1. Ora ti binni gabi laanu maʼ bineʼ perdonar lii, ¿xiñee raca nagana guiénenu xi peʼ nga racaláʼdxibe guiniʼbe?

 ORA ti binni ni bininanu gabi laanu: «Maʼ bineʼ perdonar lii». ¡Guizáʼ ratadxí ladxidoʼno! Peru ¿xi peʼ nga racaláʼdxibe gábibe laanu yaʼ? Nuu biaje nagana gánnanu ni purtiʼ cada binni gadxé modo runi perdonar. Nuu de laacaʼ rúnicaʼ ni casi ñaca gastiʼ nizaaca ne qué rusaana de gaca xhamígucaʼ, ne nuu xcaadxi la? maʼ qué rinacaʼ guiniʼcaʼ de ni bizaaca, peru maʼ qué raca xhamígucaʼ casi dxiqué.

 2. ¿Ximodo runi perdonar Jehová? (Laaca zanda gúʼyaluʼ nota ca).

² ¡Peru maʼ gadxé modo naca Jehová! Nin ti binni qué runi perdonar casi modo rúnibe ni. Sicaríʼ guníʼ ti hombre ni bicaa Salmo: «Purtiʼ lii dxandíʼ peʼ runi perdonarluʼ ne pur laani guizáʼ runi respetárcabe lii» (Sal. 130:4). a Raríʼ ridúʼyanu ora runi perdonar Jehová laanu gástiruʼ sti cosa casi laani, purtiʼ dxandíʼ peʼ runi perdonarbe. Pa racaláʼdxinu gánnanu xi peʼ nga guni perdonarnu la? caquiiñeʼ chinándanu ejemplu stibe. Stiidxaʼ Dios ni gucuá lu diidxaʼ hebreu nuu biaje riquiiñeni ti diidxaʼ para guiniʼni modo runi perdonar Jehová ne cadi modo runi perdonar binni.

 3. ¿Xiñee maʼ gadxé modo runi perdonar Jehová de modo runi perdonarnu? (Isaías 55:​6, 7)

³ Ora runi perdonar Jehová ti binni rusiaandabe ca pecadu stiʼ. Ne ribiguetaʼ raca xhamígube laa. Runi perdonar Jehová guiráʼ ca pecadu stinu ne maʼ qué rietenaláʼdxibe cani. ¡Aque galán ndaayaʼ riʼ! (Biindaʼ Isaías 55:​6, 7).

 4. ¿Xi maʼ biʼniʼ Jehová para gacané laanu guiénenu modo runi perdonar?

⁴ Maʼ gadxé nga modo runi perdonar Jehová de modo  runi perdonarnu, nga runi laasinu qué zanda guiénenu ni. Peru riquiiñeʼ Jehová caadxi ejemplu ni zeeda lu Stiidxaʼ para gacané laanu guiénenu ni. Lu artículo riʼ zuzéʼtenu caadxi de laacani. Zacá zadúʼyanu xi runi Jehová para guxhiá pecadu ti ganda guibiguetaʼ gaca xhamígunu laa. Zacané ca ejemplu riʼ laanu guiénenu modo runi perdonar Jehová laanu, ne gusisácanu laabe jma purtiʼ laabe nga Bixhózenu ni nadxii laanu.

RINÉ JEHOVÁ CA PECADU STINU

 5. ¿Xi rizaaca ora runi perdonar Jehová ca pecadu stinu?

⁵ Stale biaje ruchaaga Biblia ca pecadu casi xiixa ni nabé nanaa. Sicaríʼ guníʼ rey David: «Purtiʼ puru si ca donda stinneʼ nuu ndaaniʼ iqueʼ; nanaa cani, nabé nanaa cani para naa» (Sal. 38:4). Peru lu Salmo 25:18 ne 32:5 riete runi «perdonar» Jehová ca pecadu stiʼ ca ni raca arrepentir. Diidxaʼ hebreu ni biquiiñeʼ para guca traducir runi «perdonar» riniʼni «guindisaʼ» o «chiné». Ndiʼ racané laanu guiníʼ íquenu zeeda gaca Jehová casi ti hombre nabé nadipaʼ ne rindísabe de lu xíʼquenu ca pecadu ni nuanu ne rinebe cani.

 6. ¿Paraa riné Jehová ca pecadu stinu?

