PARA CA NI NAPA XIIÑIʼ
7. Bisiidiʼ xiiñiluʼ guni ni jneza
¿XII NI YAʼ?
Ora nanna binni xii nga ni jneza, ribani galán. ¿Ñee rúniluʼ stipa gácaluʼ honradu la? Pa zacá ni, nanna dxíchidu laaca zusiidiluʼ ca xiiñiluʼ gácacaʼ honradu.
Ti binni nachaʼhuiʼ nanna guni dxiiñaʼ, biaʼca risaca guiráʼ binni para laa ne rizaalaʼdxiʼ stobi, jma nagueenda gapa binni ca cualidad riʼ ora nahuiiniʼ.
CONSEJU ZEEDA LU BIBLIA: «Bisiidiʼ xiiñiluʼ neza ra naquiiñeʼ saʼ, neca guióʼxhobe qué zareechube de neza ca» (Proverbios 22:6).
¿XIÑEE NABÉ RISÁCACANI?
Risaca gácanu nachaʼhuiʼ. Ti gunaa láʼ Karyn guníʼ: «Tiempu riʼ, nabé riquiiñeʼ ca xiiñinu ca dispositivu electrónicu, zándaca zúbacabe cueenu, nga runi nabé risaca guidúʼyanu pa cadi cayuuyacabe o cucaadiágacabe xiixa ni cadi jneza».
CONSEJU ZEEDA LU BIBLIA: «Binni huaniisi la? maʼ naguidxi fe sticaʼ ne siempre riquiiñecaʼ xquendabiaanicaʼ para guiénecaʼ xii nga ni jneza ne ni cadi jneza» (Hebreos 5:14).
Guni tratarnu binni galán. Nabé risaca guininu «por favor» ne gudiʼnu «xquixe peʼ», laaca risaca guizaaláʼdxinu ni caquiiñeʼ binni purtiʼ tiempu riʼ maʼ qué runi binni ca ni bizéʼtenu riʼ, sínuque maʼ guíʼdicaʼ lu teléfono ne qué rulábicaʼ guirutiʼ.
CONSEJU ZEEDA LU BIBLIA: «Laguni tratar xcaadxi cásica ñuuláʼdxitu ñuni tratárcabe laatu» (Lucas 6:31).
¿XI ZANDA GÚNILUʼ?
Bisiidiʼ ca xiiñiluʼ xii nga ni jneza. Caadxi estudiu ni huayaca ná ora rusiidiʼ ca padre ca xiiñicaʼ ni jneza, qué rápacaʼ relación sexual nahuiinicaʼ purtiʼ nánnacaʼ malu gúnicaʼ ni.
NI CAQUIIÑEʼ GÚNILUʼ: Pa gunadiágaluʼ xiixa noticia, galán iquiiñeluʼ ni para gusiidiluʼ ca xiiñiluʼ xii nga ni jneza. Guzéʼtenu ti ejemplu, pa málasi guiete lu noticia nabé nanaláʼdxicabe ti grupu de binni, zanda gábiluʼ laabe: «¡Cadi jneza nga, ¿njaʼ?! ¿Xiñee rábiluʼ nuu binni runi zacá pue?».
Brandon bizeeteʼ: «Para cadi gaca nagana para ca xiiñinu guicaacaʼ decisión galán la? primeru caquiiñeʼ gánnacabe xii nga ni jneza ne ni cadi jneza».
Bisiidiʼ ca xiiñiluʼ guiníʼnecaʼ binni galán. Neca nahuiiniʼ ca xiiñiluʼ, zanda gusiidiluʼ laacaʼ guizaaláʼdxicaʼ ni caquiiñeʼ stobi ne guiniʼcaʼ «por favor» ne gudiicaʼ «xquixe peʼ». Libru ni láʼ Parenting Without Borders (Padres sin fronteras) bizeeteʼ: «Ora gusiiditu ca xiiñitu cadi laacaʼ nga ni jma risaca la? ziuuláʼdxicaʼ gacanecaʼ xcaadxi binni».
NI CAQUIIÑEʼ GÚNILUʼ: Bisiidiʼ ca xiiñiluʼ gúnicaʼ xiixa dxiiñaʼ ti zacá gúʼyacaʼ pabiáʼ risaca gacanecaʼ xcaadxi.
Tara ná: «Pa gusíʼdinu ca xiiñinu gúnicaʼ dxiiñaʼ ni raca ndaaniʼ yoo, ora maʼ guibánicaʼ stúbicabe qué zaca nagana para laacabe gúnicabe ni».
