GUDXI Jiobá Dios ca profeta bicaa lu Biblia stale cosa de Mesías, ni chigulá binni. Nin cadi nagana para guidxélacabe tu laabe, purtiʼ maca bieeteʼ ximodo chigálebe, xi dxiiñaʼ chigúnibe ne ximodo chigátibe. Guendaridxagayaa nga modo guca guiráʼ xixé ni gucuá chigaca que. Zadúʼyanu biáʼsipeʼ nga guca guiráʼ ni gucuá de dxi gálebe ne dxi gácabe baʼduʼ.

 Maca guníʼ profeta Isaías zeeda Mesías que de David (Isaías 9:7). Ne zaqué guca ni: beeda gale Jesús lade ca xiiñiʼ rey David (Mateo 1:1, 6-17).

 Miqueas, sti profeta stiʼ Dios, guníʼ zálebe «Belén Efrata» ne zuni mandarbe (Miqueas 5:2). Dxi beeda Jesús lu Guidxilayú riʼ, guyuu chupa guidxi láʼ Belén ndaaniʼ guidxi Israel. Tobi que guyuu neza guiaʼ stiʼ guidxi que, gaxha de Nazaret, ne stobi que guyuu Judá, gaxha de Jerusalén. Ni riaana gaxha de Jerusalén que biree lani Efrata. Ne raquepeʼ nga gule Jesús, zacá guca ni guníʼ Miqueas que (Mateo 2:1).

Sti cosa ni bieeteʼ zuni Dios nga zuseendacaa Xiiñiʼ «de Egipto». Zacá guca ni, purtiʼ dxi naca Jesús baʼduhuiiniʼ yenécabe laabe Egipto, peru guti si rey Herodes, bibiguétabe xquídxibe. Zacá nga guca ni guníʼ profeta que (Oseas 11:1; Mateo 2:15).

Lu tabla ni láʼ « Cani bizaaca Mesías» zuuyaluʼ ti ndaa ra cá «Cani chigaca», luni zeeda textu stiʼ Biblia ra cá guiráʼ cani caníʼ de Mesías. Galán pa guchaagaluʼ ca textu stiʼ sti ndaa ra cá «Guca cani». Pa gúniluʼ nga la? jma zuni creluʼ dxandíʼ nga Stiidxaʼ Dios.

Ora maʼ cayuundaluʼ cani, cadi guiaandaʼ lii gucuá ca diidxaʼ ca gayuaa iza ante gale Jesús. Ne Jesús peʼ guníʼ: «Gudxe laatu napa xidé gaca irá ni cá lu xquiʼchi Moisés, ne ni bicaa ca profeta ne ni cá lu Salmo, irá ra ruzeete ni naa» (Lucas 24:44). Casi rihuinni lu Biblia, dxandíʼ guca guiráʼ cani gucuá que.