⁶ ¿Paraa riné Jehová ca pecadu stinu yaʼ? Lu Salmo 103:12 zeeda ti ejemplu ni racané laanu guiénenu ni, nani: «Biaʼca zitu nuu de ra rindani gubidxa ne dede ra riaazini, biáʼcaca nga zitu riguíxhebe ca pecadu stinu de laanu». Nabé zitu riaana ladu rindani gubidxa de ladu riaazini. Gadxé nga ladu rindani gubidxa ne gadxé nga ladu riaazini, nga runi zanda guininu guizáʼ zitu nuu cada tobi de laacani. Rusiidiʼ versículo riʼ laanu ora runi perdonar Jehová laanu, guizáʼ zitu rinebe ca pecadu stinu dede qué zanda guiníʼ íquenu pa guidubi. ¡Nabé ratadxí ladxidoʼno gánnanu ndiʼ!

 7. Casi ná Biblia, ¿xi runiné Jehová ca pecadu stinu? (Miqueas 7:​18, 19).

⁷ ¿Ñee riaanané Jehová ca pecadu stinu ora rinebe cani zitu de laanu la? Coʼ. Rey Ezequías guníʼ: «Maʼ guluubiluʼ guiráʼ ca pecadu stinneʼ nezadécheluʼ» o, casi ná nota, «maʼ guleeluʼ nezaluluʼ guiráʼ ca pecadu stinneʼ» (Is. 38:​9, 17; nota). Ora raca arrepentirnu, ricaa Jehová ca pecadu stinu ne riguubibe cani ti lugar ra maʼ qué zanda gúʼyabe cani. Laaca zanda gaca traducir versículo riʼ sicaríʼ: «Para lii casi ñaca qué huayuu dxi gucheeniáʼ lii». Ne lu Miqueas 7:​18, 19 (biindaʼ ni). Zeeda ti ejemplu ni racané laanu guiníʼ íquenu zacá ni. Racá riete riguubí Jehová ca pecadu stinu ndaaniʼ nisadóʼ dede ra jma gueteʼ. Tiempu gucuá Biblia, pa guiaba xiixa ndaaniʼ nisadóʼ, maʼ qué zanda cueecabe ni.

 8. Dede ra ziuunu riʼ, ¿xi maʼ bizíʼdinu?

⁸ Maʼ gucané ca ejemplu riʼ laanu guiénenu ora runi perdonar Jehová laanu, ráxhabe ca pecadu ni nuanu ne rinebe cani zitu. Ne casi guníʼ David: «Dichoso ca binni ni maʼ guca perdonar ca cosa malu ni biʼniʼ ne ni maʼ biʼniʼ perdonárcabe ca pecadu stiʼ; dichoso nga hombre ni qué ziuu dxi guietenalaʼdxiʼ Jehová ca pecadu stiʼ» (Rom. 4:​6-8). ¡Jehová dxandíʼ runi perdonar!

RUXHIÁ JEHOVÁ CA PECADU STINU

 9. ¿Xi ejemplu riquiiñeʼ Jehová para gacané laanu guiénenu pabiáʼ runi perdonar laanu?

⁹ Bidii Jesús xquendanabani para guixiá ca pecadu stinu ne laani nga riquiiñeʼ Jehová para ganda guni perdonar  ca pecadu stiʼ ca binni ni maʼ guca arrepentir. Lu Biblia riete riguiibiʼ ne rusiá Jehová ca pecadu ca. Zacá reeda gaca binni ni bichee ca nayá nezalube (Sal. 51:7; Is. 4:4; Jer. 33:8). Ne Jehová peʼ cayabi laanu xi ndaayaʼ ricaanu: «Neca maʼ naxiñáʼ rini ca pecadu stitu, zácacani naquichibé casi nieve; neca naxiñáʼ rini ca pecadu stitu casi lari carmesí, zácacani naquichibé casi xiaa» (Is. 1:18). Nabé nagana nga para guiaaxha ca mancha ni rusaana color naxiñáʼ rini o carmesí. Rusihuinni Jehová né ejemplu riʼ zanda guxhiá ca pecadu stinu ne cadi guiaana mancha.

10. ¿Xi sti ejemplu racané laanu guiénenu guizáʼ runi perdonar Jehová laanu?

¹⁰ Casi bizíʼdinu lu artículo ni gudiʼdiʼ que zeeda gaca ca pecadu stinu casi deuda (Mat. 6:12; Lucas 11:4). Cada biaje guchéʼnenu Jehová rápanu ti deuda né laa, peru ora runi perdonar Jehová laanu casi ñaca maʼ cadi nuzáʼbinu laabe, ni caninu nga ruxhiabe guiráʼ ca deuda stinu ne maʼ cadi caquiiñeʼ quíxenu ni laabe. Qué runi obligar diʼ Jehová laanu quíxenu ca pecadu ni maʼ bíninu purtiʼ maʼ biʼniʼ perdonarbe laanu. ¡Nabé ratadxí ladxidoʼno gánnanu modo runi perdonar Jehová laanu!

