Gadxé gadxé modo ruuyaʼ binni de cada lugar gueʼ tuuxa xiixa bebida ni napa alcohol. Nuu tu reʼné ca xhamigu ora chuʼcaʼ ti ratu juntu. Ne nuu tu laa qué lica riná gueʼ gastiʼ ni napa alcohol. Ne nuu tu laa rididisú ora gueʼ ne rixudxi. ¿Ñee rusiidiʼ Biblia malu nga gueʼ binni bebida ni napa alcohol la?

1. ¿Ñee malu nga gueʼ tuuxa xiixa ni napa alcohol la?

Qué ruzeeteʼ diʼ Biblia pa malu nga gueʼ tuuxa xiixa bebida ni napa alcohol. Ni ruzeeteʼ ni nga de lade ca regalu ni rudii Jehová laanu nuu «vinu para gusiecheʼ ladxidóʼ binni» (Salmo 104:​14, 15). Ne lu Biblia ruzeeteʼ guyuu hombre ne gunaa xpinni Dios ni güeʼ vinu (1 Timoteo 5:​23).

2. ¿Xi conseju rudii Biblia ca ni runi decidir gueʼ xiixa ni napa alcohol?

Qué riuulaʼdxiʼ Jehová xhudxi binni peru laaca qué riuuláʼdxibe gueʼ xhaataʼ tuuxa xiixa ni napa alcohol (Gálatas 5:​21). Biblia ná: «Cadi chuʼluʼ lade ca ni reʼ xhaataʼ vinu» (Proverbios 23:​20). Nga runi, pa maʼ biʼniʼ decidirnu guideʼnu xiixa ni napa alcohol—stúbinu o né xcaadxi binni—, cadi naquiiñeʼ guideʼnu ziaʼ dede maʼ qué gudiʼnu cuenta xi cayúninu o xi caninu. Laaca cadi naquiiñeʼ guidéʼ xhaatanu purtiʼ zuni huará ni laanu. Pa nánnanu qué randa rucueezanu laanu ora rideʼnu la? mejor cadi lica guideʼnu gastiʼ ni napa alcohol.

3. ¿Ximodo rusihuínninu runi respetarnu decisión stiʼ xcaadxi binni?

Cada tobi nga naquiiñeʼ guni decidir pa zeʼ xiixa ni napa alcohol o coʼ. Peru pa maʼ biʼniʼ decidir tuuxa gueʼ caadxi la? cadi naquiiñeʼ guininu mal laa. Ne laaca cadi naquiiñeʼ gucaʼnu tuuxa gueʼ xiixa ni napa alcohol pa maʼ biʼniʼ decidir cadi gueʼ (Romanos 14:​10). Ne pa nánnanu zuchíʼñanu conciencia stiʼ xcaadxi binni pa guideʼnu xiixa ni napa alcohol la? jma galán cadi gúninu ni (biindaʼ Romanos 14:​21). Purtiʼ ti xpinni Cristu la? naquiiñeʼ «guyubi modo gacané stobi ne cadi guyubi para laasi» (biindaʼ 1 Corintios 10:​23, 24).

 GUIZÍʼDIRUNU JMA

4. Biʼniʼ decidir pa zeʼluʼ xiixa ni napa alcohol o pa coʼ

¿Ximodo biiyaʼ Jesús gueʼ binni xiixa ni napa alcohol? Para gánnanu ni, guidúʼndanu relatu ra riete primé milagru ni bíʼnibe. Laguundaʼ Juan 2:​1-​11 ne laiquiiñeʼ ca pregunta riʼ para güitu diidxaʼ:

• Casi riete lu relatu riʼ, ¿ximodo ruuyaʼ Jesús tuuxa ni reʼ xiixa ni napa alcohol ne xi riníʼ íquebe de laacaʼ?

• Cumu qué niníʼ diʼ Jesús cadi jneza nga gueʼ binni xiixa ni napa alcohol la? ¿ximodo naquiiñeʼ guʼyaʼ ti xpinni Cristu tuuxa ni runi decidir gueʼ xiixa ni napa alcohol?

Yanna, neca zanda gueʼ ti xpinni Cristu xiixa ni napa alcohol, cadi siempre nga jneza guebe ni. Laguundaʼ Proverbios 22:3 ne laguuyaʼ pa jneza nga gueʼ binni xiixa ni napa alcohol ora...

• ... chigusá o chiguiquiiñeʼ xiixa maquinaria.

• ... nacaxiiñiʼ ti gunaa.

• ... gabi doctor laa cadi naquiiñeʼ gueʼ xiixa ni napa alcohol.

• ... raca nagana para laa guni controlar biaʼ reʼ.

• ... runi prohibir ley gueʼ binni alcohol.

• ... nuu ti binni ni maʼ gudixhe ique cadi gueʼ xiixa ni napa alcohol purtiʼ nabé guxudxi dxiqué.

¿Ñee zanda gudiiluʼ xiixa bebida ni napa alcohol ra ti boda o ra ti conviviu la? Guidúʼyanu xii nga ca cosa ni naquiiñeʼ gánnaluʼ pa racaláʼdxiluʼ gúniluʼ ni. Laguuyaʼ VIDEU riʼ.

Laguundaʼ Romanos 13:​13 ne 1 Corintios 10:​31, 32. Despué de gúʼndatu cada textu riʼ, laiquiiñeʼ pregunta riʼ para güitu diidxaʼ:

• ¿Ximodo zanda gacané textu riʼ lii guicaaluʼ ti decisión ni gusiecheʼ Jehová?

 5. Biʼniʼ decidir pabiáʼ gueluʼ

Pa guni decidirluʼ gueluʼ la? bietenalaʼdxiʼ ndiʼ, neca cadi malu nga guideʼnu xiixa ni napa alcohol, qué riuulaʼdxiʼ Jehová tidisunu. ¿Xiñee yaʼ? Laguundaʼ Oseas 4:​11, 18 ne laiquiiñeʼ pregunta riʼ para güitu diidxaʼ:

• ¿Xi zanda gueeda guizaaca ora tididisú binni ora gueʼ?

¿Xi zanda gacané laanu para cadi tidisunu? Caquiiñeʼ guni reconocernu pabiáʼ zanda guideʼnu. Laguundaʼ Proverbios 11:2 ne laiquiiñeʼ pregunta riʼ para güitu diidxaʼ:

• ¿Xiñee galán nga quíxheluʼ pabiáʼ gueluʼ?

6. Zanda gusaanaluʼ guendarixudxi

 XI BIZÍʼDINU

Cadi malu nga guideʼnu xiixa ni napa alcohol, purtiʼ Jehová nga bidii ni laanu, peru cadi naquiiñeʼ xhúdxinu o guidéʼ xhaatanu.

Xi biziidiluʼ

• ¿Xi ruzeeteʼ Biblia de ca bebida ni napa alcohol?

• ¿Xi zanda gueeda guizaacaluʼ pa tidisuluʼ ora gueluʼ?

• ¿Ximodo rusihuínninu runi respetarnu binni ni maʼ gudixhe ique gueʼ caadxi o ni qué lica reʼ xiixa ni napa alcohol?