Bisiene Jesús ximodo zanda gánnanu «maʼ gaxha nuu Reinu stiʼ Dios» (Lucas 21:31). Lade ca cosa ni guniʼbe ca bizeetebe ziuu guerra, xu roʼ, hambre ne epidemia. Nga peʼ nga ni cazaaca ca dxi nabáninu riʼ (Lucas 21:10-17).

Laaca cayabi Biblia laanu feu zaca xpiaʼ binni «lu ca últimu dxi» stiʼ ca gobiernu nuu lu guidxilayú. Biindaʼ profecía ca lu 2 Timoteo 3:1-5. a ¿Cadi dxandíʼ casi riete lu textu ca nga guiráʼ ni runi binni ne modo naca binni ca dxi nabáninu riʼ la?

¿Xi rusiidiʼ ndiʼ laanu yaʼ? Maʼ cadi candaa zuchaa Reinu stiʼ Dios stale cosa ne jma galán zabani binni lu Guidxilayú (Lucas 21:36). Lu Biblia cayabi Dios laanu zuni caadxi cosa sicarú para Guidxilayú ne para ca binni nabeza luni. Guidúʼyanu chupa chonna de laani.

Maʼ gucuaa Jesús autoridad para guni mandar ne maʼ «bisisácacabe laa ne gucuaa reinu, ti guni guiráʼ binni de guidxihuiiniʼ ne nación ni ná, ne binni riníʼ gadxé gadxé idioma. Qué ziuu dxi gusaana de guni mandar, ne qué zanitilú reinu stiʼ» (DANIEL 7:14).

Xi cusiidini laanu. Cusiidini zanda guibáninu nayecheʼ ora maʼ guni mandar gobiernu stiʼ Dios lu guidubi Guidxilayú ne Xiiñibe nga Rey ni chiguni mandar.

«Guirutiʼ tu cueza racá zaníʼ: “Huaraʼyaʼ”» (ISAÍAS 33:24).

Xi cusiidini laanu. Cusiidini maʼ qué ziuu dxi gapa binni discapacidad ne maʼ qué zaca huará binni. Zanda guibáninu para siempre.

«Runduuxebe guerra lu guidubi guidxilayú» (SALMO 46:9).

Xi cusiidini laanu. Cusiidini maʼ qué ziuu dxi guiráʼ paz ne maʼ qué zacaná binni pur xiixa guerra.

«Maʼ qué ziuu binni malu; [...] ca ni nadóʼ zacaacaʼ guidxilayú» (SALMO 37:10, 11).

Xi cusiidini laanu. Cusiidini maʼ qué ziuu binni malu; ziuu binni si ni naʼ guzuubaʼ stiidxaʼ Dios.

«Zucuícabe yoo ne zabézacabe ndaaniʼ ni ne zuzuhuaacabe lubáʼ uva ne zócabe cuananaxhi stini» (ISAÍAS 65:21, 22).

Xi cusiidini laanu. Cusiidini zaca guidubi guidxilayú riʼ ti jardín sicarú. Zaca ni gunábanu Dios: gaca ni nabe «ndaaniʼ guidxilayú» (Mateo 6:10).