Nexheʼ chaahuiʼ universu. Ti artículo stiʼ revista Astronomy ná: «Cadi modo tiica si nexheʼ ca galaxia ca guibáʼ, sínuque nexheʼ chaahuiʼ ca ni». ¿Ximodo guca ndiʼ yaʼ? Ca científicu ca nacaʼ nuuni zacá pur ti materia ni qué rihuinni ni láʼ materia oscura. Nácabe zeeda gaca materia riʼ «casi ti andamiu ni qué rihuinni» ne luni nexheʼ chaahuiʼ «ca galaxia, ca cúmulo de galaxia ne ca supercumulo de galaxia».

¿Ximodo gunda gutachaahuiʼ universu yaʼ? ¿Ñee málasi gutachaahuiʼ ni la? Guidúʼyanu ni guníʼ Allan Sandage, ti científicu ni biʼniʼ cré Dios. Gúcabe tobi de ca astrónomo jma risaca ni bibani lu siglu veinte.

 Laabe guniʼbe: «Naa rabeʼ cadi málasi gutachaahuiʼ universu, sínuque guyuu tu gudixhe chaahuiʼ ni».

Nuu guendanabani purtiʼ nabé biaʼsi modo nexheʼ chaahuiʼ universu. Guiníʼ íquenu de stipa ni runibiáʼ ca científicu casi fuerza nuclear débil. Pur stipa riʼ, qué riaanadxí gubidxa ca de guicaguí. Purtiʼ pa ñácani jma débil la? qué ñuu gubidxa. Ne pa ñácani jma nadipaʼ, maʼ ninitilú gubidxa.

Nexheʼ chaahuiʼ fuerza nuclear débil lu universu, peru laaca nuu stale stipa ne ley ni nexheʼ chaahuiʼ luni, ne sin laacani que ñanda ñuu guendanabani. Ti científicu ni láʼ Anil Ananthaswamy bisiene, pa ñaca ca stipa ne ca ley riʼ gadxé la? «qué ñuu ca estrella, ca planeta ne ca galaxia ne laaca qué ñuu guendanabani».

Racané universu para guibani binni lu Guidxilayú. Cumu napa Guidxilayú riʼ nisa ne biaʼsi modo guyáʼ atmósfera ne beeu ca la? nga runi nuu guendanabani luni. Revista National Geographic ná: «Pur modo guyáʼ ne nexheʼ chaahuiʼ guiráʼ ni nuu lu Guidxilayú riʼ, nácani ti lugar biaʼsi peʼ para guibani binni». a

Ti científicu ná nuu sistema solar ca ndaaniʼ galaxia stini, ti lugar ra «gastiʼ nuu», ne pur nuuni zitu la? nuu guendanabani lu Guidxilayú riʼ. Pa ñuu Guidxilayú riʼ gaxha de xcaadxi estrella o galaa de galaxia riʼ, qué ñanda nibáninu luni purtiʼ ñuniná stuxhu ca ni laanu. Peru laanu nabáninu ti lugar ni runibiáʼ ca científicu ca casi zona de habitabilidad galáctica.

Sicaríʼ guníʼ ti físicu ni láʼ Paul Davies, ti hombre ni nanna de universu ne ca ley stini: «Qué zanda guneʼ cré málasi beeda chuʼ guendanabani lu universu riʼ, nuu xi pur nabáninu raríʼ». b Ni dxandíʼ la? qué nusiidiʼ Paul Davies bizáʼ Dios universu ne binni. Peru ¿lii xi rábiluʼ yaʼ? Né guiráʼ ni maʼ bidúʼyanu riʼ, rihuínnica guyáʼ universu ne Guidxilayú para chuʼ guendanabani luni. Yanna, ¿ñee cadi rucaa ndiʼ lii guiníʼ íqueluʼ guyuu tu bizáʼ ca ni la?