutaneruʼ xnóviocaʼ o xnóviacaʼ stobi.

• RACA DESILUSIONAR. Stale baʼdudxaapaʼ jma ñuulaʼdxiʼ tuuxa ni ñapa laa ne cadi tobi ni gaca aprovechar de laa. Ne stale hombrehuiiniʼ qué riuulaʼdxiʼ ca baʼdudxaapaʼ ni qué lica rudii dxiiñaʼ laacaʼ.

• Resultadu: pa gápaluʼ relación sexual ante guichaganaluʼ la? zusihuínniluʼ casi ora qué risaca para lii dignidad stiuʼ (Romanos 1:24). Guizáʼ risaca xcuérpuluʼ. ¡Cadi gusigáʼdeluʼ ni!

Cadi gápaluʼ relación sexual ante guichaganaluʼ neca gucaacabe lii guʼnuʼ ni (1 Tesalonicenses 4:3). Zanda guʼnuʼ ni ora maʼ bichaganaluʼ. Óraque huaxa zuni disfrutarluʼ de laani né confianza ne qué zuchiiñaʼ conciencia stiuʼ lii, ndiʼ nga ca cosa ni jma ruchiiñaʼ binni ora ratané tuuxa ante guichaganáʼ (Proverbios 7:22, 23; 1 Corintios 7:3).

• Tuuxa ni nadxii lii la? zuyubi ximodo chuʼluʼ galán ne nayecheʼ.

• Pa dxandíʼ rizaalaʼdxiʼ tuuxa lii la? qué zanabaʼ lii guʼnuʼ xiixa ni guxheleʼ lii de Dios (Hebreos 13:4).