Jesús bisiidiʼ para ganda gácanu ti xpinni, caquiiñeʼ chuʼnísanu (biindaʼ Mateo 28:19, 20). Peru ¿xii nga chúʼnisa binni yaʼ? ¿Xi caquiiñeʼ guni ti binni para chúʼnisa yaʼ?

1. ¿Xii nga chúʼnisa ti binni?

Diidxaʼ chúʼnisa ca zeedani de ti diidxaʼ griegu ni riníʼ «guiaaziʼ» tuuxa o xiixa ndaaniʼ nisa. Dxi guyuunisa Jesús, biaaziʼ guidubi nácabe ndaaniʼ guiiguʼ Jordán ne «bireebe ndaaniʼ nisa» (Marcos 1:9, 10). Nga runi, ora chúʼnisa ti xpinni Cristu la? laaca riaaziʼ guidubi naca cuerpu stiʼ ndaaniʼ nisa.

2. ¿Xi rusihuinni ti binni ora riuunisa?

Ora riuunisa ti binni la? rusihuinni maʼ bidii xquendanabani Jehová. Yanna, ¿xi caquiiñeʼ guni tuuxa para gudii xquendanabani Jehová yaʼ? Caquiiñeʼ gúnibe ti oración ne gábibe Dios racaláʼdxibe gúnibe ni ná guidubi xquendanabánibe. Naquiiñeʼ gúnibe ndiʼ ante chúʼnisabe. Lu oración riʼ runi prometerbe Jehová laasi nga chiguni adorarbe ne zúnibe ni ná primé lu xquendanabánibe. Ne laaca riguixhe íquebe chinándabe ejemplu stiʼ Jesús ne guiráʼ ni bisiidiʼ, sicaríʼ guníʼ Jesús: «Pa nuu tu racalaʼdxiʼ gaca xpinneʼ la? cadi guibani para laa [...] ne cadi gusaana de guedananda naa» (Mateo 16:24). Ora rudii ti binni xquendanabani Jehová ne riuunisa la? jma raca xhamigu laabe ne laaca randa raca xhamigu ca binni ni runi adorar laabe.

3. ¿Xi caquiiñeʼ guni ti binni para ganda chúʼnisa?

Pa racaláʼdxiluʼ chuʼnísaluʼ la? ni naquiiñeʼ gúniluʼ primé nga guiziidiluʼ de Jehová ne gápaluʼ fe laabe (biindaʼ Hebreos 11:6). Ra jma ziziidiluʼ de Jehová ne ziyápaluʼ fe laabe, jma zannaxhiiluʼ Dios ni bizáʼ lii. Ne nga nga ni chigacané lii chuuláʼdxiluʼ guni predicarluʼ ne guibániluʼ modo racalaʼdxiʼ Dios (2 Timoteo 4:2; 1 Juan 5:3). Ora maʼ nabani binni «casi nabani ca binni ni runi xhiiñaʼ Jehová» la? óraca nga maʼ zanda gudiibe xquendanabánibe Dios ne chúʼnisabe (Colosenses 1:9, 10). a

 GUIZÍʼDIRUNU JMA

4. Xi zanda guizíʼdinu de modo guyuunisa Jesús

Para gánnatu xi ruzeeteʼ Biblia de modo guyuunisa Jesús, laguundaʼ Mateo 3:13-17. Despué laiquiiñeʼ ca pregunta riʼ para güitu diidxaʼ:

• ¿Ñee ti baʼduhuiiniʼ nga Jesús dxi guyuunisa la?

• ¿Ñee caadxi nisa si birúbacabe íquebe la? Yanna, ¿ximodo guyuunísabe yaʼ?

Dxi guyuunisa Jesús, bizulú biʼniʼ dxiiñaʼ biʼniʼ mandar Dios laa guni. Laguundaʼ Lucas 3:21-23 ne Juan 6:38, ne laiquiiñeʼ pregunta riʼ para güitu diidxaʼ:

• Guyuunisa si Jesús, ¿xi dxiiñaʼ jma gucuá ique guni?

5. Zanda chuʼnísaluʼ pa quixhe íqueluʼ gúniluʼ ni

Zándaca nuu tu ridxibi gudii laa Jehová ne chúʼnisa. Peru pa qué gusaana de guiziidiluʼ de Jehová ne gunibiáʼ chaahuiluʼ laabe la? maʼ qué zadxíbiluʼ chuʼnísaluʼ. Para gunibiaʼtu caadxi binni ni gudixhe ique chúʼnisa, laguuyaʼ VIDEU riʼ.

Laguundaʼ Juan 17:3 ne Santiago 1:5, ne laiquiiñeʼ pregunta riʼ para güitu diidxaʼ:

• ¿Xi zanda gacané ti binni gaca preparar para chúʼnisa?

1. Rudiʼnu xquendanabáninu Jehová ora rábinu laa lu ti oración qué ziuu dxi gusaana de gúninu ni ná.

2. Ora riuʼnísanu, rusihuínninu nezalú guiráʼ binni maʼ bidiʼnu xquendanabáninu Dios.

 6. Ora riuunisa ti binni reeda gaca parte de familia stiʼ Jehová

Ora riuʼnísanu, riuʼnu ndaaniʼ ti familia ni nuu lu guidubi naca Guidxilayú ne ni nuu tobi si. Tobi si ni runi credu ne guiradu rinándadu ca ley stiʼ Dios ni zeeda lu Biblia, gastiʼ naca xi guidxi nabézadu o ximodo bibánidu ante gunibiaʼdu Jehová. Laguundaʼ Salmo 25:14 ne 1 Pedro 2:17, ne laiquiiñeʼ pregunta riʼ para güitu diidxaʼ:

• Casi ná ca versículo riʼ, ¿xi zabeendunu ora chuʼnísanu?

 XI BIZÍʼDINU

Jesús guníʼ para ganda gácanu xpinni caquiiñeʼ chuʼnísanu. Ne para ganda chuʼnísanu la? caquiiñeʼ gápanu fe Jehová, chinándanu ca ley stiʼ ne gudiʼnu laa xquendanabáninu.

Xi biziidiluʼ

• ¿Xii nga chúʼnisa ti binni ne xiñee risaca ni?

• ¿Xi rusihuinni tuuxa ora chúʼnisa?

• ¿Xi caquiiñeʼ guni ti binni ante gudii xpida Jehová ne chúʼnisa?