11. ¿Xii nga caníʼ Biblia ora ná rixiá ca pecadu stinu? (Hechos 3:19).

¹¹ Ruxhiá Jehová ca deuda stinu tobi si tiru (biindaʼ Hechos 3:19). Racané ejemplu riʼ laanu guiníʼ íquenu ti binni ni rucaa raya ra cá pabiáʼ nuzaabiʼ tuuxa laa. Neca maʼ cá raya luni peru rihuínniruʼ ca númeru stiʼ deuda ca. Peru ejemplu riʼ cadi caníʼ diʼ ni gucaʼnu ti tacha cueʼ ti deuda, sínuque guxhianu ni. Para guiénenu ejemplu riʼ, tiempu gucuá Biblia biquiiñecabe ti tinta ni bíʼnicabe ra biguuchacabe buu, tini yaga ne nisa ne cadi nagana para guxhácabe ni né ti esponja nagupa. Ngue runi ora guxhácabe ti deuda rixiá ni tobi si tiru ne maʼ guirutiʼ randa ruuyaʼ xi gucuá raqué, casi xa ñaca qué ñuu diʼ ni. ¡Nabé rudiʼnu xquixe peʼ Jehová, purtiʼ ora runi perdonarbe ca pecadu stinu ruxhiabe cani tobi si tiru! (Sal. 51:9).

12. ¿Xi rusiidiʼ ejemplu stiʼ za naroʼbaʼ ne nacahui laanu?

¹² Riquiiñeʼ Jehová stiʼ ejemplu ni zeeda lu Isaías 44:22 para guiníʼ xi runiné ca pecadu stinu, sicaríʼ guniʼbe: «Zuxhiayaʼ ra maʼ bicheeluʼ casi ñaca nuchii ti za cani, ne ca pecadu stiluʼ casi ñaca nuchii ti za naroʼbaʼ ne nacahui cani». Ora runi perdonar Jehová laanu, casi ñaca nuchiibe ca pecadu stinu né ti za naroʼbaʼ ne nacahui ne guirutiʼ zanda guʼyaʼ cani.

13. ¿Ximodo runi sentirnu ora runi perdonar Jehová ca pecadu stinu?

¹³ ¿Xi rusiidiʼ ca ejemplu riʼ laanu yaʼ? Rusiidicani laanu, ora maʼ biʼniʼ perdonar Jehová laanu cadi naquiiñeʼ guni sentirnu rusaana ca pecadu stinu ti mancha lu xquendanabáninu. Cumu maʼ biaxa ca deuda stinu né rini stiʼ Jesucristu la? maʼ cadi naquiiñeʼ quíxenu cani. Maʼ bixiácani tobi si tiru casi ñaca qué ñuudxí ñuucani. Nga nga ni runi Jehová ora raca arrepentirnu pur ca pecadu stinu. Dxandíʼ peʼ runi perdonarbe laanu.

RACA XHAMIGU JEHOVÁ LAANU STI BIAJE

14. ¿Xiñee runi crenu runi perdonar Jehová laanu? (Laaca zanda gúʼyaluʼ ca imagen ca).

¹⁴ Ora runi perdonar Jehová laanu, zanda chuʼnu seguru ribiguetaʼ raca xhamígube laanu. Racané ndiʼ laanu cadi guni sentirnu nápanu donda. Ne laaca racané ndiʼ laanu cadi guni sentirnu  cadxiichiné Jehová laanu o cuyubi si pora guquixe ni laanu. ¡Qué ziuu dxi gaca nga! ¿Xiñee nuunu seguru zacá ni yaʼ? Purtiʼ laapebe gúdxibe profeta Jeremías: «Zuneʼ perdonar ra cucheecabe ne maʼ qué zietenaladxeruaʼ ca pecadu stícabe» (Jer. 31:34). Laaca bizeeteʼ apóstol Pablo ca diidxaʼ ni zeeda lu versículo riʼ: «Maʼ qué zietenaladxeruaʼ de ca pecadu stícabe» (Heb. 8:12). ¿Xi riníʼ ca diidxaʼ riʼ yaʼ?

15. ¿Xii nga cayabi Jehová laanu ora ná maʼ qué zietenalaʼdxiʼ ca pecadu stinu?

