Risaca gánnaluʼ respuesta ca
¿Xiñee risaca gánnaluʼ pa nuu tuuxa ni bizáʼ guiráʼ ni nuu? Purtiʼ pa gudiiluʼ cuenta dxandíʼ nuu ti Dios ni nabé napa poder, zándaca ziuuláʼdxiluʼ gánnaluʼ pa zeeda Biblia de Dios. Ne pa gápaluʼ confianza ni zeeda lu Biblia, zabeenduluʼ stale cosa galán casi ca ni chiguzéʼtenu riʼ.
Zabániluʼ jma nayecheʼ
BIBLIA NÁ: Biʼniʼ Dios cosa galán ne «bisábabe nisaguié para laacaʼ ne bidiibe stale cosecha laacaʼ, bidiibe laacaʼ ni gocaʼ ne bichabe ladxidoʼcaʼ de guendanayecheʼ» (Hechos 14:17).
¿XI RINÍʼ NI? Guiráʼ ca cosa sicarú ni nuu lu naturaleza zeeda gaca ca ni ti regalu stiʼ Dios. Zadxélaluʼ xcaadxi regalu casi ni bizéʼtenu riʼ ora gúʼndaluʼ Biblia ne gúʼyaluʼ nabé rizaalaʼdxiʼ Dios lii.
Zadxélaluʼ conseju galán
BIBLIA NÁ: «Ziéneluʼ xii nga ni jneza ne ximodo raca juzgar jneza, ne zúniluʼ puru si ni jneza, ne zucaa íqueluʼ saluʼ lu neza ni nachaʼhuiʼ» (Proverbios 2:9).
¿XI RINÍʼ NI? Cumu Dios nga bizáʼ lii la? nánnabe xi caquiiñeluʼ para guibániluʼ nayecheʼ. Pa guʼndaʼ chaahuiluʼ Biblia, zadxélaluʼ conseju galán ni zacané lii.
Zánnaluʼ ca respuesta stiʼ ca pregunta stiluʼ
BIBLIA NÁ: «Zunibiáʼ chaahuiluʼ Dios» (Proverbios 2:5).
¿XI RINÍʼ NI? Gánnaluʼ dxandíʼ nuu Dios, zacané ni lii guidxélaluʼ respuesta stiʼ ca pregunta jma risaca nápaluʼ, casi xiñee nabáninu, xiñee cayacananu ne xi rizaacanu ora rátinu. Ora gúʼndaluʼ Biblia, zadxélaluʼ respuesta galán.
Zápaluʼ ti esperanza galán
BIBLIA NÁ: «Nannaʼ dxicheʼ xi caníʼ iqueʼ guneʼ para laatu —ná Jehová—. Racalaʼdxeʼ gápatu paz, cadi gacanatu. Racalaʼdxeʼ gudieeʼ laatu ti futuro ne ti esperanza» (Jeremías 29:11).
¿XI RINÍʼ NI? Cayuni prometer Dios zabee cosa malu, yuubaʼ ne guendaguti. Pa gápaluʼ confianza guiráʼ ni maʼ biʼniʼ prometerbe, zácaluʼ nadxibalú para gudxiiluluʼ ca guendanagana ni gápaluʼ.
