Para ganda gunibiaʼnu tuuxa, risaca gánnanu xi ca cosa maʼ bíʼnibe. Pa racaláʼdxiluʼ gunibiaʼluʼ Dios laaca naquiiñeʼ gánnaluʼ xi guiráʼ cosa maʼ bíʼnibe. Zadxagayaaluʼ gánnaluʼ xi ribeendunu pur guiráʼ ni maʼ biʼniʼ Dios, ne ximodo zacané ni laanu despué.

Jiobá nga Dios ni bizáʼ guiráʼ ni nuu, neca qué rihuinni ca cualidad stibe «peru dede dxi bizáʼ be guidxilayú rihuinni dxichi tu naca be pur irá ni biʼni be» (Romanos 1:20). «Laabe nga bizaʼbe guidxilayú né poder stibe, ne pur nuu xpiaanibe gunda bizaʼbe guidxilayú ni rudii ni gó binni, ne pur guendariene stibe bizaʼbe guibáʼ» (Jeremías 10:12). Ca cosa sicarú ni bizáʼ Dios, laaca rusihuinni cani pabiáʼ nadxiibe laanu.

Guníʼ ique pabiáʼ riéchenu bizáʼ Jiobá laanu «casi laa» (Génesis 1:27). Racané ndiʼ laanu gusihuínninu ca cualidad stibe. Laaca bidiibe laanu capacidad de guiénenu modo riníʼ íquebe ne ca norma stibe. Ora rinándanu ca norma riʼ racané cani laanu guibáninu jma nayecheʼ ne rapa sentidu xquendanabáninu. Ne cadi ngasi laaca zanda gaca xhamígunu laabe.

Rusihuinni Guidxilayú ra nabézanu riʼ pabiáʼ nadxii Jiobá laanu. Casi guníʼ apóstol Pablo «biluíʼ be laaca tu laabe pur ni biʼni be, purti ucané be laaca casi racané be laanu yanna, rusaba be nisa guie para gaca xquela nu. Qué rusiaadxa be ni idóʼ no, ne ruchá be ladxidóʼ no de enda nayecheʼ» (Hechos 14:17). Ora bizáʼ Dios Guidxilayú cadi ca cosa si ni caquiiñenu bidiibe laanu, sínuque bidiibe laanu stale cosa para guibáninu nayecheʼ. Ne ndiʼ nga ti prueba de guiráʼ ni chigudiibe laanu despué.

Bizáʼ Jiobá Guidxilayú para nibani binni luni sin ñáticaʼ. Biblia ruzeeteʼ «guidxilayú ca maʼ bidiibe ni binni» ne «cadi bizáʼsibe ni, sínuque bizaʼbe ni para cueza binni luni» (Salmo 115:16; Isaías 45:18).  ¿Tu chiguibani luni, ne pabiáʼ tiempu zabánicabe luni yaʼ? Biblia ná: «Cani runi jneza zudii Dios laacaʼ guidxilayú, ne qué ziuu dxi gusaana de guibánicaʼ luni» (Salmo 37:29).

Nga nga ni gucalaʼdxiʼ Jiobá dxi bizáʼ Adán ne Eva. Guluube primé hombre ne primé gunaa ndaaniʼ ti paraísu «para guni dxiiñaʼ ndaaniʼ ni ne gapa ni» (Génesis 2:8, 15). Bidii Dios laacabe ti dxiiñaʼ nabé risaca: «Lagapa xiiñitu ne lagaca stale, laguchá guidxilayú riʼ ne laguni dxiiñaʼ luni» (Génesis 1:28). Ngue runi gupa Adán ne Eva ndaayaʼ de nibánicaʼ ndaaniʼ Guidxilayú riʼ sin ñuu dxi ñáticaʼ. Triste guininu ni, peru qué ninácabe nuzuubacabe stiidxaʼ Dios ne pur ngue biníticabe oportunidad de ñuucabe lade ca binni ni «runi jneza» ne ni «qué ziuu dxi gusaana de guibánicaʼ» lu Guidxilayú. Peru casi chiguidúʼyanu, ni bíʼnicabe riʼ qué nuchaa ni propósitu stiʼ Jiobá para binni ne para Guidxilayú. Peru ante la? zadúʼyanu xiixa ni maʼ biʼniʼ Jiobá.

¿Xiñee bidii Jiobá laanu Biblia yaʼ? Purtiʼ racaláʼdxibe gunibiaʼnu laabe (Proverbios 2:1-5). Dxandíʼ, zándaca qué ricabi Biblia guiráʼ ni rinabadiidxanu de Dios; ne nin ti libru qué zanda guni ni (Eclesiastés 3:11). Peru, guiráʼ ni ná Biblia racané ni laanu gunibiaʼnu laabe. Zanda gánnanu ximodo naca Dios ne ximodo runi tratarbe binni. Guidúʼyanu tuu nga ca binni ni riuuláʼdxibe ni rúnicaʼ (Salmo 15:1-5). Zazíʼdinu ximodo racaláʼdxibe guni adorárcabe laabe, gunáʼ nga ca norma moral stibe ne xi riníʼ íquebe de ca cosa material. Laaca racané Biblia gunibiáʼ chaahuinu Dios ni bizáʼ laanu pur guiráʼ ni guníʼ Xiiñibe Jesucristu ne ni biʼniʼ (Juan 14:9).

Laaca bidiibe laanu Stiidxabe para gánnanu ximodo guibáninu nayecheʼ ne gapa xquendanabáninu propósitu. Cayabi ni laanu xi naquiiñeʼ gúninu para gápanu ti familia nayecheʼ ne cadi tan chuʼnu xizaa. Casi zadúʼyanu despué, ricabi Biblia ca pregunta ni jma runi binni, casi xiñee nuu stale yuubaʼ ne xi cabeza laanu despué. Laaca cusiéneni laanu xi guiráʼ maʼ biʼniʼ Dios para gaca cumplir ni maʼ guníʼ.

