¿Ñee maʼ nanna ca científicu ca ximodo bizulú universu ne guendanabani la? Ni dxandíʼ la? coʼ. Stale tu riníʼ ique ciencia ni láʼ cosmología nga zanda gusiene modo bizulú universu. Peru Marcelo Gleiser, ni naca profesor de Astronomía stiʼ Universidad de Dartmouth, ti hombre ni qué runi cré Dios, guníʼ: «Dede yanna caʼruʼ guiene chaahuidu ximodo peʼ bizulú universu».

Yanna, ¿xi zanda guininu de modo bizulú guendanabani yaʼ? Lu ti artículo stiʼ ti revista ni láʼ Science News ná: «Nagana nga gusiene chaahuinu ximodo peʼ bizulú guendanabani lu Guidxilayú riʼ. Purtiʼ maʼ xadxí biniti stale de ca registru geológico ni ñanda ñacané laanu ñánnanu ximodo peʼ bizulú ni». Ca ni maʼ bidúʼyanu riʼ rusihuinni ca ni qué ganda gusiene ciencia modo bizulú universu ne guendanabani.

Zándaca guinabadiidxaluʼ: «Pa nuu tu bizáʼ guendanabani lu Guidxilayú, ¿tu bizáʼ ni ya? Ne pa ni bizáʼ ni ca nuu xpiaaniʼ ne nachaʼhuiʼ, ¿xiñee cudiibe lugar gacananu, chuʼ stale religión ne guni ca binni riʼ stale cosa malu yaʼ?».

Qué ricabi ciencia ca pregunta riʼ, peru nuu tu zanda guicabi ca ni. Ne stale tu laa maʼ bidxela ca respuesta riʼ lu Biblia.

Stale científicu maʼ gudixhe ique guʼndaʼ chaahuiʼ ne guiene ni zeeda lu Biblia. ¿Ñuuláʼdxiluʼ ñánnaluʼ xiñee runi crécabe nuu tuuxa ni bizáʼ guiráʼ ni nuu la? Guyé lu jw.org ne biyubi serie de videu ni láʼ Padé zeeda guendanabani: Ni huaníʼ caadxi binni.