¹⁵ Lu Biblia diidxaʼ bietenalaʼdxiʼ cadi guiráʼ diʼ biaje riquiiñeʼ ni para guietenalaʼdxiʼ tuuxa xiixa ni bizaaca. Nuu biaje riquiiñeni para gucaani tuuxa guni xiixa o gucaani laa gapa cuidadu. Para guiénenu ni guzéʼtenu ti ejemplu, gubaanaʼ ni bicaacabe lu yaga, cueʼ Jesús, que guníʼ: «Bietenalaʼdxiʼ de naa ora guiuuluʼ lu Reinu stiluʼ» (Luc. 23:​42, 43) Casi ridúʼyanu cadi canábabe Jesús guietenalaʼdxiʼ laabe oraqueca. Ne modo bicabi Jesús laabe que bisihuinni zuni xiixa pur laabe: zandisaʼ laabe de lade gueʼtuʼ. Nga runi ora ná Jehová maʼ qué zietenalaʼdxiʼ ca pecadu stinu, ni nabe nga qué zuquíxebe ni laanu. Ne laaca qué ziuu dxi guchabe ni lunu purtiʼ maʼ biʼniʼ perdonarbe laanu.

16. Casi riete lu Biblia, ¿ximodo runi sentirnu ora runi perdonar Jehová laanu?

¹⁶ Guidúʼyanu sti ejemplu ni zeeda lu Biblia ni racané laanu guiénenu ximodo runi sentirnu ora runi perdonar Jehová laanu. Cumu guiranu nácanu binni ruchee la? zanda guininu nácanu «esclavu stiʼ pecadu». Peru ora runi perdonar Jehová laanu reeda gácanu binni ni maʼ biree «de lu náʼ pecadu» (Rom. 6:​17, 18; Apoc. 1:5). Ra gánnanu runi perdonar Jehová ca pecadu stinu guizáʼ nayecheʼ runi sentirnu casi ti esclavu ni reeda gaca libre.

17. ¿Xiñee zanda guininu ora runi perdonar Jehová laanu zeeda gácani casi ora nusiándabe laanu? (Isaías 53:5).

 ¹⁷ (Biindaʼ Isaías 53:5). Lu últimu ejemplu ni chiguidúʼyanu riʼ, ruzeeteʼ Biblia naca pecadu casi ti guendahuará malu. Peru maʼ bisianda Jehová laanu ra bidii lugar gatiʼ Xiiñiʼ pur laanu ne zacá randa raca xhamígunu laabe sti biaje (1 Ped. 2:24). Ora rianda ti binni ni napa ti guendahuará malu, guizáʼ riecheʼ. Zaqueca runi sentirnu ora runi perdonar Jehová laanu ne ribiguetaʼ raca xhamígunu laabe sti biaje, casi ñaca «nusiándabe» laanu.

XI NDAAYAʼ RICAANU PUR RUNI PERDONAR JEHOVÁ LAANU

18. ¿Xi rusiidiʼ ca ejemplu ni maʼ bidúʼyanu ca laanu de modo runi perdonar Jehová? (Laaca zanda gúʼyaluʼ cuadru ni láʼ «Ximodo runi perdonar Jehová laanu»).

¹⁸ Ca ejemplu ni maʼ bidúʼyanu ca rusiidicani laanu, ora runi perdonar Jehová ca pecadu stinu ruxhiabe cani tobi si tiru. Nga runi randa raca xhamígunu Bixhózenu ni nuu guibáʼ. Peru cadi guiaandaʼ laanu, runi perdonar Jehová laanu cadi purtiʼ runi merecernu ni o purtiʼ si canábanu ni laabe, sínuque nácani ti regalu stibe purtiʼ nadxiibe laanu ne nacháʼhuibe (Rom. 3:24).

19. a) ¿Xiñee rudiʼnu xquixe peʼ Jehová? (Romanos 4:8). b) ¿Xi zadúʼyanu lu sti artículo ca?

¹⁹ (Biindaʼ Romanos 4:8). ¡Guizáʼ rudiʼnu xquixe peʼ Jehová purtiʼ casi ná Salmo 130:​4, dxandíʼ peʼ runi perdonarbe! (Sal. 130:4). Peru pa racaláʼdxinu guni perdonar Jehová laanu la? naquiiñeʼ chinándanu ca diidxaʼ ni guníʼ Jesús: «Pa qué guni perdonartu ni gucheené binni laatu, laaca qué zuni perdonar Bixhózetu ni gucheetu» (Mat. 6:​14, 15). Nga runi, nabé risaca chinándanu ejemplu stiʼ Jehová ne guni perdonarnu. Lu sti artículo ca zadúʼyanu ximodo zanda gúninu ni.