Nuu stale cosa ni rusihuinni gástiruʼ sti libru casi Biblia ne Dios guníʼ xi guicá luni. Neca cuarenta hombre bicaa ni, ne biaʼ ti mil xhoopaʼ gayuaa iza yené para biluxe gucuá ni, de ti tema si caníʼ guidubi naca ni purtiʼ Dios nga guníʼ xi guicá luni (2 Timoteo 3:16). Gadxé ni de xcaadxi libru nayooxhoʼ, purtiʼ neca maʼ xadxí gucuá ni qué huadxaa cani cá luni casi rusihuinni ca manuscritu yooxhoʼ stini. Neca stale tu huayacalaʼdxiʼ gucueeza de gaca traducir ni, gapa binni ni ne gúʼndacaʼ ni peru qué huabeendúcabe gastiʼ. Ca dxi riʼ laani nga libru ni jma ridoo ne ni raca traducir lu guidubi naca Guidxilayú. Cumu dede yanna nápanu libru riʼ, nga rusihuinni dxandipeʼ naca ni Stiidxaʼ Dios ne «qué ziuu dxi guinitilú» ni (Isaías 40:8).

Stobi de ca cosa ni maʼ biʼniʼ Dios para gusihuinni zuni cumplir propósitu stiʼ nga bidii laanu ti regalu nabé risaca. Casi bizéʼtenu que, ni gucalaʼdxiʼ Dios nga nibani binni ndaaniʼ Guidxilayú riʼ sin ñuu dxi ñati. Peru dxi maʼ qué niná Adán nuzuubaʼ stiidxaʼ Dios ne bichee la? binítibe oportunidad de nibánibe sin ñuu dxi ñátibe, ne pur nga laanu, ca xiiñibe laaca binítinu ni. «Pur tobi hombre biuu enda ruchee ndaani guidxilayú, ne guti be purti bichee be, ne zacá ucuá enda guti que irá xixé binni, purti laca bichee caʼ» (Romanos 5:12). Pur ni guca riʼ, ruluíʼ maʼ qué ñanda ñaca ni ná Dios. Peru ¿xi biʼniʼ Jiobá yaʼ?

Ni biʼniʼ Dios rusihuinni ni ximodo nácabe. Neca bíʼnibe ni jneza ora biʼniʼ castigarbe Adán ne Eva pur qué nuzuubacaʼ diidxaʼ, peru pur guendarannaxhii stibe, bíʼnibe xiixa para guibani binni galán lu futuro. Cumu nabé nuu xpiaaniʼ Jiobá gudíxhebe ti modo gaca chaahuiʼ guendanagana riʼ (Génesis 3:15). Zabeebe laanu de lu náʼ pecadu ne guendaguti pur Xiiñibe, Jesucristu. ¿Xi riníʼ nga yaʼ?

 Para ganda gacachaahuiʼ ni biʼniʼ Adán, biseendaʼ Jiobá Jesús ndaaniʼ Guidxilayú para gusiidiʼ binni gunáʼ nga neza ni ziné lu guendanabani ne para gudii «xpida para ilá stale binni» a (Mateo 20:28; Juan 14:6). Gunda bidii Jesús xquendanabani para gulá laanu purtiʼ perfectu laabe casi Adán, peru xi si la? laabe bizuubabe stiidxaʼ Dios dede dxi gútibe. Cumu gastiʼ razón para gátibe la?, gundisaʼ Jiobá laabe ne bidii lugar guibiguétabe guibáʼ. Ne zacá gunda bíʼnibe ni qué ñuni Adán: bidiibe binni runi ni jneza guendanabani ni qué zaluxe. «Pur hombre ni qué nuzuubaʼ diidxaʼ que, uyuu stale tu bichee, ne zaqueca pur stobi ni bizuuba diidxa que, ziuu stale tu zaxá stonda» (Romanos 5:19). Pur guendaguti stiʼ Jesús, zanda guni cumplir Dios promesa stiʼ: guibani binni sin qué chuʼ dxi gatiʼ lu Guidxilayú riʼ.

Modo biʼniʼ chaahuiʼ Jiobá guendanagana ni guyuu pur qué nuzuubaʼ Adán diidxaʼ, racané ni laanu gunibiáʼ chaahuinu laabe. Rizíʼdinu gastiʼ zanda gucueeza de gaca cumplir ni maʼ guníʼ Jiobá (Isaías 55:11). Laaca racané ni laanu gudiʼnu cuenta pabiáʼ nadxii Jiobá laanu. «Biluíʼ laanu pabiáʼ nadxii laanu ra biseenda tobi lucha Xiiñi ndaani guidxilayú, beda udii laanu enda nabani ni qué zaluxe. Ne sicarí rihuinni xi pe nga enda ranaxhii: cadi laanu gunaxhii nu laabe, sínuque laabe gunaxhii be laanu ne biseenda be Xiiñi be beda tixe irá ni huachéʼ né nu laabe» (1 Juan 4:9, 10).

Pa guná Dios bidii Xiiñiʼ pur laanu, zanda chuʼnu seguru «zácabe nachaʼhuiʼ ora gudiibe laanu guiráʼ ni chigudiibe Xiiñibe», casi maʼ biʼniʼ prometerbe laanu (Romanos 8:32, TNM). ¿Xi xcaadxi cosa maʼ biʼniʼ prometer Dios chiguni? Guidúʼyanu cani.