Ca guendaxheelaʼ ni runi dxiiñaʼ juntu, zeeda gácacaʼ casi ti piloto ne ti copiloto ni zigusá ti avión. Qué ruyúbicaʼ puru para laasicaʼ, sínuque racanésaacaʼ dede né ora rápacaʼ guendanagana.

CONSEJU ZEEDA LU BIBLIA: «Maʼ cadi chúpacabe, sínuque maʼ tobi si» (Mateo 19:6).

Christopher guníʼ: «Naquiiñeʼ gacanesaa ca guendaxheelaʼ ti guibánicaʼ galán».

Ora qué runi ti guendaxheelaʼ dxiiñaʼ juntu, ridinde diidxacaʼ ne lugar de guni chaahuicaʼ xiixa guendanagana la? laaca jma runi xiroocaʼ ni.

Alexandra ná: «Risaca guni ca guendaxheelaʼ ca dxiiñaʼ juntu. Pa ñaca qué ñácadu tobi si naa né xheelaʼ la? ñeeda gácadu casi chupa binni ni nabeza ndaaniʼ ti yoo, peru ni cadi nuu de acuerdu ora chiguicaacaʼ xiixa decisión».

GUNÍʼ IQUE NDIʼ

• ¿Ñee riníʼ íqueluʼ para lii si nga bueltu ni runi ganarluʼ la?

• ¿Ñee riníʼ íqueluʼ jma galán pa ñuuluʼ stúbiluʼ la?

• ¿Huaxiéʼ ridxaagaluʼ familia stiʼ xheelaluʼ neca laacaʼ nuucaʼ tobi si la?

GUNIʼNÉ XHEELALUʼ

• ¿Gunáʼ nga cosa galán ni rúninu juntu?

• ¿Paraa zanda guni mejorarnu?

• ¿Xi zanda gúninu para chuʼnu jma galán?

NI CAQUIIÑEʼ GÚNILUʼ

• Bixuiʼlú zeeda gaca xquendaxheelaluʼ casi ti partidu de tenis. ¿Xi rábitu zanda gúnitu para chuʼtu lu ngueca equipu?

• Lugar de guiníʼ íqueluʼ lii siouʼ guni ganarluʼ la? guníʼ ique ximodo guni ganartu guirópatu.

Ethan bizeeteʼ: «Gastiʼ naca tu laa napa razón. Ni jma risaca nga chuʼ guendariuudxi lu xquendaxheelanu».

CONSEJU ZEEDA LU BIBLIA: «Siempre laguizaalaʼdxiʼ binni, ne cadi guicá íquetu puru si ni caquiiñetu» (Filipenses 2:3, 4).